Bahrau aval hadah page , mikva rahra daok di xa Thái Trị, tinh Tay Ninh hu mbaok di labik pataom piah hu pasang iek ruak, taong ruak oh mek jien. Di angaok mbaok meta yaok urang jeng brei mboh hatai chreih chrai, coang maong. Javap calei gilac, dom palak tangin hu ngak meng abih hatai hatian di bac si, dom cambuai klao jaik taphia di bol lin hu ngak sahnang hatai, je tame, piah rahra oh tok lac sangka prein yava, bo daok lac hu klah rabha, rik daong. Ong Nguyễn Văn Thảo, xa Thái Trị, tinh Tay Ninh ndom meyai lac: “Bruk daong di kapul lin urang pan phao karaong tinh Tay Ninh daong mikva di ini, daong taong ruak, brei mboh hala siam papaok hala taik, khol dahlak hulin biak thau dhar phol. Mikva jeng caong khin Bol lin daong ka mikva drei”.

Daong gam saong kapul lin urang pan phao karaong tinh, Mban Trị sự Kapuk Agama Bhat Viet Nam tinh Tay Ninh hu ba mai dom kaya alin biak siam mekre. Thuong toa Thích Quảng Tâm, Akaok Mbang trị sự Kapul Agama Bhat Viet Nam tinh Tay Ninh brei thau, dom kaya ini lac hatai klah rabha, lac bruk daong prein piah rahra kajap hatai jang anak dom kan kandah di raidiuk: “Ini lac sa danak dak daong prein yava ka mikva bhum atah bayah, saong jeng njauk haong jalan di mban ngak pahla kapul agama bhat Viet Nam. Khol dahlak caong lac, danak dak ini patui veik patagok praong jang di bhum atah bayah piah khol drei hu kein lagaih ngak pahla dalam rahra di agama Bhat”.

Dalam raidiuk jeng daok rilo uranaih anek metui, jaoh jo saong dom khat lahik. Thau ka bruk nan, Kapul urang kamei Jabat Mentri pato tacei Bol lin tinh Tay Ninh hu ngak bruk “Amaik dang akaok” piah pacang khik saong daong dom adei anek metui. Dom uranaih tok hu anit ranam meng hatai saong jien padai, daong dom adei hu pabak hatai je tame raidiuk, kham meerat bac megru, raong pabam caong takre jeng menuac urang siam ka rahra. Thieu ta Trần Thị Mừng, Phaok Akaok Kapul urang kamei Jabat Mentri Pato tacei bol tinh Tay Ninh brei thau: “Brei tapa, Danak dak “Amaik dang akaok” oh lac bruk daong ka drap ar jien padai, blaoh daok lac bruk pacang khik, paglaong hatai ka dom adei sit anek metui medhar, hu baoh sang kan kandah. Tapa ini, khol dahlak khin klah rabha, peih praong tangin anit ranam piah peih tagok hatai je, daong prein piah dom adei khang kajap jang dalam raidiuk. Gam tui di nan, brei mboh bruk di drei, hatai anit ranam di kapul Urang Kamei Mentri pato tacei bol lin saong rairah harei hadei. Khol dahlak brei patui bruk pambak praong danak dak, piah dak harei dak hu rilo adei hu raong pabam caong takre, hu praong tagok dalam hatai anit ranam saong bruk daong di dalam rahra”.

Oh lac sangka ka prein yava, pato megru, kapul lin urang pan phao karaong tinh Tay Ninh daok ba mai hatai bui sambai pataom gauk meng dom baoh sang kathaot tapa dom baoh sang anit ranam bol lin haong rahra. Meng di nan blaoh hu rilo baoh sang urak ini hu baoh sang khang kajap.

Dom bruk ngak meng hatai anit ranam praong glaong di kapul lin pan phao karaong tinh Tay Ninh oh lac hu sa janih daong prein ka dom anek matui daok kan kandah anak meta, blaoh nyu daok brei hatai je, pasiam bruk gul pataom dalam bhap bini rahra. Ini lac bruk hatai rahra khang kajap anak meta, lac bruk patui veik, pambak tabiak bruk siam gheih di “Bol lin Wa Ho” dalam jaman bahrau.