Sa-ai Mai Trí Cảng (daok di Ninh Thuan) brei thau, gait hu 2 urang anek daok bac pakat 1 saong pakat 2. Jien mek tame di urang ngak bruk Karja di dua diuk pasang sa-ai labaih 12-13 trieu/bilan. Langiu di tukvak nao ngak dalam karja, dua diuk pasang sa-ai Cảng daok duah bruk ngak karei di langiu. Tui sa-ai Cảng, jien bac 2 urang anek, yaok thun labaih 2 trieu dong. Langiu di jien bac ye daok biak rilo jien pandar ka bruk karei, nan bruk oh mek jien jeng hu patrun takik hu banah halei: “Sa thun drei daok rilo jien pandar chai karei yau ye: blei tapuk siphau, blei pandap panda, khan ao,… Karja hu sarak yau nan drei biak bui sambai.”

Tui amuk Nguyễn Thị Nhật Hằng, Yam ndok So Pato megru tinh Binh Duong, lac tinh Binh Duong hu sarak patrun meteh jien dut haong adat ba tabiak. Bruk Karja oh mek jien bac ka anek saih tal pakat 3, tui amuk Hằng, ini lac bruk ngak biak siam haong dom anek kamuan di bhum palei ini: "Khol dahlak hulin biak bui sambai. Rahra Binh Duong, dalam nan lac hu urang ngak bruk di labik karei mai, brei oh mek jien bac, daong ka dom urang nan sahnang hatai ngak bruk, anek saih mai sang bac rilo jang kayua oh daok mabuk hatai kuhria ka jien bac.”

Bruk oh mek jien anek saih bac di sang bac karja ieu lac sa janih peih akaok ka dom sarak siam mekre brei ka gah pato megru, nao tal jalan pato megru samu gauk gam haong lac bruk buh jien tame suai atah ka harei hadei.

Ong Cao Thanh Bình, Akaok Mbang Ilamo – Rahra, HĐ Bhap bini Ban raya Ho Chi Minh brei thau, sarak ini pambuak praong tal bruk daok dang mbang ngui, brei kein lagaih ka anek kamuan thei thei jeng hu bac megru yau gauk gauk, klah rabha bara naong trak brei ka urang ngak amaik ame.

Bahrau blaoh, Ban raya Ho Chi Minh ba tabiak sarak oh mek jien bac ka taong abih pakat bac. Ban raya jeng daok ba tabiak panuac ndom tal gah pato megru piah pasang iek gilac bruk di anek saih saong roh duah piah ba tabiak panuac likau veik dom sarak daong karei langiu di jien bac ka dom adei baoh sang kan kandah.

Ngan haong dom tinh, ban, ini lac jalan ngak biak siam lagaih piah ka yaok bhum palei, patui tame kadung jien padai saong kein lagaih kinh te di drei piah hu patui veik dom sarak siam mekre atau sarak karei daong ka anek saih kan kandah, nao tal bruk siam glaong di pato megru hu yau gauk. Ong Cao Thanh Bình hu ndom mayai lac: “Oh cang lac urang kan kandah, atau urang hu kein lagaih, dalam nan hu ndom mayai tal dom adei kan daman hu mbaok tame dom danak dak lagaih, paglaong ilamo jeng yau dom yut cuai sahabat karei meng gah xa hoi hoa, kadung jien karei di dom karja palei.”

Gru Thành Sơn, sa urang gru pato meng dahlau diah di Ban raya Ho Chi Minh brei thau, bruk oh mek jien bac ka anek saih dom pakat bac di dom baoh sang bac karja rik daong ba tal sa bruk pato megru jeng sa bruk samu gauk jang. Urang hu jien padai ye meda pilih ruah bac di sang bac langiu karja, daok meyah oh hu ye jeng hu Karja sangka. Ini lac sa jalan ngak biak gheih ghang siam mekre. Tuk ilamo khoa hoc, kong nghe saong glo akaok manuac dak harei dak patagok, ye bruk paglaong ilamo daong ka urang Viet Nam tui dil samu bruk patagok di dunya: “Rahra njauk brei hu ilamo takik di nyu hu tamat abih pho thong piah mbuan si diuk di jaman raidiuk bahrau, ba tame pandar raidiuk di drei meyah oh hu yau nan drei jeng kadun lakuk. Dahlak hulin sahaneng lac bruk ini biak njauk ngak haong grauk urang gam haong rai rah harei hadei.”

Sarak oh mek jien anek saih bac oh lac sa janih daong jien padai, blaoh nyu daok ieu lac yau ye sa bruk buh jien phun ka harei hadei brei ka taneh ia, brei mboh meta maong ka jalan kuhria di Ndang haong Karja, piah padang sa xa hoi yau gauk, sa labik ka uranaih thei thei jeng hu kein lagaih cakrok patagok abih gah sampurna./.