Dalau diah, di ralo bhum palei urang ngak nông hu ralo urang bangsa Khmer daok, jalan mbak nao mai daok ralo khan kandah. Dom baoh jalan haluk gluh baok dhun mun nao man gak gar kan brei ka bruk pajeng ndap nda kaya kan, ralo di nyu mboh hu di bilan hajan hangin. Ông Thạch Bông sa urang bon di palei ndom mayai lac:

"Dalau diah di mbok ar ini oh hu jalan, hajan trun ye glut baok, hareik harom bak katian…"

Urak ini, jalan praong labaih 3 mét, atah 1 km, hu buh prein brei padang ngak gheih ghang oh atah suai di ini meng phun jien di Danak dak akaok bram nagar padang palei ngak nong barau, hu daong ông Thạch Bông jeng ye mikwa palei Trà Bết, xã Ngọc Tố, ban Cần Thơ lagaih laguo dalam bruk nao mai, patagok kinh tế gah ngak nông. Ông Thạch Bông brei thau:

"Biak uan tabuan. Jalan barau ngak siam, saat cih. Di ini hu pala janih njam patam, meng tuk hu jalan, urang blei salih mai blei tal labik. Dalau diah di mbaok ar ribaong kênh ini hu dom tadai tuan meng hala kayau, urak ini mikwa padang sang danaok gheih ghang khang siam jang, guh diah daok ngak sang ralo jang."

Atau ye di palei Rạch Rê, xã Mỹ Tú, ban Cần Thơ, luac dom thun blaoh, baoh catua sit sot, mblaing mblang ngak ka ralo mikwa duh hatai. Tal yaok bilan hajan nao mai kan daman; anek saih nao mai sang bac susah, ndap nda ba blei pablei oh sannang.

Meng puac thun blaoh, catua barau meng padang blaoh gheih ghang, khang kajap, praong 3,5m, atah labaih 26m, duh brei hu dom chruh radaih ô tô praong meng 16 urang daok trun, jien buh tame labaih 350 triệu đồng hu peih barau jeng ye ba tame pandar, pambuak dua baoh ar kraong ribaong, peih tabiak ralo bui sambai hatai jia brei ka bhap bini rahra palei. Meng bui sambai kayua hu catua barau, raidiuk ngak mbang daok dang  nao mai bac magru jeng ye patagok kinh tế – xã hội di mikwa hu brei peih hala baar barau gheih ghang ralo. Muk Lý Thị Diệu, urang di palei Rạch Rê, xã Mỹ Tú, bui sambai lac:

"Dalau diah catua nao mai daok sit, mbok glaong, nao mai kan kandah, ralo di nyu brei ka uranaih anek saih; hajan ralo mabuh. Tuk ini hu cataua barau, biak bui sambai. Mikwa di ini thei thei jeng uan tabuan bui sambai, jak gauk mai peih barau. Catua praong nao mai mbuan sanang jang."

Sang di saai Lý Đương, di palei Bưng Cóc, xã Mỹ Hương, langiu ngak hamu padai, sang di saai daok pablei salih njam patam. Saai Đương sambai mayai brei thau, urak ini jalan thuan nao mai hu brei ngak gheih ghang siam makre, radaih ô tô, radaih hu mai tal hamu apuh blei njam patam baoh karaoh, oh daok cang gilai ghe tapa gluh bao kia njuh yau dalau.

"Hu hatai ieik glang di Đảng, Karja dil sumu ngak pasiam jalan thuan, daong mikwa pajeng ba ndap nda kaya lagaih jang, blei salih lagaih sanang jang jang."

Jalan mbak lagaih laguo oh sa janih brei ka kein lagaih brei ka ngak mbang blei salih blaoh nyu daok dui panak ilamu palei ngak nông saong ban sit ban praong jeng ye meng bhum palei ini song bhum palei diah. Dom jalan mbak harei ini peih tabiak Dom jalan palei harei ini daok peih tabiak ralo hatai jie, peih jalan harei meng anak dah hadai brei ka phum sóc Khmer./.