Thieu ta Nguyễn Thành Nhơn, Urang Chinh tri di Balai tapen nagar Ia Pnôn, brei thau: Ngak tui bruk jak ba di Urang pan bruk di Bol lin tapen nagar tinh, Mentri Pato tacei Bol lin tinh Gia Lai dang padang danak dak peih bruk “Yaok sa adit daong hu sa baoh sang kathaot di bhum tapen nagar”. Tui phun prein hu di drei, khol dahlak gam saong dom ban, dom gah, kapul, karja di labik caik hatai brei daong dom sang kan, brei ngak patagok bruk ngak mbang. 

Meng ini tal puac thun, drei akan daong 11 baoh sang meng bruk ngak cambaic tantu yau ye ramik hacih, daong dom bruk ngak dalam sang, pasiam sang danaok … Daong tame bruk pala drak, raong glang lagaih saong bruk ngak mbang meng anak mata, jaik brei anek bik nao bac magru, dong tame bruk tui sarak karja dalam bruk ngak mbang, dak tuk dak brei salih akaok, daong urang kathaot hu prein tame bruk patruh eik kathaot kajap karo.

Muk Rơ Lan Blê (manek thun 1966, daok di palei Hnap, xa Ia Mơ) mabuh ruak tai bien, oh nao mai hu, daok pasang gait angan Siu Klunh umur taha, kurang prein yava. Dua urang hu ta-eng sa urang kumei umur 13 thun, harei harei nao glang lamo apah daong sang danaok.

Mboh dom bruk kan daman nan, urang jakar, bonlin tapen nagar Ia Mơ mai ramik pahacih sang danaok brei. Gam tui di nan gam saong Polih, Tư pháp xã daong ngak harak kat căn cước rahra, daong brei ngak harak mbang tui sarak karja brei ka urang taha; jeng ye daong alin hadiah kaya brei ka mbang ngui.

Amuk Blê drut druai ndom mayai lac: “Sang kathaot, dua adiuk pasang taha, hu urang bol lin tapen nagar caik hatai iek glang, mai tal sang daong, mbang angui hu yau ini khol dahlak biak uan tabuan”.

Oh po brei yau urang tui umur di drei, dua adei sa-ai Siu Đươm saong Siu Nhăm (palei Klăh) matui amaik ame. Raidiuk biak kan dua adei sa-ai paait panje di gauk pambak tui dom phun pa-aok saong alaok hamu maik ame caik mai. Hamu ye kurang ia ngak hu sa mbang dalam thun. Kayua yau nan ye urang jakar daong kuac ribang ba ia mai ngak hu 2 mbang dalam thun, veih rup dalam rai diuk.

Yao adit, Balai di tapen nagar Ia Mơ brei 7 - 8 urang jakar, urang bol lin gam saong urang bon palei daong urang kathaot yau ye: Pahacih sang danaok, yuak kuak daong, ngak paga, iek apuh cakak, daong ndap nda kaya ngui harei harei … Takik di nyu yaok baoh sang hu brei daong meng 10 - 20 harei tui baoh sang. Gam tui di nan brei caik hatai pambuak saong karja palei, pilih ruak sang, padang bruk ngak, daong yaok janih di nyu, njauk baoh sang njauk urang kan jeng ye ba mai ralo bruk siam lagaih.

Bruk “Yaok sa adit daong hu sa baoh sang kathaot di bhum tapen nagar” hu balai bhum tapen nagar tinh Binh Dinh (klak) padang, ngak meng thun 2023 mbiah tal ini. Hadei di pagam tinh, tinh Gia Lai bahrau hu jalan taneh tinh atah labaih 80km, pambuak saong nagar Campuchia saong jalan tasik atah labaih 108km. Dalam nan, tinh hu 7 xa tapen nagar di taneh 15 xa, phuong tapen tasik, rai diuk mikva daok ralo kan daman.

Kayua yau nan, Ndang uy, Kapul pan akaok Bol lin Bien phong tinh Gia Lai daok ngak dalam bruk “Yaok sa adit daong hu sa baoh sang kathaot di bhum tapen nagar” gam di labik bhum angak taneh gam saong di bhum tapen ia tasik. Tui di nan, tal ini bon lin di tapen nagar tinh Gia Lai daong hu labaih 700 baoh sang kathaot, jaik kathaot abih labaih 800 trieu dong.

Tui Dai ta Rơ Mah Tuân, Phaok Chinh uy Kapul pan akaok Bol lin tapen nagar (Mentri Pato tacei Bol lin tinh Gia Lai) piah ngak hu bruk, Ndang uy, dan saong urang pan akaok bol lin tapen nagar tinh Gia Lai caik hatai iek glang abih dom urang baoh sang dalam bhum palei thau thei kan thei kathaot, jaik kathaot, urang matui, jaoh jo, anek matui oh amaik me, baoh sang mbang tui sarak karja kan taman.  Dai ta Rơ Mah Tuân ndom mayai lac: “Tui bruk ngak ini, Urang bol lin tapen nagar tinh Gia Lai ngak, daok ngak jeng ye patui ngak, neh rabha mikva kathaot di bhum tapen nagar, daong mikva hu prein dang tagok ngak mbang dalam raidiuk truh eik kathaot karo, padang bhum tapen nagar khang kajap kaya mada, daong pambuak kajap urang bol lin dan saong bhap bini rahra di bhum taneh tapen Tanah ia nagar”./.