Hadei di ribuk ia sua ka 10 saong ribuk ka 11, bruk mbuan tamuh saong pambak jit ruak di kapul anek athur raong daok di tanut glaong, ralo di nyu nan daok hu lac jit aih caraoh chau Phi. Gam haong di nan, bruk pasang iek pajeng ba anek athur hadei ribuk ia sua, ngak hacih sa-at var ro saong ngak hacih sa-at pametai anek ruak gaok rilo kan kandah, rilo meng lac dom baoh sang raong glang takik sit.

Amuk Phạm Kim Dung, Akaok jabat Pajaih – Athur raong, Kuk Raong glang saong Thu y (Mentri Ngak nong saong Alam langik) brei thau, yaom lac yau nan, gah raong glang di nagar Viet Nam jeng khik tani tanat bruk cakrok: taong abih kapul pabui saong menuk ada jeng tagok, dalam tuk kapul kabao, lamo trun takik hasit; rilo saong baoh menuk ada tagok kuhria rag tapa 5–6,5%, pablei tabiak ndap nda raong glang tagok 24,5%, daok blei tame kaya mbang trun labaih 9%. Tui amuk Dung, dom asal kadha kan kandah praong abih urak ini lac tagok trun yaom pandap tamo, asar siam pajaih, jit ruak hadei ribuk… ba tal hatai huac kanda patagok kapul veik.

“Bruk khik kajap gah pabak drei pajaih dalam dom bilan puac thun lac biak hu makna. Dom labik raong glang ye brei padang jalan ngak tabiak, khik kajap taong abih kapul athur, menuk ada. Langiu di nan, khol drei langyah dom asal kadha ka labik hadei ribuk, ia sua, jit ruak brei khik kajap, piah meda hu kein lagaih patagok kapul veik. Kayua urak ini hadei di jit ruak ribuk ia sua brei mboh hatai huac kanda patagok kapul raong glang. Ini lac dom asal kadha khol drei brei langyah di anak meta”.

Ong Đinh Việt Tú, lambaok Chi kuk chat luong Asar siam – Ngak kaya saong Patagok darak pasar labik Meraong negar brei thau: Urak ini yaom ralo pabui khik tani tanat di tanut tani tanat, tagok meng 58.000 dong tal labaih 65.000 dong/kg. Dalam tuk nan, menuk balau sambo bar yaom glaong yaom tagok meng 59.000 tal 63.000 dong/kg kuhria tui yaok bhum. Hatai caong pablei tabiak athur, menuk ada kuhria pathau khan brei tagok khang meng ini lac puac thun saong mek hu tanut glaong di bingun Tet Nguyen dan 2026, tuk hatai caong ngak kaya saong pandar kaya tagok 15–20%. Jalan langyah hu makna daong tani tanat yaom saong paglaong prein meraik gauk di gah dalam tukvak tabung glaong puac thun lac brei patui veik pasang iek siam jit ruak, khik kajap gah pabak tani tanat gam haong nan jhul khang pambuak ngak tabiak, pablei tabiak.

"Pambak tame bruk tagok trun, khol dahlak hulin ba tabiak jalan langyah yau ini: jhul tagok saong peih praong darak pasar, patrun jien padai ngak mbang, tani tanat taong iek yaom kaom saong paglaong prein meraik gauk. Bruk patrun jien buh tame ye sa di dalam dom asal kadha mbaoh tangin brei hu bruk blei tame dalam negar, khin ngak hu ye brei peih praong gah pandap tamo”.

Ong Dương Tất Thắng, Akaok Jabat Raong glang – Thu y (Mentri Ngak nong saong Alam langik), brei thau yam tame klau bilan puac thun 2025, gah raong glang gaok rilo kan kandah, rilo dalam nan meng lac jit aih caraoh pabui chau Phi daok ngak kan kandah tal gah blei ngak pabak. Gah pabak hu pambuak haong bhum palei taong yaom bruk daok rah tabiak, srap gap jalan pacang cakak. Bruk pacang caga jit saong patagok kapul salamat gah sinh hoc hu patagok di Dong Nai saong bhum taneran kraong Cuu Long piah pacang khik bhum pandap tamo, khik tani tanat mon majam ngak tabiak. Gam haong nan, gah pabak daok jhul khang bruk pablei salih, peih praong bruk pablei tabiak ralo menuk ada, ia tasau saong pabui ngak kaya tapa Singapore, Hồng Kông. Ong Thắng ndom mayai lac, brei ngak tabiak saong blei tame piah khik kajap an ninh kaya saong pamaong tal patagok raong glang karo kajap.

“Bahrau blaoh tuk jit ruak rah tabiak di rilo labik gah Meraong negar dom kapul ngak bruk khol dahlak hulin nao tal yaok labik. Dalam nan hu bhum hu makna yau ye Dong Nai piah pacang khik ka ba hu saong hu kein lagaih ngak tabiak. Biak lac meng bruk daok rah tabiak urak ini, khol drei ba drei tame rilo hiep dinh, hu rilo ndap nda khol drei brei blei tame, ngan haong bruk kabao, lamo daok kurang ye anak tal kabao lamo brei hu blei tame”.

Dang anak bruk kateik geik di jit ruak, jien buh tame tagok saong yaom tagok trun di darak pasar, gah raong glang daok yam tame “mbang pakacah” samar chip piah khik kajap hu ginup ralo, baoh menuk ada, ia tasau ka harei raya Tet 2026./.