“Peih ngak bruk likei kumei yau samu gauk jeng ye lang yah bruk kumei saong uranaih” di danak dak ka 8, Kapul urang kumei di tỉnh Tuyên Quang hu pataom prein tame peih ngak 570 puk palei di 121 xa bhum mikva urang bangsa takik di dalam tỉnh. Piah peih ngak hu siam lagaih Danak dak, dom pakat kapul urang kumei tỉnh Tuyên Quang hu padang ngak jaik 340 bruk ngak kapul dakwah pathau khan ka rahra, hu mbaok tame gam urang likei saong kumei. Meng tuk hu kapul pathau khan ka rahra ka bruk urang likei saong kumei samu gauk, padang ngak labik daok salamat ka urang kumei saong uranaih hu jhul khang.

Amuk Bà Hoàng Thị Lan Anh, Phaok akaok Kapul urang kumei xã Hùng Đức, huyện Hàm Yên brei thau lac, bruk padang ngak Kapul dakwah pathau khan ka rahra nan lac pathau khan, jak ba rahra salih jalan sahaneng, jalan ngak, yah klak dom bruk sahaneng oh njauk ka urang likei atau kumei, adat tanarakun dalam sang saong dalam bol bhap rahra: 

“Bruk padang ngak kapul pathau khan ka rahra ini meda daong ka bruk pathau khan ka dom urang dalam kapul saong ka rahra meda thau cambaih jang ka bruk urang likei saong urang kumei samu gauk saong klah rabha daong ba gauk ba tal bruk pasamu gauk dalam raidiuk, mbang ngui dalam sang ngak jeng sa baoh sang sampurana selamat trei sir, haniem phul.”

Di pak xã Hùng Đức, huyện Hàm Yên, Kapul urang kumei tinh hu pilih ruah palei Khuôn Then ngak ieik Kapul dakwah pathau khan ka rahra. Kapul hu 8 urang lac dom urang ba akaok nao dahlau saong meda hu prein pathau khan, jak ba. Saai Vi Thị Xuân-lac sa urang dalam Kapul pathau khan ka rahra di pak palei ini brei thau lac:

“Tapa var dakwah pathau khan meda hu daong ka drei jeng thau cambaih jang hu bruk urang likei kumei samu gauk saong pacang caga bruk taong paoh gauk dalam sang, daong khik urang kumei saong uranaih, ye taeng di dahlak jeng meda pathau khan ka abih rahra dalam puk palei thau cambaih ka bruk urang likei kumei samu yau gauk, gam haong khik ka uranaih saong urang kumei piah pacang caga bruk taong paoh gauk dalam sang di dalam puk palei.”

Langiu di bruk padang ngak Kapul dakwah pathau khan ka rahra, dom pakat kapul urang kumei tỉnh Tuyên Quang daok padang ngak bahrau jaik 30 bruk padang ngak labik njauk jia tame piah langyah dom bruk kamlah gauk, daong ka dom urang njauk bala di bruk taong paoh gauk dalam sang. Gam tui di nan, Kapul urang kumei tỉnh Tuyên Quang hu pambuak haong dom sang bac padang ngak dom kalup kapul “urang pan akaok di bruk salih bahrau”. Ini meda ieu lac sa labik ma-in biak sambai, lagaih brei ka dom adei dalam bruk peih ngak brei urang likei kumei samu gauk, rik tame langyah dom bruk samar drah ngan haong uranaih di bhum mikva urang bangsa takik.

Adei Hoàng Thị Khánh Huyền, anek saih bac di Sang bac gam bac gam daok ATK huyện Sơn Dương brei thau lac: Hu mbaok tame kalup kapul, adei saong dom ayut saabat hu ba drei tame ma-in bui sambai, hu bac ilamo ka hatai sahaneng di mban umo thun, ka urang likei atau kumei. Langiu di nan, adei daok hu ilamo, thau jalan khik ka drei piah khang kadang jang yam tame harei hadei meng anak:

“Hu mbaok tame kalup kapul hu daong ka adei thau hu ka bruk tok gauk, ka bruk taong paoh gauk dalam sang bac, taong paoh gauk dalam sang pathhau khan ka dom ayut saabat dalam sang bac, dalam sang plaih nyaih hu bruk taong paoh gauk dalam sang.”

Kalup kapul “urang pan akaok di bruk salih bahrau” ieu lac sa dalam pak bruk ngak di Danak dak ka 8 “peih ngak bruk urang likei saong urang kumei samu gauk saong langyah dom bruk samar drah ngan haong urang kumei saong uranaih”. Anai gru Lý Hải Vân, Sang bac bangsa gam bac gam daok ATK huyện Sơn Dương brei thau lac:

  “Dahlak meda pasram ilamo ka dom adei dalam kalup kapul piah ka dom adei meda pathau khan ka dom ayut saabat dalam sang bac jang yau pathau dom ilamo ka gauk gar dalam sang, ka ayut saabat jang yau tuk mai tal bhum palei ye jeng hu dom bruk ngak siam lagaih piah rik tame ka rahra.”

Bruk padang ngak kalup kapul hu rami ramik ka anek saih bangsa takik hu rilo ilamo, rilo bruk ngak lagaih jhul pakhang ka bruk dom adei ndem tagok panuac ndem, hatai sahaneng di drei, salih jalan sahaneng, jalan bac, jalan ngak saong rik tame yah klak dom bruk bhian randap, dom adat cambat oh daok lagaih di bhum ceik glaong. Urak ini, dom Kalup kapul ini hu rik tame peih ngak siam dom danak dak, sarak, langyah dom bruk pambuak tal uranaih; daong ka dom gru pato saong amaik ame peih ngak siam bruk pato pakai ka anek bik di drei saong pacang caga dom bruk taong paoh gauk, rapeik rapai, pablei salih, cap mek, tok gauk tuk ka oh tal umo thun, tok gauk dalam but pajaih di uranaih,../.