Dalam baoh sang pakat 4 hu njom iar klak lawik, dom baoh gineng, baraneng, saranai hu tual tapak tape di ganing sang. Urang ngak po di dom ragam ragu nan, ong Thổ Đồng, lac sa urang di dalam dom urang bangsa Cam urak ini daok thau ngak dom janih ndap nda ragam ragu ginang baraneng di bhap bini.

Tui ong, ngak ragam ragu oh lac sa bruk ngak, blaoh nyu daok ieu lac di jalan khik ramik ilamo bangsa. Meng tuk daok sit, hatai chreih takre ginang caing hu mbang tame ralo darah. Kayua yaok baoh gineng, baraneng, saranai oh lac brei ka njauk thaik thaot di nyu blaoh daok njauk sap ragam di nyu. Sap yava nan brei njauk saong yaok adat cambat, yaok labik ginreih, meng adat paling yang di angaok bimong kalan urang bangsa Cam, adat likau hajan tal dom harei raya palei.

Nan kayua lac ilamo meda hu patak pataom meng sa tukvak masa ba drei tame ngak, meng dua tangi hadah saong meng hatai anit ranam ragam ragu bangsa. Kayua meng bruk ngak tani tanat saong tantu yau nan, blaoh harei ini biak daok takik urang daok tui mek hu abih ragam ragu urang bangsa Cam.

Di rilo bhum palei hu rilo urang bangsa Cam daok diuk di Binh thuan klak jaik yau ye daok sa drei ong Thổ Đồng dang bruk ngak ragam ragu ginang caing. Ong Thổ Đồng ndom meyai brei thau lac:

"Meng sit, yaok tuk pang sap Ginang dalam rija, dahlak biak chreih takre…"

Daok di sa palei Cam karei, di palei Lâm Giang (lac pagam dua palei Lam Bal saong Yang Muw), daok di xa Hàm Thuận Bắc, hu sa urang daok gandi gandang sa drei ngak saong pambak tabiak apui ilamo. Sa-ai hu angan ieu lac Mã Châu Xa, sa urang mai tal haong phling ragam bangsa lac oh aval. Dahlau diah sa-ai oh me-in phling ragam halei, min rilo mbang mboh hu harei ngak rija, palei gilac da-a dom urang di palei karei mai taong gineng, yuk saranai hu ngak ka sa-ai mboh suhsah. Meng dom sahaneng yau nan, sa-ai mbaoh tangin duah tal gru ginang angan Thổ Đồng piah bac megru bruk ngak. Meng akaok meti lac bac taong gineng, blaoh rah rah bac megru bruk ngak gineng, saranai. Sa-ai Mã Châu Xa ndom mayai meyai lac:

"Akaok meti ye bac nyu kan….."

Di jalan nao tal ginang caing di sa-ai Mã Châu Xa lac bruk brei mboh ka prein diuk karo khang kajap di ilamo bhap bini bangsa. Mintapi, bruk khik ramik saong pato magru ngak gineng baraneng jeng daok rilo suhsah. Kayua rilo urang praong thun, dalam tuk nan rairah daok sit jeng ye urang dam dara urak ini oh daok mbak sarak saong ilamu ginang caing di bangsa, kayua prein dui pachreih di raidiuk urak ini saong kein lagaih bac megru daok patakik. Kayua yau nan ye bruk khik ramik ilamo brei hu bruk daong prein di dom pakat karja, dom gah ngan haong dom jalan langyah khik ramik saong pato suai atah.