Ban raya Ho Chi Minh meng kal mai hu thau lac “ban rayaa oh ndih” – labik raidiuk bahrau gam saong ilamo bhap bini meng kal. Oh lac “suraga” di ndap nda kaya mbang, labik blei salih saong me-in jirah, ban raya daok pachreih tuai damuai kayua hu majjam inem mek ilamu sajarah, danak dak kien truc sang danaok kalan baha, dom gilang khik piah drap ar hu rilo saong raidiuk seni nghe thuat siam gheih. Kayua meng dom kein lagaih nan brei ka Ban raya Ho Chi Minh patagok majam danak dak ilamo, harei raya luac thun – jalan nao hu maong yau lac “anek kiar” pachreih gah jirah rivang saong khik takai tuai damuai.

Ong Phạm Anh Vũ, Phaok Tong Yam ndok Kong ti Truyen thong Jirah rivang Viet, brei mboh lac dom harei raya ngak tabiak lagaih ka tukvak daong ka gah ngak mbang pablei salih jirah rivang padang ndap nda kadha, peih rilo tour, dui tui hatai caong praong ka pandaok, kaya mbang, me-in, meng nan patagok bruk buh jien tabiak kuhria rah tapa saong tukvak pandaok di tuai damuai. Ong Phạm Anh Vũ khan lac:

 “Meng dom harei raya dalam tukvak tapa meda brei mboh bruk pachreih biak siam ka gah ngak mbang pablei salih jirah rivang. Harei raya Tet Viet atau Jalan bangu Nguyen Hue yaok mbang bel pataih mai jeng sa labik piah mai me-in oh kurang hu. Harei raya Aw dhai ba mai thaik thaot biak gheih, ndung bak ilamo saong dui pachreih tuai damuai. Harei raya dak rilo, khol dahlak hulin dak hu veik asal kadha piah yaih khan, padang ndap nda jirah rivang”.

Dalam rilo thun tapa, Ban raya Ho Chi Minh hu ngak jeng mejam harei raya siam gheih yau ye Raya Tet Viet, Raya Aw dhai, Raya Ahar mi, Raya Kraong ia… brei mboh rilo ilamo saong hadah krah di ban medil bahrau, chreih chrai. Min, tui ong Trần Quang Duy, Yam ndok Kongti Co phan Jitvu Jirah rivang Chim Canh Cut, kein lagaih ka jirah rivang harei raya di ban raya jeng oh ka pandar ka njauk lagaih. “Ban raya Ho Chi Minh bahrau” hadei tuk peih praong labik karja, hu sa ban do drap ar ilamo kan si hu, pambuak haong ban medil – ngak kong – ngak nong – tasik kaoh pulao. Tuk harei raya jeng sa raidiuk, Ban raya Ho Chi Minh brei hu tuk halei jeng hu rilo kadha piah khan saong piah duah thau. Ong Duy brei panuac ndom lac: “Bilan sa saka ia bilan meda nding bak sambo bar haong Raya Tet Viet saong Jalan bangu Nguyen Hue, akaok bilan pandiak lac sa bruk chreih chrai di Raya Aw dhai, kreh thun pok meyaom bruk ngak bhap bini meng kan klak, kaya mbang bhap bini, bilan bhang mai ye hu Raya Raok ikan Ong saong puac thun tanrak hadah gam haong seni jalan medin raya”.

Tui meta maong di urang roh duah, ong Trần Tường Huy, Phaok Jabat Roh duah Jirah rivang Xa hoi jeng taong yaom Ban raya Ho Chi Minh hu ginup ha tang, urang ngak saong rilo ilamo siam gheih piah patagok dom harei raya luac thun. Tui ong Huy, Ban raya Ho Chi Minh ieu lac sabaoh ban medin pataom “drap ar ilamo biak praong” hu sajarah labaih 300 thun – labik hu rilo ilamo ban medin, kaya mbang, seni nghe thuat saong rilo bangsa. Meyah thau pandar ilamo ngak “binguk yava” ka ndap nda jirah rivang, ban raya meda jeng pasak jirah rivang hadah krah dang akaok dalam bhum. Ong Tran Tuong Huy sahaneng lac:

“Sa ban medin chreih chrai yau Ban raya Ho Chi Minh, meyah kurang dom danak dak ilamo bhian ye biak palai jamein. Oh lac sa bilan sa raya bo dahlak sahaneng lac meda hu meng 2-3 danak dak praong sit karei gauk ye siam jang. Tuk nan, ban raya brei hu pabak ndap nda piah pablei ka tuai damuai. Min asal kadha di ini khol drei brei hu dak quy hoach. Khol drei khin patagok hu bruk ngak ilamo, bruk ngak jirah rivang, ilamo ka ban raya ye khol drei brei hu quy hoach mejam harei raya, danak dak. Singapore lac sa bruk pagap, negar ini drap ar hu dahlau ka gah jirah rivang, min negar ini tuk halei jeng hu dom danak dak ilamo dui pachreih tuai damuai saong gam gam hu salih bahrau.”

Ban raya Ho Chi Minh daok hu ginup kein lagaih piah uak drei tagok tal thaik thaot “ban raya hu harei raya luac thun”. Meyah hu dak quy hoach saong yaih khan tani tanat, yaok bilan dalam thun Ban raya Ho Chi Minh jeng hu sa kadha ilamo piah khan, sa labik seni nghe thuat piah diuk saong sa makna piah tuai damuai vaih mai./.