Ngak tui pato tacei di Mentri Chinh tri ka bruk buh jien tame pambuak pakat hu ngak praong saong asar siam abih, tinh Dong Nai hu peih ngak bruk “Pakajap sang danaok bac magru” biak tani tanat. Tui di nan, tinh daok hu ba tabiak Danak dak patagok taong abih sang bac di 8 xa tapen negar tukvak 2026-2030 hu taong abih jien buh tabiak labaih 1.300 ty dong.

Ong Lê Trường Sơn, Phaok Akaok UB Bhap bini tinh Dong Nai brei thau, tinh daok peih dom jalan ngak saong padrak dom xa ka bruk ngak brei quy hoach, buh jien tame rabha tukvak piah mek hu meng 5 tal 10ha yaok sang bac. Patui veik lac tal bruk buh jien tame dom thiet che, ndap nda kaya pato saong bac. Tapa pasang iek tapak, ong Sơn brei thau:  “Tukvak ngak urak ini hu dom xa khik kajap, min jeng hu xa oh ka khik kajap quy hoach ka taneh. Khol dahlak daok pataom tame pato tacei catang piah pabak quy hoach xa, jeng yau ba tabiak panuac peih paha mbaok taneh piah khik kajap taneh ka bruk patagok tui pato tacei di Mentri Chinh tri”.

Ong Hoanhg Manh Thường, Bi thu Ndang uy, Akaok HĐ Bhap bini xa Tấn Lộc brei thau, urak ini dalam xa hu 6 sang bac hu labaih 3.000 anek saih. Bhum palei hu padang 2 bruk lac pakajap Sang bac Tieu hoc Lộc Thiện jeng sang bac Pambuak pakat Tieu hoc saong THCS di taneh 5ha; gam haong nan pagam Sang bac Tieu hoc Lộc Tấn A tame Sang bac THCS Lộc Tấn peih bruk pato gam bac gam daok meteh harei. Ong Thường brei thau: “Ini lac kadha katih piah langyah bruk parilo anek saih di dom puk bhum palei tapen negar. Tui di nan, dom sang bac uranaih mam non oh ka njauk ginup tanut di nyu jeng brei hu co so vat chat siam jang tuk panduan sang bac Tieu hoc Lộc Thiên ka labik 5ha bahrau. Di banah ka 2, quy hoach ka sang bac ini labaih 5ha, khol dahlak daok ngak danak dak cambaih laih piah ba tagok dom pakat maong iek tapa ka jalan gak. Kuhria 2 banah ini brei tame padang ngak di thun 2026”.

Oh lac sa janih sangka tal bruk buh jien tame ka co so vat chat, tinh Dong Nai daok ba tabiak rilo sarak gheih karei ndung bak siam mekre. Cambaih laih lac, piah sangka ka kapul urang gru pato, tinh patui veik pasang duah, ramik caga ginup gru pato tui yaok pakat bac, abih di nyu nan lac gru pato sap English, Tin hoc saong gru pato bruk ngak. Piah dui pachreih gru pato naih joi mai bhum tapen negar, tinh padang bruk daong jien dui pachreih, brei lagaih bruk bac bruk ngak saong buh jien tame padang sang công vụ, gam haong nan brei caik dahlau bruk palih ruah urang di bhum palei atau dom urang mbaoh tangin sanya ngak bruk di ini suai atah.

Dang di anak bruk sangka nan, gru pato dom sang bac bhum palei tapen negar mboh biak chreih chrai ottanot. Anai gru Hoàng Thị Mỹ Vân, Akaok Sang bac Tieu hoc Lộc Tấn A brei mboh hatai caong khin dom sarak lagaih brei samar drah tame pandar:  “Biak caong Ndang saong Karja sangka piah bruk pandar sarak ngan haong urang jakar gru pato di dom xa tapen negar hu pandar dalam tukvak jaik abih piah ka urang jakar gru pato sahnang hatai ngak bruk”.

Dalam nan njauk ndom mayai lac, bruk naih gheih siam mekre abih di Danak dak lac sarak daong var mbang huak tui sarak di Rajaei. Tinh khik kajap taong abih anek saih tieu hoc saong THCS di dom xa tapen negar jeng hu daong mbang huak var kreh pandiak jala tyuk bac megru gam bac gam daok meteh harei. Amuk Nguyễn Thị Minh Thanh (daok di puk 1, xa Tân Tiến) brei thau tuk amaik ame bhian nao ngak apuh atah, bruk raok baa nek nao bac biak glaih glar. Amuk ndom lac: “Urak ini bhum atah bayah hu brei kein lagaih ka anek mbang huak meteh harei, kein lagaih ka mikva rilo lo, plaih hu dom naong trak. Meyah pakat angaok brei kein lagaih hu yau nan ye biak siam, mikva khol dahlak mboh thau dhar phol rilo lo”.

Jalan ba pato megru bhum palei tapen negar “peih chiaok par” jeng daok rilo kan kandah, abih di nyu nan lac jalan salah blaoh 100% sang bac njauk tanut chuan pakat negar tanut 2 di thun 2030. Min, ngan haong prein bruh jien tame khang saong bruk tame ngak khang catang di karja, tanrak hadah ilamo dak harei dak siam mekre, ngak jeng bruk karo kajap piah padang sa bhum tapen negar ini dak harei dak patagok karo kajap./.