Di Kreih apuh kophi praong 8 sao daok di tuk pablei salih, di palei Ia Gri, xa Biển Hồ, tinh Gia Lai, baoh sang bahrau padang di sa-ai Dim mboh gheih takre meng pabung ton, paben sang tak kiak men saong majam bambang nyom kreih bahrau. Sa-ai Dim chreih chrai brei thau, bruk patruh kathaot di drei bahrau meng thun 2021, tuk mesraiy hu 80 trieu dong piah pala 900 phun kophi. Kophi pagam pajaih bahrau, nan tal thun 2023 sa-ai paik hu rilo baoh siam. Thun 2024, yaom kophi tagok labaih rituh trieu dong sa tan, nan jiem mek tame di baoh sang tagok glaong samar, padang hu baoh sang. Maong bein kophi chrai baoh, yaom kophi jeng biak glaong, sa-ai Dim chreih chrai ndom mayai lac:

“Thun anak paik kophi meda tagok meng 200 – 250 trieu dong. Tuk paik saong bayar sraiy di thun anak, caong khin praong abih di baoh sang lac patui veik pandar saong blei khak drak raong phun kophi, banah meteh daok blei yau limo saong dom drei pabe piah raong hlang duah piah duah jien mek tame veik jeng yau pandar khak di limo, pabe piah drak ka phun pala.”

Oh lac sa janih baoh sang sa-ai Dim, yaok pluh baoh sang kan kandah karei di palei Ia Gri, xa Biển Hồ jeng hu pandar phun jien mesraiy meng sarak xa hoi. Baoh sang sa-ai A Yĩu mesraiy 80 trieu dong di thun 2022, tal ini hu jien mek tame ginup piah padang sang bahrau.

 Xa Biển Hồ hadei pagam hu jaik 49.900 urang hu labaih 10.000 baoh sang, dalam nan hu labaih 49% lac mikva urang bangsa takik.Bhum palei urak ini daok 216 baoh sang kathaot saong 805 baoh sang jaik kathaot. Ong Đặng Khánh Toàn, Phaok Akaok UB Bhap bini xa brei thau, jien brei mesraiy tui sarak lac “gai kandeih” daong dom baoh sang patruh kathaot. Meng pandar phun jien siam lagaih tame raong glang, pala drak, yaok thun xa hu yaok pluh baoh sang uak drei tagok patruh kathaot, raidiuk ginup meda, sang danaok laneing lanoi saong raong anek bik mbang bac tal labik tal dhua.

 Kuhria tal ini, taong abih jien brei mesraiy tal bhum urang bangsa takik di Gia Lai hu 2.763 tt dong, hu labaih 63 ribau urang. Dom danak dak brei mesraiy tuk halei jeng lagaih saong njauk haong raidiuk saong pabak hu hatai caong di rahra. Amuk Huỳnh Thị Trà Quế, Yam ndok Jabat Meyao meyit Gilang pariak Sarak Rahra di Paleiku, brei thau piah bruk brei mesraiy mek hu siam lagaih saong rahra pandar phun jien njauk bruk, Gilang pariak daok pambuak haong karja palei saong dom kapul brei mesraiy jien piah tabiak rilo jalan langyah lagaih piah daong mikva. Amuk Huỳnh Thị Trà Quế ndom mayai lac.

“Dahlau di tuk brei mesraiy jien, dom palei atau to bhap bini di Gilang pariak pambuak haong karja palei padang kapul brei mesraiy. Haei nan, mbang akaok meti brei ngak tantu ka njauk urang blaoh patui veik meng brei mesraiy. Hadei mesraiy phun jien, dom urang dalam kapul, kapul brei mesraiy, paglaong bruk pasang iek piah rahra pandar njauk bruk, siam lagaih dalam raong glang, pala drak uak drei tagok patruh kathaot.”

 Gilang jien brei mesraiy jien tui sarak karja brei ka rahra xa hoi hu daong haong bruk patrun kathaot meng luav yaok pluh thun tapa saong tanut brei mesraiy oh padeih peih praong, pabak hatai caong di dom bhum kan kandah. Ngan haong rahra bhum atah bayah, bhum mikva urang bangsa takik tinh Gia Lai, ini lac gai kandeih oh meda kurang hu di bruk patruh kathaot, uak drei tagok ngak kaya meda./.