Yaom lac tame thun umo taha oh hu ralo urang do, min yaok harei ong Mấu Hồng Thái daok kham merat krih yaok gal phun la-a, krih yaok mbaik kayau piah ngak yot ngak yot, ngak mbram ngak thruk, ngak ragam ragu… Dalam baoh sang di drei, ong Thái daok ruah dom mbaik kayau phun lo o labaih 1 thun, hu brei pambu 25 – 30 mbang pandiak blaoh tani tanat pahaluh gilaong, ngak jeng majam talei ragam ragu di angaok mbaik kayau lo o.

Tui ong Thái, dahlau diah, urang likei Raglai hu maong jeng menuac jeng urang lac tuk urang nan thau pak yot nao apuh, thau ngak thruk mbram piah nao amal, thau ngak ragam ragu, thau ngak kadait piah nao me-in adaoh tamia. Thei pak hu baoh yot gam gheih gam kajap, ngak hu thruk, ngak hu mbram nao mal patiaok hu rilo athur glai, ngak chapi, kadaih kadaoh hu yava sap gheh ye hu rilo anek dara caik di tian. Piah meda ngak tabiak dom baoh yot, mbaik thruk, ragam ragu chapi, bruk kan abih di ong Thái lac bruk duah hu janih ndap tamo njauk hatai.

Langiu di ragam ragu Chapi, ong Thái daok thau ngak kadait kadaoh, pak yot, ngak thruk, ngak chruk ngak mbram. Dom ragam ragu, ndap nda ngak meng tangin di ong Thái ngak tabiak lac dom kaya pandar bhian di urang Raglai, min tui bruk cakrok patagok di xa hoi, urang Raglai urak ini takik pandar. Dom urang thau ngak dom ndap nda kaya ini rilo meng lac urang taha, min jeng daok biak takik urang thau.

Urak ini, lac daok biak takik urang thau ngak dom ndap nda bhap bini ngak meng tangin. Nan dalam tung tian ong taha tuk halei jeng suh sah, ngak yau habar piah pato padar bruk ini ka rairah dam dara. Kayua yau nan, thei hu hatai caong ngak ragam ragu Chapi atau dom ndap nda bhap bini karei, ong Thái jeng bui sambai pato brei.

Ong Thái ndom mayai lac: “Rilo dam dara hu drei pato bruk ngak ragam ragu Chapi jeng hu thau ngak. Hu dom dam dara tuk ngak hu blaoh, ba mai ka drei maong tapa, me-in iek dahlau, drei mboh njauk hatai lo”.

Tuai damuai hu mai tal Palei ngak jirah rivang Hòn Dung, rivang labik pablei ndap nda inem krung di baoh sang ong taha palei Mấu Hồng Thái katuak tuk pang ong me-in dom ragam ragu di urang bangsa Raglai yau ye: Ragam ragu Chapi, kadait kadaoh. Ini jeng ieu lac janih ragam ragu kayua ong Thái ngak tabiak. Langiu di 2 janih ragam ragu ini, ong Thái daok ngak rilo ndap nda karei meng tangin yau ye: Yot, mejam thruk di urang Raglai.

Di 4 janih ndap nda bhap bini ngak meng tangin kayua ong ngak tabiak, dalam nan hu ragam ragu Chapi, kadait kadaoh, mejam thruk hu angan Hồng Thái jeng hu brei angan ndap nda OCOP 3 patuk. Ong Thái lac: “Dahlau diah, ong oh ka mbak sarak bruk tut angan ndap nda OCOP. Yaok mbang hu kapul tuai damuai mai jirah rivang, blei dom ndap nda drei ngak tabiak, ong biak bui sambai saong sahaneng lac piah brei mboh asar siam duh ka tuai damuai, drei brei khang hatai tut angan ndap nda OCOP. Meng nan, dom ndap nda bhap bini di urang Raglai hu thau tal rilo jang, hu prein pambak praong khang jang dalam bhap bini”.

Jeng hu dom bruk ngak meng tangin gheih ghang, dom ndap nda di ong Thái ngak tabiak hu rilo janih thaik thaot, praong sit. Yaok mejam ndap nda hu yot, thruk, mbram, rabap Chapi patui praong sit di nyu saong pandar ka bruk hagait, hu yaom meng 750.000 ndong tal 1,5 trieu dong.

Ong Nguyễn Ngọc Hải, Phaok Akaok UB Bhap bini xa Khánh Sơn brei thau: Urak ini, bhum palei hu 9 ndap nda OCOP, dalam nan hu 1 ndap nda OCOP 4 patuk saong 8 ndap nda OCOP 3 patuk. Bruk hu makna lac, 4 ndap nda OCOP 3 patuk hu angan Hồng Thái di po di nyu lac urang bangsa takik. Dom ndap nda ini hu ba tame duh ka yulit bhap bini palei Hòn Dung piah khik ramik saong patagok dom ilamo siam gheih bhap bini bangsa Raglai./.