Yaok thun, inum krung bimon kalan hu angan Pô Klong Garai di tinh Ninh Thuan dan haong ilamu pakat nagar Pô Sah Inư di tinh Binh Thuan pachreih hu yaok rituh rbau tuai damuai mai rivang ieik. Urang jirah mai, oh lac sajanih ieik bimong kalan lama klak ravik blaoh ba rup tame ilamu bangsa Cam tapa dom rija yang mabang, adat cambat pesta raya Kate, adaoh tamia biak makre di harei hujung adit.

        Di ini, tuai damuai urang jirah mai riwang hu brei pang gam meng sap Viet dan haong sap Enggrik brei ka dakrai jarrah, janih ilamu urang bangsa Cam. Ong Trần Phú Hải, sa urang tuai daok di ban ine Ha Noi mai dak takai di bi mon kalan Po Klong Garai di Ninh Thuan brei thau lac.

        “Akau mboh ilamu bangsa Cam biak chreih. Ralo janih drei ka oh thau bih, caong khin ieik khin maong, khin roh duah dan haong ieik ilamu hu hagait karei, hu hagait pachoh dut haong ilamu bangsa karei. Kan dalau ngak hu jeng bimon kalan biak siam biak gheih, ralo janih karei dut haong ilamu karei. Manuac urang, langik tasik, bimong kalan biak chreih dah biak krah.”

        Ong Nguyễn Anh Khoa, Phaok akaok Kongti TNHH blei salih dan haong mayit Sao Mai brei thau, mai palei ilamu Cam di huyen Bắc Bình, oh sa janih palei gok glah Bình Đức, Pasak parang iek ilamu Cam blaoh di ini daok hu sa baoh gilang ilamu Rai rah raja patau Cam di palei Canar Tịnh Mỹ, xa Phan Thanh jeng biak chreih.

        “Dalau diah Sao Mai sa labik jirah rivang jeng ye dom adei saai ngak mbang main jirah di Binh Thuan hu nao roh duah danak dak di So Ilamu, Padhih haong Jirah gam pambuak haong dom labik main ieik jirah di huyen Bắc Bình, dalam nan hu palei ngak gaok glah Cam Ragaok Bình Đức dan haong dom palei ngak bruk meng kan tui muk kei. Di langiu hu janji sinyia brei pambuak ngak jirah rivang ba tuai damuai mai rivang ilamu di Bắc Bình, pambuak Bắc Bình, Bàu Trắng dan haong Phan Thiết.”

        Mai rivang ilamu Cam di Ninh Thuan dan haong Binh Thuan, tuai damuai daok duah thau ralo janih ilamu pakat nagar di ilamu bangsa Cam yau ye: patau harak Hòa Lai, rup patau Putau raja Po Rome, patau akhar Phước Thiện, rup patau yang Po Klong Garai dan haong Linga ameh. Urak ini dom janih barau bau nan hu daok brei ieik di gilang khik drp ar dua tinh Ninh Thuan saong Binh Thuan.       

        Ong Nguyễn Văn Hoà, Yam ndok So Ilamo, Padhih saong Jirah tinh Ninh Thuan khan lac, UB Bhap bini tinh jao ka sở pambuak haong dom jabat roh duah ilamu padang dom danak dak, brei roh duah, ieik glang, lang yah brei thau dom janih gah ilamu, gheih siam di dalam adat cambat, raidiuk, harei raya pesta Cam piah padang, piah khik ramik njauk kadha cara, gok asal ilamu di nyu. Blaoh di nan, khik ramik, patagok, brei pachreih jirah, brei paralo bruk ngak, dua hu ralo jien tame kadung brei ka bhap bini.

        “Gah kanja So, khol hulin dalak daok ngak tui sarak brei ka bruk khik caga dan haong patagok ilamu pakat nagar. Ngak yau habar gam khik hu ilamu, gam patagok hu yaom kaom di nyu, jak ba, khan prai praong, gam pachreih hu jirah riwang ka dalam tinh palei. Dalam nan hu bimon Po Klong Garai, ilamu pakat nagar bimong Hoà Lai. Barau meng blaoh, So jeng hu khan haong UB Bhap bini tinh ramik jien phun piah pasiam, pagheih ilamu jarah, gam haong brei patagok jirah rivang, brei jeng sa labik piah ma-in ieik labik jirah rivang di tinh Ninh Thuan.”

        Ong Bùi Thế Nhân, Yam ndok So Ilamo, Padhih saong Jirah tinh Binh Thuan daok brei thau:

       “Khol dalak hulin daok khan tagok UB Bhap bini tinh tabiak adat caga karei brei ka ialamu pakat nagar: Linga ameh. Dalam bruk pathau khan khol dalak hulin du lakau brei brei yaih ieik dalam dom mbang hu harei praong, harei raya. Khol hulin dalak jeng hu ngak janih yau ye biak piah brei yaih bhian yaih di ralo labik, dalam nan hu brei yaih ka tuai damuai dunya.”

        Di dalam bhum mraong kreih nagar, Ninh Thuan saong Binh Thuan ieu lac dua tỉnh hu ralo mikva urang bangsa Cam. Ilamu bangsa Cam hu janih dah krih tui dom ilamu harei raya pesta, adat cambat, yang rija, bimon kalan, tamia adaoh bhap bini..., daong tame kaya mada kaya ngui ilamu bangsa Viet Nam. Mayah hu sang ka iek glang pok yaom njauk janih kadha, yaom kaom janih ilamu urang bangsa Cam mada daong brei ralo siam makre kaya mada ka janih jirah rivang, pachreih tuai damuai urang jirah mai ma-in./.