Sa-ai Phạm Thị Hoa (daok di phuong Trảng Dài) urang ngak kong di Labik ngak kong Biên Hòa 1 labaih 10 thun. Urang atah di palei gah Barak tame Dong Nai duah bruk ngak, tuk halei saai Hoa jeng caong hu baoh sang taeng di drei piah ngak labik pandaok daok karo. Jien mek tame mai meng bruk ngak oh hu kandaong labaih ralo, tui sa-ai, bruk patak pataom ganap jien blei sang danaok daok biak kan. Piah klah daok sang pah kandaok, blei hu sang daok rahra ieu lac lagaih di abih tui di sa-ai:

“Daok sang pah raidiuk kan kandah jang, labik ngak mbang daok dang oh sahnang. Mayah sa urang ngak kong, urang ngak bruk bisa bhain di nyu ye yaom jien brei bayar ralo mbang hu”.

Pacatuah jang sa-ai Hoa, sa-ai Trần Công Danh (daok di phuong Hố Nai) blei hu sang daok rahra di Ban Biên Hòa dahlau. Sa-ai Danh biak chreih kayua nyu hadah hadai siam, nyu jeng ieu lac hatai caong takre di ralo urang ngak. Jak jeng hu tui hatai caong, saai Danh hu brei daong ralo mai meng sarak karja brei ka bruk daok dang mbang ngui:

“Sang danaok biak bui sambai, biak chreih chrai hu sang bahrau. Gilang jieng sarak karja gah rahra daong ka mesraiy jien mbang raba biar, masraiy 25thun. Ini lac sa janih lagaih daong brei kham marat piah hu bayar jien suai lavik).

Ong Nguyễn Anh Tuấn – Akaok So Padang tinh Dong Nai brei thau: Tinh dak brei akaok mbram tal thun 2030 ngak blaoh hu 65.000 baoh sang. Urak ini tinh brei taduon buh prein tame ngak 37 danak dak praong ralo labaih 38.000 baoh. Piah ngak hu 65.000 baoh sang ye njauk brei adat jeng ye jao ka urang buh prein tame ngak 27.000 baoh sang.

Gam tui di nan, tinh jeng patacei ngak dom adat harak piah tal thun 2027 jeng ye suai di nyu tal thun 2028 padang ngak, blaoh mbiah tal thun 2030 njauk ba hu brei tame pandar tui khin caong dak dalau. Tui ong Tuấn, piah ngak tui yau ye akaok mbram nao:

“Njauk brei thau cambaic sang daok rahra ieu lac sa bruk wajib, bruk njauk ngak bruk tui hatai dhar phol siam makre di urang iek glang nagar, urang ngak mbang blei salih song urang dalam bhap bini rahra. Tui jalan patagok bruk nagar dalam danak dak, dak padang taneh ieu lac bruk ngak njauk caik hatai. Langiu di nan, urang ngak mbang blei salih njauk caik hatai iek ndap nda kaya angui gam saong bruk patagok karao kajap”.

Tui Phaok Akaok UB Bhap bini tinh Dong Nai angan ong Hồ Văn Hà, gam saong hu taneh daok praong, sarak karja hahuan jeng ye ba abih hatai di karja, Dong Nai mada hu jalan patagok drah samar di vaktu mai meng anak, panak hu tanut nao tal di akaok mbram, nao tal sa baoh baraya siam lagaih – sa labik brei ka urang mai ngak mbang daok dang sahnang lagaih. Piah ngak hu siam sang daok rahra lagaih jang di tukvak mai meng anak, tinh pok panuac tagok pakat nagar brei daong ralo sarak karjar yau ye: Jien maraiy, taong jie, jien bayar saong dom bruk ngak pambuak brei panak adat harak brei ngak dak ngak sang rahra hu praong jang. Gam tui di nan, dom urang ngak mbang blei salih gam tui tinh padang Dong Nai jeng labik daok dang, ilamu siam makre tui jaman bahrau.

“Caong hu dom sarak adat brei ka gah ngak sang daok rahra dui panak katut, jeng ye hu hatai kham marat di bhap bini urang ngak mbang blei salih di karja, caong khin lac dom baoh sang rahra di Dong Nai mada ba panak jalan tal sang brei blei salih, njauk hu ganap hatai khin di bhap bini rahra”

Khik karo bruk daok dang mbang ngui, ralo abih di nyu brei ka sang danaok daok, nyu lac asal kadha daong ka raidiuk urang ngak dalam bruk patagok bhum palei dalam tỉnh. Urang pan akaok tinh Dong Nai daok kham marat, hatai caong glaong di abaih di urang ngak, urang ngak hu jien oh ralo, meng di nan sanang hatai daok dang ngak mbang di “ban medin ngak kong” dalam nagar. /.