Bahrau padang labaih 2 thun saong oh ka hu angan kadha kanjah jhak brei ka bruk mbang huak, Sang bac THCS Tân Đông Hiệp B, Ban raya Ho Chi Minh urak ini padang bruk mbang huak brei ka anek saih, oh pandar kaya kan mbang huak ngak salah blaoh meng langiu sang bac ba tame piah mbuan pasang iek kaya mbang saong bruk ging gaok tahanek.

Amuk Trương Thị Ái Thanh, Phaok Akaok sang bac brei thau, sang bac palih ruah labik pabak kaya mbang hu ginup harak gal, hu gok gha cambaih laih; gam haong nan khik tani tanat kapul pasang iek bhian meng bruk taduan pandap tamo, ngak hacih, tahaneh mbang tal bruk rabha kaya mbang huak brei ka anek saih. Meyah mboh hu hagait karei, sang bac brei langyah chip saong pambuak ngan jabat y te tuk caong khin. Tui amuk Thanh, amaik anek saih jeng hu brei kein lagaih hu mbaok tame pasang iek ging gaok tahanek, sang mbang huak, kaya tahanek huak saong ngak kaya mbang:

“Sang bac hu padang sa kapul pasang iek bruk brei tame pandap tamo meda hu nao pasang iek oh brei thau dahlau, pagap yau dalam dom tukvak masa hu rilo bruk kanjah rah tabiak, di dom sang bac daok mbuan gaok kanjah ka ndap nda kaya mbang huak, dalam nan lac di Ban raya Ho Chi Minh, khol dahlak hulin tuk halei jeng thau labik di kongti paje blaoh nao tal nan oh brei thau dahlau, tame piah pasang duah ka gok gha di dom janih kaya mbang huak, tangi sua saong maong iek kaya mbang harei ini kongti pabak ka sang bac lac hu gok gha di dom labik halei mai, nyu yau habar piah hu bruk pasang iek, maong iek hu njauk harak gal hukum blaoh urang mbaoh tangin brei halei atau oh”.

Min, mboh lac rilo sang bac oh hu ganap kein lagaih brei peih sang mbang huak brei ka anek saih ye jeng blei kaya kaya mbang huak tahanek blaoh. Ieu Lac sa labik brei ndap nda kaya mbang huak, amuk Nguyễn Thị Son, Kongti TNHH Pabak brei ndap nda mbang The Caterers brei thau, var mbang huak di sang bac lac gah karei kayua duh sa mbang biak rilo anek saih. Nyu blaoh hu chung ha sit meda kamuh ralo kanjah jhak, susah tal prein yava ka dom adei anek saih. Kayua yau nan ye taong abih luac jalan taduan pandap tamo, khik ramik, ngak hacih, tahanek tal bruk pajeng ba njauk brei hu pasang iek brei ka tani tanat. Amuk Son brei thau, bahrau ini labik hu tut angan pagun sanya saong So Salamat kaya mbang ka bruk khik kajap bruk salamat kaya mbang ka sang bac oh lac bruk tui hukum, blaoh daok lac bruk daong prein piah ka gah ngak mbang pablei salih paglaong tanut asar siam chuan bruk di drei, khik angan je saong brei hatai je saong tuai damuai urang pandar:

“Khol dahlak hulin ngak njau 6 asal kadha di So Salamat kaya mbang pandar piah khik kajap siam kaya kan brei ka urang mbang huak. Patagok dom bruk blaoh drei pagun sanya piah hu bruk je tame di tuai damuai duai suai atah, meng nan angan je di kongti hu patagok, kongti hu rilo tuai damuai khang lập jang”.

Amuk Phạm Khánh Phong Lan, yam ndok So Salamat kaya mbang ban raya Ho Chi Minh brei thau: Bruk kan kandah urak ini ieu lac jalan pasang iek daok hu rilo harak gal, rilo bruk brei khan dahlau yau nan kan si duah mboh bruk ngak chung. Kayua yau nan ye, njauk brei patagok bruk pasang iek oh cang brei thau dahlau patui bruk hu rilo panuac ndom tal. Quyen njauk brei palih ruah labik pabak kaya mbang lac bruk di sang bac, min meyah palih ruah oh hu tantu cambaih laih, klak tapa gah ngak mbang pablei salih hu angan je kayua bruk thau krein menuac urang di drei ye dahlau hadei jeng rah tabiak bruk oh siam lagaih. Bruk amaik ame anek saih hu ndom mayai tal min oh hu langyah ka lagaih, jabat chuc nang brei ngak bruk haong sang bac:

“Gam saong dom kaya kan mbang huak ye khol dahlak hu pambuak gam saong So Pato Megru lac dom kaya mbang that, ralo, ikan, baoh karaok, kaya tasik… meyah khin tame dom baoh sang bac ye brei pabak hu tanut gok gha cambaih laih sang gaok mai mek hu tanut chuan glaong jang di gah ngak nong. Pagap yau lac HACCP, VietGap, GlobalGap, atau majam kaya mbang siam karo”.

Anak mata brei mboh, siam makre brei ka kaya mbang huak di sang bac ieu lac bruk di jabat pasang iek, sang bac, gah ngak mbang pablei salih saong amaik ame anek saih. Bruk hu makna lac pasang iek bhian, oh cang rah tabiak bruk kanjah ka meng kak caga. Tuk yaok bruk hu pasang iek bhian, bruk mbuan njauk ruak mek kaya mbang hu patakik, amaik ame anek saih jeng sahnang hatai jang./.