Langik laik sup, ong Hrun - urang Bahnar, daok di palei Kon Chrah, xã Hra, huyện Mang Yang, gui paok hareik angaok ka-ing, pateok tapon limo meng puh mai sang. Ong yaih khan lac, tapon limo hu daong ka sang ong tabiak truh kan kathaot:“Tuk camereip dahlak masraiy 30 triệu blei limo. Sang dahlak iek glang hu tapon limo. Tal urak ini, dahlak masaiy veik 50 triệu pala cà phê, harei halei jeng nao glang limo, pamaong tame nan piah hu phun jien biyar saong sangka phun cà phê, tal bilan, dahlak meda biyar jien. Sang dahlak biak chreih chrai kayua hu yam tagok dalam raidiuk. Blaoh palei pasang iek brei ka sang dahlak tabiak truh kan kathaot. Dahlak caong rahra dalam palei jeng khang hatai masaiy jien, piah cak rok patagok bruk ngak mbang dalam sang”.

Di tỉnh Gia Lai, huyện Mang Yang lac sa dalam dom labik hu rilo mikva bangsa takik, meblah 61% dom rahra. Dalam nan, labaih 80% sang bangsa takik lac sang kan kathaot saong jaik kathaot. Amuk Hoàng Thị Lan Anh- Phó akaok UBND huyện brei thau, Mang Yang daok sangka daong sang kan kathaot hu masaiy jien sarak kanja piah ngak mbang, pala drak, raong glang; saong peih ngak dom danak dak pasiam sang taik tahak, daong bac ta-a, daong ka urang kan kathaot yam tagok:“Jalan ngak di huyện dalam bruk patrun kan kathaot lac pilih ruah dom urang hu prein tabiak truh kan kathaot dahlau piah pataom prein tame brei ngak dahlau meng mangaok trun mala; pataom tame bhum kan kandah ye meda hu brei ngak dahlau piah daong ka mikva yam tagok tui samu dom bhum hu siam lagaih. Dom kreih camin ka bruk ngak mbang, pablei salih naih joi jeng hu pathau khan gam gam, dom kapul hu nyaom urang kan kathaot hu brei nao bac megru ilamo meng dom manuac urang dalam huyện, dalam xã ayut saabat, atau bac di langiu huyện, langiu tỉnh piah ka mikva drei hu ilamo, hu hatai jia tame bo yam tagok tabiak truh kan kathaot".

Meng thun 2018 tal thun 2022, piah patrun dom baoh sang kan kathaot khang kajap dalam bhum bangsa takik, tỉnh Gia Lai hu brei ka jaik 18.000 sang kan kathaot, jaik kathaot masaiy labaih 5.400 tỷ đồng meng phun jien sarak piah buh tame ngak mbang, pala drak, pablei salih. Tỉnh hu ba tabiak jalan ngak lac dalam 3 thun anak tal, yaok thun trun 2% dom baoh sang kan kathaot saong trun 3% dom baoh sang kan kathaot lac urang bangsa takik.

Kreih bilan 9/2023, UBND tỉnh Gia Lai hu peih bruk pasang iek saong ba tabiak Jalan ngak 2059/KH-UBND ka bruk peih ngak Danak dak bruk ngak negar Patrun kan kathaot khang kajap tukvak 2021-2025. Tui nan, tỉnh meda daong piah ngak bahrau saong ngak pasiam veik baoh sang ka takik di abih lac 2.000 sang kan kathaot, jaik kathaot; tani tanat ka 98% baoh sang kan kathaot hu pandar ia hacih; jaik abih dom uranaih jeng hu nao tal sang bac njauk umo thun. Amuk Nguyễn Thị Thanh Lịch- Phó akaok UBND tỉnh Gia Lai daok brei lac:“Dom bruk ngak bo kol dahlak mboh siam lagaih nan lac pambuak haong hatai caong di rahra. Pagap yau bruk daong phun pajaih saong pato tacei bruk ngak saong raong glang yau habar; Bruk pambuak tal patrun kan kathaot ka dua veik lac khik ramik dom yaom glaong ilamo cồng chiêng saong brei ka dam dara, ka dom ranaih, adei saai hu mbaok tame dom harei rija ka dom bruk ngak meng kan yau ye jhik manyim, ngak habar piah ka jhik manyim meng kan jeng rilo pandap panda hu pablei tabiak rilo jang veik piah yaih khan jeng ye meda daong ka mikva hu bruk ngak, ba bruk ngak mbang duah jien  dalam rahra”../