Di bhum palei tanut palei pala bahrau, dom bein phun hala hijao that rambung gheih ghang, ndung bak ilamo palei pala saong hu biak rilo bruk siam mekre. Rahra di ini brei thau, phun hala hu rak agha di bhum taneh ini labaih 60 thun. Meng dahlau rahra pala rilo meng lac piah pandar ka adat “mbang hala” di rilo amuk kumei taha atau pandar ka brei dalam ndam likhah caga. Hadei ini, hala sula hu pablei di dom darak dalam bhum tinh Hau Giang dahlau diah, Ban raya Ho Chi Minh, dalam nan lac pablei tabiak tapa Campuchia, Đài Loan (Trung Quốc) nan bruk pala sula di Vị Thủy hu patagok khang. Ong Nguyễn Hùng Cường, urang bhap bini rahra Palei sula Vị Thủy ndom meyai lac:

“Di ini hu dom taneh urang pala hala abih, dalam palei sang halei jeng pala nan drei pah urang paik hala biak mbuan. Patui yaom kaom, pagap yau yaom kuhria rah tapa labaih 5.000 dong/ 1 danak (yaok banak 40 hala sula) ye paik sa hajung jeng hu dom pluh trieu, sa bilan jeng hu labaih klau pluh trieu.”

Di Palei hala di vị Thủy, baoh sang pala hala takik di nyu ye jeng hu yaok rituh gok, baoh sang pala rilo hu tal meng 3.000 – 4.000 gok phun hala. Tui yaom yaom jien di tukvak ini, sa kong sula yaok thun mikva hu jien mek tame sang meng 100 trieu dong ba tagok, truh tapa dom janih phun pala karei. Oh lac daong rahra pala sula hu ginup meda, phun sula daok brei bruk ngak tani tanat ka rilo urang ngak bruk di bhum palei meng bruk pala, sangka, paik, dak hala sula pah.

Thun 2019, Palei pala hala Vị Thủy hu mbaoh tangin brei angan lac palei bruk ngak bhap bini meng kal mai. Hadei di nan sa thun, mikva pambuak padang HTX Trầu Vàng hu jaik 30 urang pala jaik 20ha sula. Kuhria rah tapa yaok bilan HTX hu pabak labaih 5.000 – 6.000 banak sula ka darak pasar. Di bingun Tet, hatai caong tagok 3-4 mbang, hu yaom glaong tagok dua mbang dut haong dom harei bhian. Ong Nguyễn văn Đời-Yam ndok HTX Trầu Vàng brei thau:

 “Guol Hala di nyu pagam haong tanarakun lac hu dalam adat mbang menyum likhah caga, harei raya adat blaoh hala sula piah ka urang duh paling dalam dom harei raya, harei Tet. Urak ini So Khoa hoc saong Kong nghe jeng daok mek menyek piah ngak jabon tapao akaok, ia menei ka uranaih saong ia menei ka urang kamei. Urak ini phun hala jeng daok daong patani tanat raidiuk brei ka mikva di ini”.

Bhum palei hu padang Danak dak patagok Palei hala di Vị Thủy jeng labik jirah rivang bhap bini tui jalan gam pala sula, gam ngak jirah rivang me-in. Tuk mai tal ini, tuai damuai brei hu rivang jirah me-in, dom kaya hu angan hu ngak meng hala. Oh padeih di patagok kinh te, bruk ini daok daong khik ramik ilamo bangsa, brei bruk ngak di labik di rahra bhum palei, rilo meng lac urang kamei saong dam dara. Ong Phạm Văn Bằng- Phaok Akaok jabat Ilamo – Rahra xa Vĩnh Thuận Đông brei thau:

“Mikva rahra bhap bini daok di xa Vĩnh Thuận Đông brei mboh phun hala lac hu pala rilo di bhum urang ngak mbang di hamu ngak apuh di bhum palei. Karja palei jeng sangka padang jalan hijao, hacih, gheih piah dui pachreih bruk buh jien tame. Pamaong tal brei pamedeih dalikal brei adat cambat mbang hala meneing, buh jien tame ka thaik thaot alam langik piah rahra mai tal ini rah rivang, pamaong tal brei patagok ka gah jirah rivang bhum taneh urang ngak nong.”

Di raidiuk urak ini, Palei hala di Vị Thủy jeng daok khik ramik sambo hijao siam gheih, khik ka anit ranam saong binguk yava bhum palei. Oh lac ba mai raidiuk tani tanat ka rahra, di ini daok peih tabiak jalan nao bahrau tuk pagam haong patagok jirah rivang bhap bini, daong khik ramik ilamo siam gheih bhap bini. Piah ka sula, brei mboh ka bruk abih hatai tian daok patui veik daok rah rai, kajap tui tui tukvak di bhum taneh anit ranam Can Tho./.