Di bhum tapen xa Tân Lập, tinh Tay Ninh, baoh sang sit di sa-ai kamei Lê Thị Hồng daok di to 19, puk Tân Tiến (huyen Tân Biên klak) harei ini hu hadah gom yaok biar harei. Takik thei thau lac, piah hu baoh sang daok karo kajap nan, dua anek amaik hu diuk tapa dom harei rambah rambup.

Pasang klak nao tuk anek daok sit, sa-ai sa drei ta-eng raong anek praong tagok. Oh hu hamu apuh, oh hu bruk ngak tani tanat. Mata habang jang kayua ruak hakik, prein yava oh daok yau dahlau min jeng kham merat ngak apah yaok harei. Bruk ngak ka sa-ai mboh suh sah abih oh lac kurang mbang, kurang cuk, blaoh daok lac huac anek kamei klak bruk bac megru. Thau ka bruk nan, urang jakar, bol lin Balai Bien phong Pabah Bambang pakat Negar Xa Mát gam haong karja bhum palei duah mai tal, klah rabha saong daong prein. Sa baoh sang anit ranam hu padang tagok, padai brah hu daong yaok tukvak, blaoh abih di nyu nan lac, anek kamei di sa-ai lac adei Lê Thị Ngọc Anh, anek saih bac tal 3 Sang bac Tieu hoc Tân Lập hu alin brei jien pachreih bac daong adei hu nao tal sang bac. Dalam baoh sang sit ndung bak hatai anit ranam di bhap bini, sa-ai kamei drut druai lac: “Dahlak kathaot rambah rilo paje, patuah lac anek kamei hu urang daong, hu nao bac yau urang, lac biak thau dhar phol biak rilo dom boll in. Jeng caong habar ka kamuan thau pang kham merat bac tal labik tal dhua, harei hadei praong jeng menuac jeng urang meda hu daong dom urang gaok kan kandah.”

Hatai bui sambai nan hu brei mboh di meta di Ngọc Anh. Adei kuan paok jien pachreih bac dalam tangin, drut druai lac: “Anek bui sambai lo. Meng hu dom cei daong, anek hu jien brei tapuk katap, bayar jien bac, amaik ame takik tavak tavaiy glaih glar jang”. Meng harei hu daong prein, anek jeng kham merat jang. Di tal bac, anek pang panuac pato; mai sang, adei ta-eng ngak kadha bac, daong amaik ngak bruk sit. Thun bac meng blaoh, adei mek hu angan anek saih bac naih joi, ba mai blah harak meyaom daok mbau pahe mực bahrau. Adei Ngọc Anh brei thau lac: “Anek biak bui kayua amaik oh suhsah rilo ka bruk bayar jien bac. Yaok bilan anek hu daong jien 500.000 dong, anek  kham merat bac biak siam piah harei hadei anek hu alin harak meyaom saong radaih juak. Anek thau dhar phol dom cei boll in bien phong biak rilo lo kayua hu daong prein ka anek bac megru.”

Tukvak tapa, Balai Bien phong Pabah Bambang pakat dunya Xa Mát, tinh Tay Ninh hu peih rilo danak dak sangka bruk daok dang mbang ngui lagaih, pamaong tal rahra baoh sang kan kandah labik tapen negar gah Barak di tinh.

Thieu ta Huỳnh Tuấn Thuần, Phaok Urang Chinh tri labik brei thau, yaok thun balai bien phong srap gap padang jalan ngak, pambuak haong karja bhum palei peih danak dak “Tame harei raya akaok thun Bien phong gheih hatai rahra di palei”, alin kaya ka baoh sang kathaot, baoh sang mbang tui sarak. Langiu di nan, labik khik tani tanat danak dak “Paglaong takai adei nao sang bac”, daong 6 anek saih kan kandah di xa Tân Lập, yaok adei hu meng 500.000 - 600.000 dong/bilan; ngak bruk “Peih saok par ka caong takre” ka 2 adei karei. Bilan Trung thu alin 200 paok pandap ka anek saih; harei 27/7 nao rivang, alin kaya ka 15 baoh sang mbang tui sarak.

Tui Thieu ta Thuần, dom danak dak hu daong mikva tani tanat raidiuk, kak kajap hatai di boll in - rahra: “Hu rilo rahra payua harak, taong phone khan ka kol bleik duas. Tuk mboh labik halei pataom rilo urang, mboh srau kadau atau mbuan rah tabiak duas di tapen negar, mikva jeng khan aval drah ka kapul chuc nang. Meda ndom lac, rahra hu ngak siam bruk khan ka kol duas, gam haong boll in bien phong bad rei tame meraik, pacang khik an ninh dalam mbang tabung glaong ini.”

Brei thau veik, ong Nguyễn Hải Ninh, Phaok Akaok UB Bhap bini xa Tân Lập brei thau, bhum palei urak ini oh daok baoh sang kathaot, rilo meng lac baoh sang jaik kathaot saong kapul baoh sang daok kan kandah njauk hu daong. Yaok thun, xa brei sangka jaik 1.000 baoh sang kan kandah. Ong ndom khang lac bruk pambuak khang di karja saong Balai Bien phong Pabah Bambang pakat negar Xa Mát hu daong paglaong raidiuk rahra.

“Kuhria rah tapa yaok thun, xa ini brei sangka labaih 800-900 paok kaya daong mikva. Dom nan yaom lac rilo min bhum palei daok jaik labik Trung uong Cục, bingun raya tet dom labik bhian nao tal dom labik pahadar saong srap gap bruk daong, gaok mai xa ba tabiak panuac ka hatai caong khin, saong jaik abih jeng hu pabak ginup, daong ka mikva bhum palei.”

Di labik tapen negar, hatai bol lin - rahra oh lac di dom kadha panuac ndom. Nan lac baoh sang hu padang tagok meng bruk klah rabha, lac paok jien pachreih bac daong anek saih hu nao bac, blaoh mbang taong phone, pathau kha dil samu daong khik kajap jalan tapen negar. Dom bruk ngak gandi gandang nan daok brei hatai je saong bruk pambuak pagam dalam yaok baoh sang labik tapen negar gah Pei Meraong./.