Hadei di ba pataom, Gia Lai hu peih ngak Festivak “Intan glai ceik – Tasik hijao”. Meng dom canah jalan sit di puk palei, kong caing hu yam tabiak tasik prong, tamia xoang gam haong ma-in gun vo meng kan, menuk am, lisei kreim bhum ceik hu mboh gam haong ikan ya tasik. Akaok kadha di Gia Lai dalam bruk ngak ini nan lac tinh meda pambuak pagam ilamo 2 bhum gah Pai – gah Pur, ralai gam haong asal pambuak pagam haong cak rok patagok bruk rivang ma-in sinh thai, ilamo, dak rai sajarah. Urang dam gheih tangin angan Rcom Bus, daok di ban Pleiku, brei thau:  "Biak bui sambai tuk mbang akaok meti ma-in kong caing di tapain tasik Qui Nhon. Mboh harei raya hu peih ngak biak prong saong biak bui sambai kayua lac khaol dahlak daok pak Gia Lai bhum ceik, pak ini lac Gia Lai bhum tasik nan ye mboh kadha ma-in biak karei jang.”

Tui urang ngak mbang gah jirah rivang ma-in, bruk ba pataom Gia Lai-Bình Định hu mong yau sa jalan ngak piah dak padang gilac hatai saneng ngak brei cak rok patagok. Ong Nguyễn Tấn Thành – Akaok Kapul nyaom Jirah Rivang ma-in Gia Lai (klak) – ndom mayai lac, ini oh njauk lac tok ramik gilac taneh riya karja, bo prong abih jang nan lac peih tabiak sa jalan nao bahrau ka bruk rivang ma-in pambuak pagam labik, patui gauk, palaghaih jang ka bruk ngak. Bruk karei di gauk ka langik tasik saong bilan di tasik saong glai jeng daong ka darak pasar rivang ma-in hu peih ngaak luac thun: “Kayua lac darak pasar hu peih prong tabiak luac thun. Tuk hu jeng sa tinh ye bruk jirah rivang ma-in di dom bilan hu takik manuac urang nao ma-in di Binh Dinh klak gilac lac tukvak hu rilo manuac urang nao jirah ma-in di Gia Lai klak saong mai gilac kayua yau nan ye taduan raok tuai damuai luac thun. Nao sa jalan ngak min hu 2 janih he sinh thai, kayua yau nan ye meda hu rilo bruk ngak brei ka jirah rivang ma-in hu peih tabiak, langiu di nan janih pandap panda rivang ma-in hu rilo jang, daong ka tuai damuai mbuan si palih ruah.”

Jeng yau urang peih ngak bruk rivang ma-in, bhap bani di dom puk palei tinh Gia Lai, meng jalan ngak jirah rivang ma-in tui gah ngak nong – hu takik bhap bani, jeng ba hatai caong khin pambuak pagam haong tasik hijao, ba pandap panda biak karei di drei piah duh ka tuai damuai. Sa-ai H’ Uyên Niê daok di Palei jirah rivang ma-in bhap bani Ia M Nông, xa Ia Ly brei thau, meyah lac karja puk palei biak biai nao gam haong mikva, daong ka mikva peih ngak bruk rivang ma-in dak harei dak gheih ghang jang ye oh kan piah ka puk palei taom gaok hu haong tuai damuai dunya:   “Piah ka nyu siam gheih jang, ta-eng rup dahlak jeng caong khin hu pato pathram piah tuk hu tuai damuai di langiu negar mai, ye bhap bani pak ini meda ngak hu dom janih aia menyum biak laghaih brei ka tuai damuai negar langiu, mboh ralo abih di nyu ieu lac dom janih pandap mbang piah laghaih haong tuai damuai meng nagar Trung Quoc, tuai damuai meng chau Au”

Tui harak Chinh tri caga ba tagok Nyaom roya Ndang mbo tukvak 2025 -2030, jirah rivang ma-in nan lac sa dalam 5 mbaik ghang ngak mbang kinh te di tinh. Jalan ngak cambaih laih nan lac tal 2030 meda taduan raok hu 18,5 triệu mbang tuai damuai/thun. Piah mek hu tanut ba tabiak ini, gah ilamo padhih saong jirah rivang ma-in ba tabiak dom jalan ngak yau pataom tame pacang khik, cak rok patagok dom yaom ilamo, labik ghaih mekre dak rai sajarah. Pataom tame dak padang angan je ka bruk rivang ma-in, pataom tame pambuak pagam gah Pai - Pur, cak rok patagok rivang ma-in tasik, rivang ma-in bhap bani, rivang ma-in mong iek duah thau…

Meda mboh lac, yaom hadei di sa tukvak panak hadei di brei pataom, Gia Lai hu dom jalan ngak biak samar drah: meng peih ngak dom bruk ngak ilamo, pacheih doanh nghiep nao pasang iek, bhap bani ba tabiak jalan ngak saong dak harei dak paglaong bruk ngak jirah rivang ma-in bhap bani, tal bruk ba tabiak jalan ngak atah dhua saong tanut ngak atah dhua. Dahlau di tuk peih ngak Nyaom roya Ndang pakat tinh, Gia Lai hu blaoh blai ka jalan nao bahrau, ba bruk jirah rivang ma-in jeng sa pren khang piah cak rok patagok, ngak brei ka tinh ini hu jeng baoh pasak di bhum taneh Tay Nguyen saong pasak kreh negar./.