Oh daok thaik binguk palei pala rambah rambup dahlau, Ia Nueng harei ini cuk angaok rup drei sa blah ao bahrau ngan haong dom canah jalan mbe tong hacih sa-at, dom baoh sang khang kajap gheih mekre, min jeng daok tamo suan yava di sa puk palei Tay Nguyen meng kan. Labik ini, urang Jarai meblah jaik 97% bhol bhap, mek hu tanut chuan palei pala bahrau kieu mau meng thun 2019. Yam tapa dom pambak di ban hoa, Ia Nueng jeng daok khik hu janih meng kan ngan haong haong dom inem krung ilamo meng kan biak siam gheih. Sa-ai Thien, Akaok palei Ia Nueng, oh paduak hu kadha hadah mbaok hadah meta di drei tuk ndom tal dom salih bahrau angaok bhummi:

Tukvak tapa, gom, jalan, sang bac, balai iek ruak dak harei dak padang ngak bahrau ralo siam mekre, jalan mbak nao mai dalam palei dak harei dak hacih sa-at, bruk nao mai di mikva jeng mbuan laghaih jang. Tapa bruk padang ngak palei pala bahrau, rai diuk di mikva hu patagok mboh di anak meta. Baoh sang kathaot patrun, baoh sang kaya meda patagok. Bhap bani dalam palei biak jia tame bruk pal akaok di Ndang saong Karja. Mikva khaol dahlak biak chreih chai bui sambai.

Dalam dom mbang pataom nyaom dalam palei, tuk hu khan brei thau ka jalan ngak dak padang palei rivang ma-in bhap bani, bhap bani Ia Nueng jeng brei mboh kadha bui sambai saong njauk hatai glaong. Taha akaok palei Hmrik brei thau: Bhap bani bui sambai rilo, thei jeng caong khin hu rik daong pren yava di drei peih ngak jalan ngak hu ba tabiak nan. Mikva sanya hu mbaok tame ngak meng bruk sit di abih yau khik ramik labik daok, puk palei ka nyu hacih sa-at, pala bingu di dua gah jalan nao piah ngak jeng labik gheih mekre. Caik ka palei Ia Nueng hu yau harei ini jeng hu bruk rik daong di taha Hmrik, yaom lac umo labaih 77 thun, min taha jeng abih hatung hatai nao pathau khan, jak ba mikva Jarai tah klak dom adat cambat tanarakun meng kan oh daok laghaih haong jalan diuk rai bahrau harei ini, jak gauk dak padang rai diuk ilamu, khik ramik saong cak rok patagok asal ilamo siam gheih di bangsa.

“Mboh biak hadah mbaok hadah meta kayua lac rai diuk di bhap bani hu cak rok patagok. Jalan mbak nao mai dalam palei hu siam mekre, nan lac bruk sangka di Ndang saong kham merat di bhap bani, pambuak bruk nao mai biak catang di Ndang haong Raja-ei bahrau meng hu yau harei ini”.  

Yau ye panuac di urang taha akaok palei Hmrik ndom, Ia Nueng harei ini oh lac tok hacih sa-at bo daok lac labik khik ramik dom yaom ilamo meng kan yao klak, ngak mebuk hatai di urang tuai damuai. Nan lac dom phun nda yao klak yaok dom rituh thun, baoh bingun aia meng kan, dom baoh sang tol saong sang rong tamo. Abih di nyu, labik ini daok khik ramik biak siam inem krung ilamo oh mboh di meta. Palei urak ini hu labaih 5 mejam kong chieng, hu pandar dalam dom harei roya yau ndam lakhah, ndam metai, adat brei thau jeng manauc jeng urang... Gam haong di nan, lac dom palei ngak meng kan yau pak bak, ngak rup patau, menyim jih dalah jeng hu dom baoh sang khik ramik.

Daok gah karja puk palei, jalan ngak cak rok patagok Ia Nueng jeng palei rivang ma-in bhap bani daok hu xa Bien Ho peih ngak biak khang. Tui ong Đặng Khánh Toàn, Phaok akaok UBND xa, palei Ia Nueng hu ginup kadha piah jeng palei rivang ma-in bhap bani dalam cak rok patagok, meyaih khan bruk rivang ma-in:

“UBND xa Bien Ho khan brei ka So Ilamo, Padhih saong Jirah Rivang ma-in ba palei Ia Nueng nan lac sa di dalam dom palei ilamo jirah rivang ma-in di urang Jarai hu jeng palei hu sap ndom dalam dom palei rivang ma-in di Viet Nam harei ini. Khaol dahlak hu padang ngak saong pacang khik bingun aia, khik ramik sang kabo piah kham merat ba palei Ia Nueng jeng palei rivang ma-in bhap bani”. 

Jalan padang ngak bruk jirah rivang ma-in bhap bani nan lac sa jalan ngak atah. Ngan haong bruk njauk hatai di bhap bani, bruk peih ngak bruk khang di karja, gam haong gilang ilamo Jarai biak hu yaom daok hu khik ramik, cak rok patagok, jia lac palei Ia Nueng avan hu jeng sa labik rivang ma-in biak gheih mekre angaok mbang ndo Tay Nguyen, ngak brei paglaong jien mek tame saong rai diuk, biak njauk haong angan iew palei pala bahrau kieu mau ka gah khik ramik ilamo saong cak rok patagok khang kajap./.