Meng hu jien mek tame rilo meng raong pabe, meng di akaok thun, rilo sang di tỉnh Đồng Nai, Bình Phước hu buh phun jien tabiak ngak var ro, blei drei pajaih piah patagok tapon. Kadha vak: “Kein laba kinh tế meng raong pabe” hu ba tagok báo Sài Gòn Giải Phóng. 

Tỉnh Đồng Nai urak ini hu tapon pabe jaik 40.000 drei saong dom labik hu mblang hamu praong, rilo pandap klaak tabiak meng bruk ngak nong di dom huyện Xuân Lộc, Thống Nhất, Long Thành, Cẩm Mỹ, Tân Phú... biak lagaih ka urang nong raong pabe ralow. Sa-ai Trịnh Đình Xuân (xã Sông Ray, huyện Cẩm Mỹ) raong 150 drei pabe ralow brei thau, urak ini yaom pabe 120.000 đồng sa kg, tagok jang 2 mbang duk haong tukvak tabung glaong jit Covid-19 nan ye urang raong pabe chreih chrai lo.

Di tỉnh Bình Phước, yaok ratuh sang di 2 huyện tapen negar Campuchia lac Lộc Ninh saong Bù Đốp daok hu jien mek tame rilo meng raong pabe. Sang sa-ai Phạm Đình Dũng (daok di xã Lộc Quang, huyện Lộc Ninh) raong labaih 100 drei pabe. Thun 2022, tuk jit Covid-19 hu pacang veik, yaom pabe jeng hu tagok veik, yaom tani tanat meng 120.000 - 140.000 đồng sa kg, sang sa-ai Dũng mek tame hu jaik 200 triệu đồng. Sa dalam dom bruk raong pabe jak jeng, daong ka rilo sang kaya meda tagok njauk ndom tal Kapul pambuak bruk raong pabe hacih xã Tân Thành, huyện Bù Đốp. Kapul hu 40 urang, haong tapon pabe abih tih labaih 1.600 drei pabe binai saong 40 drei pabe tano hu raong meng pandap mbang lac hareik tamuh eng, daok ba bruk ngak ka labaih 100 urang kumei, ba jien tame yaok ratuh triệu đồng yaok thun ka yaok urang dalam Kapul pambuak bruk.

Di huyện Cẩm Mỹ, 1 dalam 3 labik hu rilo sang raong pabe abih di tỉnh Đồng Nai, rilo sang raong pabe daok buh phun jien tabiak ngak var ro, blei drei pajaih piah tagok tapon. Ong Trần Văn Hùng, sang raong pabe di xã Sông Ray brei thau, 2 thun dahlau, urang raong pabe khat trak kayua jit ruak Covid-19, ralow pabe oh pablei tapa darak pasar Trung Quốc hu saong yaom biak biar. Min meng akaok thun 2022 tal ini, yaom pabe meng 90.000-120.000 đồng sa kg, urang raong pabe meda laba hu 1,6 triệu đồng sa drei.

Min bruk pablei athur raong dalam dom tỉnh Đông Nam bộ jeng daok gaok kan kandah kayua jaik abih lac sang raong sit sot, HTX jeng pablei ka urang blei salih dalam palei nan ye yaom daok biar. Kayua yau nan ye, gah ngak nong huyện Cẩm Mỹ hu kakei dom sang raong pabe jhui tagok tapon rilo kayua tukvak ini yaom pabe pajaih jeng daok glaong, piah khik hu kein laba, urang raong tok tagok tapon tuk hu ginup labik raong saong tuk raong brei ngak tui dom jalan raong glang salamat.

Ong Ngô Đức Nhật daok di xã Lộc Hiệp, huyện Lộc Ninh (Bình Phước) brei thau, meng kreh thun 2022 tal ini, yaom pabe tagok nan ye ong ba tabiak pablei yaok pluh mbang. Urak ini, tapon pabe di ong Nhật tuk halei jeng hu meng 60-70 drei, yaok mbang pablei meng 7-10 drei pabe ralow ka urang blei salih.

Abih di nyu lac, HTX Pablei salih raong glang pabe Lộc Hiệp, huyện Lộc Ninh (Bình Phước) hu 45 urang, phun jien điều lệ labaih 1,2 tỷ đồng, daok hu jalan ngak gheih ba mai kein laba glaong lac gam raong gam pablei ralow pabe, daong ka xã viên hu rilo jien mek tame jang meng pablei ralow hacih. Amuk Trần Thị Ngọ, Yam ndok HTX Pablei salih raong glang pabe Lộc Hiệp brei thau, xã hu dom ratuh sang raong pabe, urak ini yaom pabe tagok glaong nan ye jaik abih urang raong pabe jeng tagok tapon, min jhui tagok tapon rilo..

Tui Sở Ngak nong saong Patagok palei pala tỉnh Bình Phước, tỉnh hu labaih 17.000 ha amriak kalu, dalam nan labaih 2/3 mblang taneh hu pala meng got phun diuk, ba mbuan lagaih piah patagok bruk pala amriak kalu pambuak haong raong pabe. Anak bruk yaom amriak kalu oh tani tanat yau urak ini, bruk pabe hu yaom, hu daong ka rilo urang nong mek jien tame hu rilo jang, pasiam raidiuk. Urak ini, yaom pabe tagok glaong ngak brei rahra chreih chrai min Sở jeng daok kakei rahra njauk caik hatai sahneng kuhria tuk tagok tapon piah plaih khat lahik./.