Di Kongti Chang Sin Viet Nam (Labik ngak kong Thạnh Phú, phuong Tân Triều, tinh Dong Nai – dhalau diah daok di huyen Vĩnh Cửu, tinh Dong Nai), labik hu labaih 42.000 urang ngak kong daok ngak bruk, hatai caong ka sang daok tuk halei jeng lac asal kadha samar chip. Min, meng tukvak blaoh tapa, dom danak dak ka sang daok rahra daok takik, gam haong dom caong takre “hu labik daok piah lagaih ngak mbang” di urang ngak bruk gam gam njauk brei padeih.

Ong Đặng Tuấn Tú, Akaok kapul Kong ndoan labik Kongti Chang Sin Viet Nam, brei thau, pah dui pachreih saong khik takai urang ngak bruk, gah ngak mbang pablei salih hu kham merat tagok jien bilan saong dom kein lagaih, min bruk njauk caik hatai lac kadha sang daok jeng lac kadha kan kandah praong abih.

“Piah tani tanat saong khik urang ngak bruk, bruk akaok meti ieu lac brei ka bruk labik daok. Khol dahlak hulin biak caong khin karja palei, Rajaei hu dom sarak ka sang daok piah daong dom urang ngak bruk mai ngak bruk di bhum palei.”

Gam sa hatai suhsah, ong Trần Đăng Ninh, Akaok kapul kong ndoan Taong kongti Ngak kong Kaya mbang Dong Nai (Dofico) ndom lac “hu labih daok lagaih ka ngak mbang”, dalam tuk njauk daok di sang pah ganik ganua, prein yava saong hatai sahaneng di urang ngak bruk jeng yau bruk sangka baoh sang njauk kan kandah rilo. Min, urak ini yaom sang daok rahra di dom labik, jeng biak glaong, ngak kan kandah ka bruk bayar jien sang daok di urang ngak kong. Ong Trần Đăng Ninh ba panuac likau brei hu bruk cakrok samar dalam bruk pambuak khang di Karja – Gah buh jien tame – gah Ngak mbang pablei salih piah ngak tantu ka hatai caong saong hu yaom pablei sang daok rahra lagaih. Abih di nyu nan lac, brei hu bruk daong di gilang pariak piah daong urang ngak bruk blei sang tui bruk bayar jien rah rah tui yaok bilan, daong dom urang nan gam hu sang daok gam hu sang daok blaoh oh ngak kan kandah biak praong tal mbang tui jien yaok bilan:

“Gilang pariak meda ngak bruk daong, pambuak haong gah ngak mbang pablei salih peih padang bruk bayar jien rah rah patui jien mek tame yaok bilan. Dahlak mboh lac, bruk patagok sang daok rahra tok hu siam lagaih tuk hu bruk pambuak pagam khang di: Karja, gah buh jien tame, gah ngak mbang pablei salih saong urang ngak bruk di angaok dom cơ chế piah hu mai tal urang ngak bruk, nan lac jalan ngak hu hatai caong takre”.

Dang di Anak dom hatai caong di urang ngak bruk, urang dang akaok tinh Dong Nai brei mboh patagok sang daok rahra ieu lac bruk ngak hu makna, lac bruk ngak saong ilamo di urang ngak bruk pasang iek. Tinh pandar dom sở, dom gah samar drah salah blaoh bruk ramik quy hoach tinh; taong abih xa, phuong brei gam gam peih padang ramik quy hoach xa phuong piah ngak yasa samu gauk. Meng di nan, caik dahlau dom taneh riya praong, jaik labik ngak kong ka bruk patagok sang daok rahra. Urang ngak praong di tinh jeng pandar pasang duah saong pandar siam lagaih taneh riya pakat karja piah neh rabha cambaih laih, dalam nan caik dahlau taneh riya ka sang daok rahra. Tui dom danak dak sang daok suai peih ngak, tinh brei kham merat mek gilac taneh. Ong Nguyễn Văn Út, Akaok UB Bhap bini tinh Dong Nai ndom meyai lac:

“Dom danak dak hu dui atah 5, 10 thun blaoh oh peih ngak oh hu kayua makna lagaih ye brei mek taneh. Khol dahlak oh kayua kanda blaoh ngak klaih klaoh lagaih di taneh riya, ngak kateik bru patagok di bhum palei. Dong Nai khin hu rilo gah buh jien tame bruk patagok kinh te bo dom danak dak peih ngak oh samu gauk ye brei kham merat langyah”.

Taphia bruk taoh talaih kan kandah hukum ka labaih 270 danak dak daok kandaong piah hu sang daok ka urang ngak bruk, Dong Nai jeng jhul khang bruk slaih bahrau harak gal karja, salih jalan sahaneng duh bruk di urang jakar. Tinh ba tabiak jalan padang kapul urang ngak bruk hu ilamo, patui veik khik kajap labik dang akaok dalam negar dalam bruk duh rahra, gah ngak mbang pablei salih./.