Kapul ngak bruk pasang iek labik ka 9 (Kapul Lao dong Ban raya Ho Chi Minh) pambuak haong Jabat pasang iek Prein yava metian menek – Bruk kuhria ka menek dalam baoh sang (Chi kuk Rahra ban raya Ho Chi Minh) padang danak dak “Brei prein yava ka urang ngak bruk” thun 2025.

Labaih 400 urang ngak bruk urang kamei hu pasang iek ruak kumei, sieu am, xet nghiem, iek pabam ruak ung thu saong langyah ndom meyai oh mek jien brei ka prein yava urang metian menek, kuhria ka bruk menek dalam baoh sang, gam haong dom ilamo caga plaih dom ruak pambak tapa jalan lakei kamei.

Tapak hu mbaok tame danak dak, sa-ai Đinh Thị Minh Châu – Phaok Akaok Kapul co so Kongti TNHH Wanek Furniture's brei thau, meng hu bruk ba drei tame ini brei ka sa-ai sahaneng tal bruk da-a kapul y te mai pasang iek ruak di sang mac ka urang ngak bruk. Kuhria, labaih 2.500 urang ngak bruk lac urang kamei di kongti hu pasang iek ruak. Tui sa-ai Châu, bruk ba bac si mai tal labik lac bruk siam lagaih piah duah hu rilo urang ngak bruk “huac kanda” atau oh hu tukvak nao pasang iek ruak.

“Di gah drei peih biak rilo mbang harei bac pasram ka urang ngak bruk hu pambuak tal thaik rup daok dang tuk ngak bruk atau labik ngak bruk di dom urang hu labik ngak bruk run thring atau dhun mun. Gam haong nan gah ngak mbang pablei salih jeng hu dom danak dak daong dil samu ka urang ngak bruk. Pagap yau hu dom urang ngak di dhun mun ye brei ka hu kaya pabang idung pacang anek ruak…Lac sa gah karo salamat likau hagait ye kongti jeng pabak ginup bruk nan”.

Dom urang dokte bac si hu mbaok tame danak dak brei thau, bruk halang pilih tapak daong duah mboh rilo asal kadha prein yava njauk dom urang ngak bruk klak tapa. Th.S-BS Trần Thị Hồng, Phaok Akaok jabat Pasang iek prein yava metian menek (Chi kuk Rahra Ban raya Ho Chi Minh) brei thau, rilo meng lac urang urang kamei ngak bruk di ini gaok ruak darah patih, katal; hu urang mboh ruak barah nang, barah xo, labaih 10 urang tame tukvak abih darah jhak hu rilo bruk mblung mabuk srau kadau brei ka prein yava.

Bac si Hồng jeng kakei brei caga dom adei sa-ai kamei kayua khin “dui atah umo damdara” nan hu khan ka gauk pandar jru, mbuan tamuh ruak trak. Biak rilo urang ngak nong nao pasang iek tuk hu mboh ruak, ba tal kan jang ka bruk taong ruak. Kayua, bruk di kapul kong ndoan pambuak peih bruk pasang iek di sang mac pachreih adei sa-ai nao duah samar drah, gam ngak tabiak kein lagaih gam hu langyah ndom meyai pato tacei brei ka dil samu:

“Danak dak caong khin daong bhap bini sangka saong pacang khik prein yava ka adei sa-ai kamei. Khol dahlak likau bau brei pachreih sa mbang tra lac urang kamei ngak kong brei nao pasang iek ruak gah kumei takik abih di nyu meng 6 bilan tal sa thun sa mbang, gam haong nan brei mboh bruk hu makna di bruk iek glang pabum ung thu co tu cung rup anek kumei”.

Di phuong Ben Thanh, Kapul urang ngak pakat phuong pambuak haong Labik pasang iek ruak Da khoa Dunya Sai Gon peih danak dak “Brei prein yava ka urang ngak bruk”, daong jaik 50 urang ngak bruk kan kandah hu pasang iek ruak taong abih janih gah, sieu am, dut iek ndien tim, langyah ndom meyai saong pabak jru oh mek jien, ngan haong jien buh tabiak jaik 90 trieu dong. Sa-ai Huỳnh Vĩnh Lâm, Phaok Akaok Thuong truc Uy mban MT negar Viet Nam phuong brei thau, di dalam bhum jeng hu kapul xich lo, rilo meng lac urang ngak bruk praong thun umo, jien mek tame oh tani tanat saong takik hu kein lagaih piah sangka prein yava:

“Rilo urang ngak bruk njauk ruak dui suai atah yau ye ruak pandik talang araong, darah tagok trun, lamek njom dalam darah, ma-ik saradang, dom ruak man tinh saong ruak bhian gaok hu bac si duah mboh, langyha ndom meyai piah ngak habar ka taong abih ruak. Ini jeng lac kein lagaih piah urang ngak bruk pasang iek prein yava samar abih”.

Piah peih praong labik sangka iek ruak, tal ini, Kapul kong ndoan phuong Ben Tre patui veik pambuak haong Sang iek ruak Từ Dũ peih bruk pasang iek ruak gah kumei saong ieik glang ruak pabum ung thu ka labaih 100 urang kumei ngak bruk.

Kapul Urang ngak bruk Ban raya Ho Chi Minh jeng peih danak dak “Brei prein yava ka urang ngak bruk” mbang ka 2 di Kongti TNHH Sơn Tùng, phuong Linh Xuân, pasang iek ruak oh mek jien, sieu am, langyah ndom meyai sangka prein yava brei ka urang kumei umur metian menek, gam haong nan iek glang ruak pabam ung thu ka 200 urang kamei ngak bruk./.