Salih bahrau raidiuk meng khang hatai masaiy jien ngak nong, ong Vũ Xuân Huy, ndih tapui thun 1962, daok di palei Breng, xã Ia Pết, huyện Đak Đoa, tỉnh Gia Lai jeng hu sang danaok praong, mekre, raidiuk ginup meda. Ong Huy brei thau lac, meng dom thun 2000, tuk ong daok lac menuac ngak cao su, maong mboh taneh bazan di huyện Đăk Đoa biak siam, mbuan piah pala phun công nghiệp. Nan ye ong Huy khang hatai nao tal Gilang paraik Ngak nong saong patagok palei pala huyện Đăk Đoa masaiy 5 triệu đồng piah pala phun cà phê. Ong khan lac, jien laba meng phun caphe tuk halei jeng tani tanat hu labaih 50 triệu sa ha yaok thun. Hadei di yaok thun ngak, ong blei pabak tame dom janih mac li-ua, mac chai asar ca phe, ngak mblang pabu praong. Ong Vũ Xuân Huy chreih chrai brei thau, ini lac labik piah sang ong hu jien mek tame glaong saong khang kajap di harei hadei:“Rilo thun gam, dahlak pandar phun jien masaiy di gilang paraik, mboh hu kein laba. Jien mek tame di sang dahlak urak ini lac 1,2 tỷ tal 1,4 tỷ đồng, kaoh abih phun jien buh tame daok laba hu meng 350 tal 400 triệu. Danak dak di dahlak lac hu pala gilac veik saong ba phun mbang baoh tame pala pablak”.

Meng dom bilik giao dịch hu mbaok di taong abih 17 huyện, ban sit dalam tỉnh, rilo thun tapa, dom dhar Gilang paraik Agribank di tỉnh Gia Lai tuk halei jeng nao gam haong bruk salih bahrau di gah ngak nong dalam palei. Phun jien ini hu brei mesraiy dahlau ka urang nong dalam palei peih ngak dom danak dak salih bruk ngak nong tui jalan khang kajap jang, yau ye pala veik phun cà phê, peih ngak dom bruk ngak nong đa canh, pala phun chanh dây, phun mbang baoh tui chuỗi giá trị, lagaih haong bruk pablei tabiak negar langiu.

Ong Y Đức Thành - Phó Bí thư huyện uỷ huyện Đăk Đoa brei thau lac, tukvak tapa, rahra dalam huyện hu pambuak haong rilo phun jien piah cak rok patagok bruk ngak nong saong dom danak dak brei masaiy dalam gah ngak nong, palei pala di Gilang paraik Agribank. Ini lac jalan lagaih, lac prein khang, daong ka yaok pluh ribau urang nong kham marat saong khang hatai jia yam tagok ngak kaya mada, meng nan daong ngak brei salih bahrau mbaok mata puk palei di tỉnh:“Tukvak tapa, bruk mesraiy phun jien masaiy hu mbuan lagaih, mikva hu mesraiy samar drah, langyah hu bruk oh masaiy jien laba glaong di gah langiu, daong phun jien piah pasiam veik bein pala, cak rok patagok kinh te saong 3 danak dak praong ka padang ngak palei pala bahrau, cak rok patagok kinh te di dalam bhum, an ninh chính trị hu khik kajap”.

Anak mata mboh lac, phun jien meng Gilang paraik Ngak nong saong patagok palei pala dhar Gia Lai lac jalan praong daong rami ramik veik gah ngak nong di tỉnh Gia Lai. Meng nan, urang nong hu phun jien piah salih janih phun pala, athur raong, pandar công nghệ glaong tame bruk ngak saong cak rok patagok hu siam lagaih dom bruk cak rok patagok kinh te, ngak tabiak hu rilo kaya nong, pandap panda hu yaom glaong.

Bruk salih bahrau di gah ngak nong hu ngak jeng prein khang piah salih bahrau mbaok mata kinh te, xa hoi di bhum palei pala, daong ka puk palei hu pabak prein khang piah cak rok patagok bruk padang ngak palei pala bahrau. Puac thun 2022, dalam tỉnh hu 91 dalam 182 xã mek hu chuan palei pala bahrau saong 2 huyện, 1 ban mek hu chuan palei pala bahrau. Ong Đinh Văn Chinh, akaok UBND ban sit Phú Thiện, huyện Phú Thiện brei thau: “Meng bruk daong abih drei di Gilang paraik saong bruk kham marat di abih hệ thống chính trị, bruk sami samar di rahra daok di ban sit ye tukvak ini mbaok mata ban sit dak harei dak hadah hadai, raidiuk bhap bini hu glaong tagok cambaih laih, dom baoh sang kan kathaot trun 4,2%. Kol dahlak jia lac meda padang ngak ban sit dak harei dak siam makre jang”.

Tukvak tapa, dom danak dak brei masaiy phun jien dalam gah ngak nong, puk palei hu peih ngak samu gauk, bruk masaiy hu samar drah, mbuan lagaih, hu rik daong ka raidiuk urang nong di tỉnh Gia Lai dak harei dak glaong tagok, mbaok mata palei pala dak harei dak hadah hadai./.