Labaih 2 adit hadei di tuk mblang kapal ahaok par Liên Khương brei gam bambang padeih piah pasiam, pakajap, di Labik pataok radaih pambuak tinh Da Lat, radaih pajeng tuai tame tabiak di yaok harei melam. Gam tui di nan dom radaih o to ta-eng menuac urang meng di dom tinh, ban, yau ye: Da Nang, Khanh Hoa, ban raya Ho Chi Minh nao tal Da Lat jirah rivang, ngak bruk, adei Trương Hoàng Phú Minh saong Phạm Nguyễn Kim Ngân ndom mayai lac, nao Da Lat meng jalan radaih jeng lac sa bruk rah rivang chreih mekre:

“Adei mboh nao meng jalan radaih biak siam kayua urak ini hu rilo gah radaih duh tuai biak siam yau nan ye adei mboh takre hatai. Daok bruk kakei blei harak radaih urak ini ye hu app kakei blei daong biak rilo yau nan adei kakei blei biak mbuan sahnang”.

“Meyah nao mai yeng yeng meng Da Lat trun Sai Gon atau meng Da Lat nao Nha Trang ye adei mboh nao radaih mboh biak lagaih jeng ye mboh bruk nao mai meng radaih ngak ka drei mboh jirah ini diah chreih makre jang oh hu hagait lac kan kandah”.

 Piah palagaih haong bruk oh hu mblang kapal ahaok par saong oh brei patakik tuai damuai jirah rivang mai Da Lat, karja dom Phuong pasak di Da Lat, dalam nan hu: Xuân Hương – Da Lat; Lâm Viên – Da Lat; Cam Ly – Da Lat saong Xuân Trường – Da Lat hu brei samar drah salah blaoh, pasiam jalan mbak saong pasiam lagaih dom jalan mbak di dom jalan di Da Lat. Gam tui di nan, padang rilo mblang payua radaih daong brei kein lagaih ka tuai damuai saong plaih bruk gar jalan.

Ong Đặng Đức Hiệp, Bi thu Ndang uy Phuong Xuân Hương – Da Lat, brei thau, meyah khik tani tanat hu siam mekre, salamat, gheih ghang, jalan mbak lac sa tanut hu pabak ka gah jirah rivang Da Lat:

“Kapul bol lin Kong an ngak siam bruk tacei ba meng bruk yaok urang bol kong an lac sa urang tacei ba, lac ayut nao pagam haong tuai damuai juai luai ka tuai damuai mboh huac tuk peih nduac radaih angaok jalan tagok Da Lat, peih nduac radaih dalam Da Lat. Khol drei ngak ka Rahra, ka bruk patagok di dom bhum palei saong patagok di gah ngak mbang pablei salih piah khol drei hu sa hatai sahaneng, hu thau  ka bruk di drei piah ka tuai damuai jirah mboh sahnang hatai tuk nao tagok trun Da Lat”.

Bruk gam bambang kapal ahaok par Liên Khương tui jalan ngak njauk ngak klaih klaoh hatai caong nao mai di labaih 960 ribau mbang tuai damuai nao mai tal Lam Dong. Gam haong langyah sa bruk kadha jalan ngak saong paglaong asar siam jitvu pajeng ba tuai damuai di jalan mbak, dalam tuk mblang kapal ahaok par gam bambang, gah jirah rivang Lam Dong jeng jhul khang dom danak dak pachreih, peih rilo danak dak ilamo, pahat padhih saong jirah rivang dui atah luac bilan pandiak. Tinh sangka iek praong dom ndap nda jirah rivang katut panak harei, tour puac adit, tour padeih padei pandiak, rivang iek ilamo saong kaya mbang di bhum palei… piah ngak jeng prein dui pachreih bahrau ka labik jirah piah salah blaoh jalan kuhria raok 25,8 trieu mbang tuai jirah mai tal Lam Dong dalam thun 2026. Amuk Nguyễn Lan Ngọc, Phaok Yam ndok Soi Ilamo, Pahat padhih saong JIrah riavang tinh Lam Dong, brei thau:

“Khol dahlak hulin padang dom danak dak tour luac jalan rah rivang brei ka tuai damuai nao angaok dom jalan mbak brei bruk bahrau ka tuai damuai. Khol dahlak padang danak dak Bilan jirah rivang bilan pandiak pataom tame rilo danak dak meng bilan 4 dui atah tal bilan 8. Gam haong nan bilan 5 jeng brei kuhria ngak Danak dak Harei Ilamo jirah rivang Lam Dong di Ban raya Ho Chi Minh”.

Dalam tukvak masa salih bahrau ini, gam tui dom jalan langyah lagaih, jirah rivang tinh Lam Dong daok kham merat khik tani tanat prein dui pachreih di labik mai jirah rivang, piah ka dom jalan mbak jeng patui veik ba tuai damuai mai tal Da Lat bhum ribau bangu./.