Xa bhum ceik Khánh Sơn lac sa di dalam dom bhum hu rilo mikva urang bangsa takik daok di tinh Khanh Hoa. Ong Cao Minh Khánh, Phaok Bi thu Ndang uy xa Khánh Sơn, brei thau, dalam jaik 12 ribau rahra urang daok di dalam xa, dalam nan hu labaih 8.500 urang bangsa Raglai. 5 thun tapa baoh sang kathaot di ini trun samar, min jeng daok labaih 20%, jien mek tame kuhria rah tapa di yaok urang bahrau tok hu 30 trieu ndong/thun. Gam tui ralo sarak njauk lagaih daok hu peih ngak, bruk ngak tabiak di mikva daok hu pasiam drah:

“Dom danak dak kinh te bhum ceik bahrau blaoh hu peih ngak biak rilo di dalam bhum palei brei ka mikva taduon mek hu di abih. Min tapi, nao tame dalam, nao jaik taphia rahra bhap bini jeng mboh dom baoh sang ka oh hu ngak siam lagaih danak dak, rilo meng di dalam nan ngak hu siam dom danak dak daong saong hu patruh kathaot karo kajap”.

Kuhria taong abih dalam tinh Khanh Hoa, bruk baoh sang kathaot dalam bhap bini bangsa takik trun daok labaih 5% yaok thun; tal ini daok hu labaih 6.400 baoh sang, meblah jaik 11%. Labaih 3.500 baoh sang taik tahak hu salih tapa jeng sang khang kajap. Jalan mbak, sang bac, balai y te, gom truac, rahra tagok ralo, hu veik rilo kein lagaih piah patagok, ngak tabiak akaok meti hu jalan kuhria bahrau. Di xa Trung Khánh Vĩnh, hadei pagam, Ndang bo xa peih praong bruk pala phun mbang baoh hu pala rilo, raong glang siam lagaih tapa labik bahrau. Karja daong pajaih phun pala, phun jien mesraiy, bac pasram ilamo ky thuat, brei prein piah mikva khang hatai salih. Amuk Cao Thị Ngọc Thanh, Akaok UB Bhap bini ND xa Trung Khánh Vĩnh brei thau:

“Bhum palei padang jalan tanak dak patagok haong dom bruk pala phun hu pala rilo, ruah pilih pala phun njauk lagaih tui taneh riya, langik tasik, gam pabak hatai caong patagok kinh te, gam salih bruk ngak nong tui jalan siam lagaih. Rilo ndap nda hu ba tabiak darak pasar, khik kajap ndap nda, asar siam, ba mai kein lagaih kinh te glaong saong jien mek tame tani tanat karo brei ka mikva”.

Tui pathau khan di karja tinh, labik Barak Khanh Hoa ngak salah blaoh 29/30 mek hu tanut Danak dak jalan ngak pakat negar patagok bhum urang bangsa takik saong bhum ceik; jien mek tame kuhria ti akaok manuac urang rah tapa di urang bangsa takik mboh tagok 2,14 mbang dut haong thun 2020. Di Meraong Khanh Hoa, 19/22 mek hu njauk tanut saong truh tapa tanut ba tabiak, dalam nan mboh naih gheih abih lac 100% baoh sang kathaot di urang bangsa takik hu daong sang daok. Yau nan min, jeng daok dom jalan ngak oh ka ngak hu yau patrun dom xa biak kan kandah, parilo anek saih bangsa bac megru tagok tal pakat bac kreih di pho thong, atau bruk pala phun padang glai.

Tui ong Nguyễn Ngọc Sơn, Phaok Yam ndok So Bangsa saong Agama tinh Khanh Hoa, bhum mikva bangsa takik saong bhum ceik di tinh daok rilo kan daman, min jeng daok dom kein lagaih, rilo meng lac gah ngak nong. Kinh te bruk ngak mbang blei salih di rahra daok di ini brei hu salih tuk tinh hu ieu da-a jak ba gah ngak mbang pablei salih daong jien, padang dom bruk pambuak gauk dalam bruk ngak mbang. Ong Nguyễn Ngọc Sơn mek pagap di xa Khánh Sơn:

“Di bhum ceik Khánh Sơn, urak ini phun durian hu jeng phun hu pala rilo abih. Padang hu angan je saong hu sarak buh jien tame ngak ndap nda, papaok, kadung, ye durian di Khánh Sơn hu pablei tabiak rilo labik. Min piah ngak hu bruk nan, brei hu dom sarak lagaih, caik dahlau ka gah ngak mbang pablei salih gah bruk nan. Meng nan, daong prein ka dom urang bangsa takik tagok”.

Bruk patrun kathaot, paglaong raidiuk bhum urang bangsa takik di Khanh Hoa mek hu rilo jak jeng mboh cambaih laih, dak harei dak hu karo kajap tuk pagam haong ha tang, bac megru saong bruk daok dang mbang ngui. Gah ngak mbang pablei salih jeng daok daong piah pamedeih kein lagaih. Harak daok ngak Pathau khan chinh tri di tinh hu brei mboh asal kadha di drei lac “oh luai ka thei njauk caik gah likuk”, ba tabiak jalan patrun kathaot rilo gah meng 1 tal 1,5% yaok thun, brei mboh kham merat ba mai kein lagaih patagok taong abih, karo kajap brei ka bhum mikva urang bangsa takik, bhum ceik car./.