Xa Phú Vinh (daok di huyen Định Quán dahlau) ini lac sa labik bhum taneh sa janih ngak nong, daok di bhum ceik glaong tinh Dong Nai gam hu 72% lac urang bangsa takik. Meng sa labik daok kan daman, bhum taneh daok tukik rahra, tal ini mboh mata bhum palei mbiah hadah hadai siam makre, raidiuk dak harei dak mboh tagok. Bruk ngak gah harak gal karja, daong brei mikva rahra, dalam nan hu bruk daong brei ka urang bangsa takik hu karja xa Phú Vinh caik hatai tame ngak. Tui ong Phùn Y Sáng (bangsa Dao), meng di harei ngak karja 2 pakat, mikva oh daok nao mai atah bayah, tukik jang tukvak cang ngak harak gal ralo taka, bruk ngak mboh siam makre lagaih lagua glaong jang:

“Tuk sua tangi mikva mboh jeng njauk hatai abih. Bruk ini mboh panak patut jang brei klah mikva nao atah bayah. Dahlau diah njauk nao trun mbiah tal tinh, min urak ini taong abih jeng hu kuria brei ngak di pakat xa ngak brei mikva biak uan tabuan”.

Tukvak meng blaoh, Dong Nai ba tabiak ralo sarak karja brei ka an sinh xa hoi, daong ka mikva ngak mbang patagok kinh te, karo kajap brei ka raidiuk. Pagap ye xa Phước Sơn (dahlau diah daok di tinh Binh Phuoc), karja tuk halei jeng caik hatai ngak tui danak dak nagar brei ka an sinh, brei kat bao hiem y te, daong brei lamo pajaih raong, brei kaya ngui ngak mbang… Tal ini xa daong brei saoh oh mek jien ka labaih 15.000 kat bao hiem brei ka urang bangsa takik, daong ka mikva tame hu iek glang brei ka ruak kik y te biak lagaih.

Dalam nan, meng danak dak yah klak sang taik tahak, sang tadai tuan sang jaleih sang tanje di urang bangsa takik hu dong brei masraiy jien ngak bahrau ka siam makre piah sahnang hatai ngak mbang. Urang kathaot dalam urang bangsa takik trun daok 865 baoh sang; urang jaik taphia kathaot daok 1.668 baoh sang. 

Langiu di nan, bruk ngak mbang kinh te dalam bhum mikva urang bangsa takik daok salih njauk jalan, daong patagok jien mek tame jeng ye brei panak pakatut jaik taphia urang kan kathot urang kaya mada di dalam tinh.

Ong Điểu Điều – Akaok Mbang bangsa HĐND tinh Dong Nai brei thau lac: tinh tuk halei jeng caik hatai, brei ka bruk bac magru urang bangsa takik. Nyu jeng ieu lac sa bruk kadha praong dalam bruk ngak tui Sarak karja nagar brei ka Nyom raya pakat Dang bo tinh Dong Nai mbang ka I, tukvak 2025-2030. Gam tui di nan brei ngak danak dak majam sang bac meng tinh tal pakat palei; buh jien buh prein tame brei ngak sang danaok bac magru dalam nan ralo abih brei ka labik atah bayah labik bhum urang bangsa takik bhum urang di tapen nagar.

“Iek glang brei ka sang danaok bac magru, urang pato, bruk bac magru di bhum atah bayah bhum urang bangsa takik, pato magru brei ka uranaih mbiah tal anek saih trung hoc pho thong. Yang ka dua di nyu, majam sang bac gam daok gam bac njauk brei iek asal siam ha oh brei ka dom janih bac magru piah lang yah”.

Dong Nai ieu lac tinh patagok ngak kong kayua yau nan ye njauk caik hatai brei ka bac magru saong kuhria brei ka bruk ngak, caik hatai daong brei ka urang ngak hu bruk, daong brei ka bruk patagok karo di tinh.  Ong Chu Văn Hiển – Pahasa urang hukum tinh Dong Nai brei thau lac, urak ini jeng daok mboh atah jalan kan kaya di dalm urang bangsa takik brei ka jalan patagok dut tui bhum taneh karei. Ralo adei jeng daok klak bac aval piah mai daong sang danaok di drei ngak kinh te, oh ka hu jalan nao oh hu pilih bruk ngak cambaic.

“Njauk caik hatai duah jalan njauk siam brei ka anek bangsa takik bac magru bruk ngak, tame duah ilamu, ngak tui ilamu ngak kong piah do urang bhum karei. Jeng njauk brei sarak dong jien bac magru, pato magru brei ka anek saih peih jalan ngak bruk”.

Tukvak mai meng anak, Dong Nai dang ngak drah samar ba sarak karja tame bruk di urang bangsa takik ka bhum palei drei piah daong ka mikva urang bangsa takik patagok karo kajap. Gam tui di nan brei ngak siam ngak lagaih jang jalan ngak di karja dua pakat, njauk caik hatai brei ka bhum taneh di drei, patagok pasiam urang ngak dan song urang jakar urang bangsa takik./.