Padai hareik ngak kanjah jhak ka dom negar ngak padai di chau A. Di Viet Nam, padai hareik pataom rilo di Bhum taneran kraong Cuu Long saong Bhum taneran kraong Hong. Urak ini oh kuhria hu ginup ka khat lahik biak ralo brei ka padai kayua hareik. Sa asar padai hareik meda daok dalam taneh meng 2 tal 12 thun saong tok khin sa asar daok kandaong hadei yaok mbang pala jeng meda tamuh jeng yaok rituh asar hadei dom mbang pala.

Bruk tamuh praong di padai hareik lac kan kandah praong ngan hoang jalan patagok karo kajap di gah padai hareik. Bruk pasang iek padai hareik hu maong lac sa bruk ngak hu makna, pagam haong jalan pacang khik padai brah saong angan je brah Viet Nam. Kayua yau nan, rahra brei pandar pajaih hacih, hu thau mai meng halei, iek asar siam. Roh duah ruah pajaih padai pacang hu hareik saong luac jalan pala drak lagaih haong yaok bhum sinh thai. Tien si Nguyễn Thế Cường, Jabat padai Bhum taneran kraong Cuu Long brei thau: "Dahlau diah khol dahlak roh duah akaok meti ka padai hareik labaih thun 1994 – 1995, tukvak nan mikva bhian caik pajaih, ka dua lac yuak meng tangin, trun pajaih meng tangin, bruk hareik tamuh oh ka rilo. Min hadei ini tuk khol drei hu mejam ngak pajaih padai, blaoh jamraik juak padai hu di dom thun 2000 tal ini ye padai hareik tamuh biak rilo".

PGS - TS Trần Vũ Phến, Sang bac Ngak nong, Dai hoc Can Tho brei thau, langik salih karei oh lac ngak kan kandah tal phun padai bo daok jhul tagok bruk patagok samar di padai hareik saong dom janih hareik karei. Jalan pasang iek hareik karei tui jalan kuhria taong abih, siam mekre haong alam langik lac salih phun pala tui bilan lagaih di sa bhum taneh, pambuak pagam bruk pala padai – raong hadang, pala padai – raong ikan piah taong tayah bruk tamuh tabiak di padai hareik. Gam haong nan, ruah dom pajaih padai khang kajap, cak rok samar, meraik haong hareik karei, lagaih haong pandiak bhang, njom lakhun.

Langiu di nan, bruk rilo gah sinh hoc, roh duah dom pajaih padai mbuan pacang hu hareih jeng hu maong yau lac jalan nao karo kajap suai atah. PGS - TS Trần Vũ Phến jeng ndom mayai lac, brei ba tabiak jalan tacei ba ky thuat ka gah pasang iek hareik taong abih lagaih haong langik salih karei, gam haong nan daong roh duah, salih pajaih padai mbuan meraik gauk glaong haong padai hareik: " Ruah pajaih hu prein meraik khang, asar pajaih khang kajap siam, bruk ini dreih danak dak bahrau ini di drei, lac pasang iek prein yava phun pala taong abih. Tal bruk iek hamu padai atau pasang iek taneh ye pambuak tal asal kadha ngak habar khol drei oh luai ka bruk pataom di asar hareik hu dalam taneh tagok, bo tui jalan lac rah rah patrun tui tukvak".

An Giang hu taong abih taneh pala padai praong di abih dalam negar. Kayua yau nan ye, yaok bilan, mbaok taneh njauk kanjah jhak kayua jit ruak karei gauk, min hareik lac sa dalam dom bruk ngak patrun padai saong asar siam padai. Ong Lưu Minh Tuấn, Chi cuc pala drak saong Pacang khik phun kayau An Giang brei thau, makna lac pasang iek hamu padai saong langyah hadei mbang yuak padai oh njauk ilamo. Dom ndap nda vi sinh, jru hu yaih khan rilo min oh hu bruk pasang iek tantu lagaih. Jalan langyah ka hareik lac ngak hacih sa-at hamu padai hadei yuak kuak: "Tacei ba urang ngak nong hadei tuk buac klak padai hareik blaoh langyah habar piah ka nyu takik tamuh veik. Daok kadha ka dua mbang pala ye ndom meyai haong urang ngak nong plue hareik tagok piah lam dar, oh pachreih bruk pruh jru ka hareik metai, lac pruh sa mbang blaoh njauk njom veik nan plue tagok sa mbang blaoh lam dar."

Dang anak di dom kanjah jhak di padai hareik, brei samar padang danak dak pasang iek biak siam lagaih, dalam nan thau cambaih ka pajaih dahlau tuk pabak ka urang ngak nong. Bruk pasang iek jit ruak saong padai oh lac daong tani tanat bo daok lac takai yam hu makna dalam bruk ngak Danak dak 1 trieu hecta padai di bhum Taneran kraong Cuu Long, pmaong tal ngak tabiak padai karo kajap, salamat./.