Di Ia Chia, sa baoh xa daok di tapen negar tinh Gia Lai, dom harei ini, bruk sap grap rami ramik ka harei palih ruah raya daok peih ngak samar drah. Meng page tal mesup, urang jakar, bol lin Ndon Bien phong Caga nagar Ia Chia hu mbaok di dom puk dom palei, pambuak bruk haong karja puk palei pathau khan yaih dakwah, jak ba mikva brei ka bruk pacang caga khik kajap bhum mblang taneh palei negar, karo kajap bhum tapen taneh aia; quyen saong bruk ngak di yaok urang bol bhap bini dalam bruk palih ruah. Ong Phạm Văn Phúc, Mbik thu Chi mbo palei Kom Yố, xa Ia Chia brei thau: “Tal masa urak ini hu khan yaih dakwah brei ka bruk palih ruah raya hu 3 mbang, urak ini di palei, to palih ruah (ka 5) daok peih ngak bruk tagok talei gam song urang palih ruah. Harei palih ruah njauk tame harei 15/3/2026 ye hu khan brei ka taong abih mikva saong bhap bani thau piah pal hu dom asal kadha dalam bruk palih ruah raya.”

Di dalam bhap bani, bruk ngak di dom urang taha palei, urang hu angan je hu pok glaong, tabiak pathau khan ka makna di bruk palih ruah, jak ba mikva saong taong abih gauk palih ruah dom urang lambaok ka nyu njauk, langiu di nan bruk patagok hatai pacang caga dom panuac kadha di kaol kanjah jhak, neh rabha bruk gul pataom taong abih bangsa. Urang Taha akaok palei Rơ Châm Chích, palei Beng, xa Ia Chia khan brei thau: “Dahlak akau jeng khan brei thau dom kadha dom bruk brei ka mikva thau, piah hadah krah palih ruah tabiak dom urang naih jioy, abih hatung hatai haong bruk ngak piah kuhria ka mikva. Drei di bhum tapen negar nan ye njauk paglaong akaok saneng anak dom panuac kadha oh siam di kaol kanjah jhak, oh pang, oh tui, njauk ngak siam dom jalan ba patacei di Ndang, sarak hukum di Karja saong dom ilamu adat cambat di puk palei.”

Thieu ta Nguyễn Thanh Bảo, Chinh tri vien Balai Bien phong Ia Chia brei thau: Urang jabat hu trun tal yaok baoh sang piah ginum biai, pato tacei cambaih laih, daong ka mikva thau cambaih laih, kadha prong glaong di mbang palih ruah; paglaong akaok saneng, khik kajap bruk gul pataom bangsa di labik tapen negar.

“Paglaong akoak saneng di bhap bani thau cambaih laih jang ka jalan ngak, makna, asal kadha brei ka bruk palih ruah. Meng nan mikva meng palih ruah hu dom urang lambaok siam ghieh, lambaik ka sap ndom di bhap bani di labik daok, abih di nyu hu lac di bhum taneh tapen negar. Mikva jeng brei mboh hu hatai kham merat jeng yau bruk gul pataom, dang akaok dalam hala harak di drei. Khaol dahlak hu pathau khan piah ka mikva paglaong akaok saneng haong panuac kadha oh siam, peih ngak njauk tui jalan ba, sarak di Ndang, adat hukum di Karja saong pacang cakak dom bruk ngak oh siam di kaol kanjah jhak, neh rabha bruk gul pataom taong abih bangsa.”

Urak ini, Ndang uy, UB Bhap bini xa Ia Chia hu dak padang mbang tacei pato saong Uy mban palih ruah; peih ngak 6 labik palih ruah di 10 puk palei; pasiam pabak dom tieu mban thong tin pathau khan, khik kajap an ninh palei pala, langyah siam gheih bruk yak bak,… Gam saong labaih 70% bhap bani lac urang bangsa takik, ilamu bac megru oh samu gauk, bruk pathau khan hu brei thau dahlau lac bruk ngak pasak, njauk peih ngak ka nyu siam gheih, mbuan pang, mbuan thau saong laghaih haong jalan diuk rai yaok harei.

Tuk bhum taneh di tapen negar sron mbuan, bhap bani sa hatung sa hatai haong gauk, yaok hala harak pilih ruah labik bhum akaok dak hu makna jang. Yaok hala harak labik tapen negar oh tok lac sa janih brei ka bruk palih ruah urang lambaok, bloh daok lac bruk brei thau ka po bhum taneh, bruk gul pataom taong abih bangsa. Meng bruk ngak samu gauk di taong abih he thong chinh tri gam haong hatai jia di yaok urang labik tapen negar daok ngak brei khang kajap piah ka harei nyaom palei negar rah tabiak siam mekre, njauk adat hukum./.