Urang bangsa Cam hu ralo bruk ngak meng tangin muk kei caik mai, dalam njauk bau tal hu bruk ngak gaok glah saong bruk menyim jih dalah. Bruk ngak jih dalah hu anek taco urang bangsa Cam daok khik meng kal dahlau mai jeng ye brei patagok paralo ndap nda di jaman darak pasar harei ini, oh padeih bruk ngak mbang patagok raidiuk baoh sang... Ong Đàng Chí Quyết, Sa urang hu angan di bhum palei Cam, palei Hamu Craok, xa Ninh Phước, tinh Khanh Hoa – sa palei ngak gaok glah meng lavik, khan brei thau lac:

“Raidiuk di mikva Cam palei Hamu Craok ini hu salih bahrau biak rilo hadei 80 thun.”

Mada njauk bau tal lac, dalam jammaah bhap bini rahra urang bangsa takik di nagar drei ye hu urang bangsa Cam lac sa urang bangsa kham marat bac magru, ralo urang bac magru tal dhua tal labik, ralo urang anek taco ralo darah hu kapul daong jien padai pachreih bac magru... Ong Lư Đồng Triển, sa urang gru pato daok di palei Panat, xa Bắc Bình, tinh Lam Dong neh rabha panuac mayai lac:

“80 thun ye drei oh khin ndom, min dahlak hu mboh di tapak mata 50 thun ini mai, dahlau diah palei Cam ini biak kan kandah, hu takik ia nan ngak hamu padai tok hu sa mbang, oh tal ka raidiuk.”

Daok po Adhia Thường Xuân Hữu, Akaok Kapul halau daneng ugama Ahier tinh Binh Thuan klak ini jeng tinh Lam Dong khan brei thau lac, dalam 80 blaoh tapa, langiu di bruk daong ba, brei prein yava jien padai ka mikva urang bangsa Cam ngak mbang patagok kinh te, Ndang saong Karja jeng daok caik hatai dalam bruk khik caga ilamu bangsa. Po Adhia caong khin, Ndang saong Karja daok hu sarak karja brei ka mikva urang bangsa takik di jaman bahrau jaman uak drei patagok di bangsa. 

“Ndang saong Karja brei patui veik sangka tal mikva bangsa Cam.”./.