Xa Song Lộc, tinh Vinh Long dahlau diah ieu lac sa labik bhum pala padai. Raidiuk di rahra di ini nao mai jeng maong akaok tame dom mbang ngak padai yaok thun, jien mek tame oh tani tanat, bruk kan kandah tui gam hamiat. Ong Sơn Hải Phong, Akaok kalup kapul bruk ngak pala kruac aik oh hu asar xa Song Lộc, jeng daok hadar dom thun bilan nan brei thau lac:

"Meng tuk daok ngak padai thei thei jeng gaok kan kandah. Blaoh hu Ndang uy, UB Bhap bini xa yaih khan nao rivang me-in, bac megru sua tangi di HTX Ngak nong Thành Chí, blaoh tal rivang iek bruk pala kruac aik oh hu asar pablei tabiak negar langiu gah chau Au di Ban raya Can Tho, mboh bruk siam lagaih biak glaong nan tuk mai sang drei mbaoh tangin salih meng pala padai tapa pala kruac aik oh hu asar.” 

Bruk njauk caik hatai abih di bruk ngak ini hu lac HTX Ngak nong Thành Chí daok di xa Tân An – lac kapul pambuak di urang ngak nong saong gah ngak mbang pablei salih Ha Lan, ba baoh kruac aik oh hu asar Vinh Long yam tabiak darak pasar chau Au. Piah pabak njauk tanut chuan GlobalGAP di darak pasar dunya, HTX peih bruk pato pasram bruk pala drak, tacei ba bruk ngak mbang salamat, pasang iek yaok bruk pandar khak drak saong jru pacang khik phun kayau. Ong Lâm Ngọc Hải, lac sang hu 1,7 ha taneh pala kruac aik daok brei paik baoh, ong brei thau lac meng bruk hu mbaok tame ngak, ong daok hu tacei ba tani tanat meng bruk pala, bruk cakak dhan phun oh siam tal bruk sangka raong phun, gam haong nan hu daong 50 trieu ngak phun jien akaok meti. Ong Hải brei thau lac:

"Drei mbaoh tangin pambuak harak saong HTX Ngak nong Thành Chí, ye hu HTX daong khak drak, pajaih, ilamo pala saong jien padai tagok talei 5 trieu dong/kong. Tuk kruac aik njauk hagait ye drei tyaong phone tal HTX ye gah nan pandar urang mai daong. Ba drei tame HTX ye kruac aik oh duh hatai ka bruk pablei tabiak.”

Panuac ndom mayai “oh duh hatai ka jalan pablei tabiak” – nan lac bruk bo rilo thun pala padai, urang ngak nong oh ka tuk halei khin ndom. Saong dom bruk nan brei mboh ka prein dui pachreih di bruk ini. Meng thun ka 3, kruac aik brei baoh praong, baoh paik hu tui kuhria rah tapa lac 5 tan/kong, kein laba meng 15-20 trieu dong patui tukvak. Meng thun ka 4 ba nao, baoh paik hu tani tanat meng 30-35 tan/ha, kuhria tui yaom pablei kuhria rah tapa 15.000 dong/kg, yaok ha bam ai kein laba labaih 400 trieu dong yaok thun – glaong tagok rilo mbang dut haong pala padai. Ong Phan ĐỨc Tài, Yam ndok HTX Ngak nong Thành Chí, langyah cambaih laih jang ka siam lagaih buh jien tame:

 "Jien buh tabiak ngak meng akaok meti ka 1.000m2 tui kuhria meng 10-13 trieu dong. Min labaih meng 18 bilan lac meda paik baoh hu. Paik baoh dalam labaih meteh thun tal 10 bilan lac khol drei brei mek hu phun jien. Daok kein laba di kruac aik oh hu asar meyah dalam thun ka 3, ye nyu meda hu meng 500-600 trieu/ha.”

Meng jak jeng akaok camreip, Lien minh HTX tinh Vinh Long daok dak harei dak peih praong bruk ngak ini piah padang bhum pandap panda pataom prein tame pabak ka bruk pablei tabiak. Ong Nguyễn Trung Ven, Phaok Akaok Lien minh HTX tinh Vinh Long, brei thau:

"Jalan ngak di gah ngak mbang pablei salih jeng hu panuac caong maong likau bruk daong ba di gah Lien minh HTX, dom so dom gah, jeng yau gah HTX piah daong ka urang ngak nong peih praong mblang taneh pala tal thun 2030. Dalam tinh Vinh Long kruac aik oh hu asar lac 500ha piah duh darak pasar pablei tabiak langiu nagar.”

Jalan ba tabiak tal luac thun 2026, taneh kruac aik oh hu asar dalam tinh hu 250 ha saong patui veik peih praong tagok 500 ha tukvak 2027-2030. Meng dom mblang hamu padai oh siam lagaih thun halei, kruac aik oh hu asar Vinh Long daok ngak jeng asal kadha bahrau di bruk pambuak di hatai je saong caong maong hu yam tabiak darak pasar dunya./.