Phuong Tân Đông Hiệp (dahlau diah daok dalam Ban Dĩ An, tinh Binh Duong) lac labik pataom di rilo labik ngak kong, dui tui rilo urang ngak bruk mai ngak bruk saong diuk rai. Ini lac sa kateik geik praong tagok majam pato megru di bhum palei, tuk dom anek saih yaok thun jeng tagok glaong. Yaom lac aduk bilik ndap nda kaya buh jien tame veik, min jeng oh ka pabak hu ganap hatai caong di bhum palei.

Yau di Sang bac Tieu hoc Tân Đông Hiệp B, thun bac 2025-2026 hu 2.512 anek saih min bahrau hu 54 tal bac. Bruk ini ngak ka dom anek saih yaok tal bac jeng tapa rilo jang adat hukum di Mentri Pato Megru.

Piah khik kajap ginup tal bac saong pabak ginup hatai caong bac 2 var ka anek saih, sang bac brei pandar dom bilik jabat karei ngak jeng tal bac. Oh tok sa janih yau nan, sang bac daok padang veik 3 tadai tuan tal bac meng ton saong urak ini daok menyim veik pasak pato megru piah hu ginup labik ka anek saih bac megru.

Anai gru Châu Ngọc Hà, Akaok sang bac Tân Đông Hiệp B, brei thau sang bac hu brei panuac likau padang mbang ka 2 di angaok taneh daok hu. Dalam tukvak daok cang, sang bac caong hu patrun tanut pilih ruah tame dom thun anak tal piah rabha sumu kateik geik tal dom sang bac karei, plaih bruk biak rilo anek saih. Abih di nyu nan lac, asal kadha labik padeih padei kreh pandiak jala ka anek saih 2 var jeng lac sa caong khin praong. Anai gru Châu Ngọc Hà ndom meyai lac:

"Sang bac likau paban kik, daok cang brei. Dalam bruk samar chip brei ka dom anek saih bac, sang bac hu brei dom paban kik, jeng njauk tanut oh njauk piah bac 2 var/harei. Kayua kreh pandiak dom anek ndih ye angaok paban, bo paban, kik ye sit oh hu karo, kayua yau nan brei pabak kik pacang ka siam karo.”

Dreih yau nan, di sang bac Tieu hoc Tân Đông Hiệp A, phuong Tân Đông Hiệp, bruk anek saih biak rilo jeng ngak ka tal bac bak ganik, hu 2.700 adei min tok hu 66 tal bac. Piah hu ginup dom tal bac ini, sang bac hu pandar taong abih dom bilik chuc nang saong ngak veik sang bac anak meta meng tadai ton. Anai gru Doãn Thị Thúy Vân, Akaok sang bac jeng brei mboh bruk caong khin:

"Dalam tukvak anak mai tal, sang bac caong hu bruk sangka di urang pan akaok piah padang dom bilik bac, bilik jabat ngak bruk karei. Tuk nan, sang bac brei bayar gilac taong abih bilik chuc nang ka anek saih bac megru taong abih.”

Dahlau nan, jeng di phuong Tân Đông Hiệp, urang ngak bruk Rayo Sap ndom Viet Nam (VOV) hu taduan mboh kan kandah di sang bac Tieu hoc Đông An, labik brei ngak veik 4 tal bac meng ton urak ini oh daok kajap khang, oh pabak hu hatai caong pato bac saong bac megru salamat. Bruk ini jeng ngak ka amaik ame saong gru pato jeng daok duh hatai. Sa gru pato ndom meyai lac:

"Dut haong dom sang bac, dom adei kurang aduk bilik ndap nda kaya, ba tal danak dak bac megru jeng suai jang. Caong khin praong abih lac hu sang bac laneing lanoi piah pabak Danak dak pato megru 2018 ka anek saih di labik Tân Đông Hiệp."

Karja palei jeng langyah, kan kandah praong abih lac oh ka caga hu taneh piah padang bahrau sang bac Tieu hoc Đông An. Daok ngan hoang dom tal bac meng ton anak meta, kayua ndih dalam jalan nao tabak takai nan bruk padang khang kajap jeng gaok kan kandah.

Oh lac pakat tieu hoc hu bruk anek saih tagok rilo, blaoh di pakat THCS, THPT di Tân Đông Hiệp saong dom labik taphia yau ye Tân Uyên, Bến Cát (urak ini daok dalam Ban raya Ho Chi Minh) jeng daok kan kandah kurang tal bac yau nan.

Meyah bruk caga, padang bahrau labik pato megru oh hu kuhria gilac tani tanat saong samu, dom thun bac anak tal gaok kan kandah jang. Piah dom adei hu labik daok, sang bac brei patagok anek saih dalam tal bac, atau brei patui brei padang sang bac tadai ton anak meta.

Bruk “ndua naong” kateik geik brei ka bruk kurang tal bac ini biak njauk hu sangka saong hu jalan langyah samu gauk meng urang pan akaok Ban raya Ho Chi Minh piah dom adei anek saih hu labik bac megru siam saong karo./.