Rah tapa yaok rituh thun, dom ragam tamia di bangsa Khmer daok di Meraong Negar tuk halei jeng daok khik tapa dom rairah. Dom ragam tamia gheih ghang di urang Khmer hu khik veik meng rai ini tapa rai diah lac kayua meng tuk daok sit, dom ragam tamia nan hu njom tame darah di urang Khmer tapa dom mbang ong muk pato, thau adaoh dahlau tuk thau puac, thau vak”. Panuac ndom mayai nan brei mboh ka bruk pambak praong di adaoh, tamiak, phling ragam Khmer dalam raidiuk daok dang di mikva bangsa Khmer. Tien si Sơn Cao Thắng, Sang bac Dai hoc Tra Vinh, tinh Vinh Long brei thau:

 “Urang bangsa Khmer di Bhum taneran kraong Cuu Long hu seni nghe thuat tamia biak rilo. Pambuak tal bruk ngak mbang hu dom ragam tamia yau mek ikan, urang ieu lac ragam tamia bhap bini; daok dom ragam pambuak tal adat cambat, rija raya jeng hu tamia, bruk nan lac tamia dalam adat. Langiu di nan, hu sa janih seni tamia karei veik bo mukkei caik veik tal harei ini, nan lac tamia bhap bini meng kal klak (tamia Robam). Bruk brei mboh ka janih tamia ini lac dom ragam tamia dan dan, khan ao gheih ghang rilo sambo bar saong hu makna.”

Tamia bhap bini meng kal klak ieu lac sa janih seni ilamo karei di urang bangsa Khmer Meraong Negar. Ragam tamia ini nyu mboh dan dan, njuel njac saong bangi maong. Bhian biasa, tamia meng kal klak khan veik ka dalikal dalam akayat Khmer yau banah kadha Riêm Kê, Sô Vanh Mạch Chha, dalikal jakala,… ba dom yaom kaom siam mekre piah pamaong tal rairah hadei nao tal dom bruk siam mekre, gheih ghang, plaih dom bruk jhak, bruk sanak. Oh lac yau nan, dalam tamia meng kal, dom ragam tamia di tangin saong takai jeng brei mboh sap ndom karei, ba dom makna dalam nan bo rairah mukkei hu payua. Tien si Sơn Cao Thắng brei thau veik:

“Tui urang nghe si tamia Robam ye brei thau dom ragam tamia. Dalam nan hu dom ragam tangin, takai, mbaok meta habar ka njauk saong kadha tamia. Langiu di nan, ragam tangin lac sa bruk brei mboh ka tamuh rak choh di phun kayau. Akaok meti drei mboh bruk pakuak tangin, nyu brei mboh ka asar pajaih; hadei tuk asar pajaih tamuh tagok, brei mboh ka tanau tangin kreh tacei tagok; hadei nan, hu hala meda, hala taha, dhan – brei mboh meng dua tanau tangin; blaoh tal bangu – brei mboh meng dom tanau tangin pakuak tame gauk; hadei nan lac baoh, baoh tathak druh blaoh hadei nan patui veik tamuh tagok. Nan lac rai payeng di phun kayau.”

Jeng tui Tien si Sơn Cao Thắng, Sang bac Dai hoc Tra Vinh, tinh Vinh Long, langiu di dom ragam dom tanau tangin tacei – meda thau lac mboh hagait nan; ragam tangin anak tada ye meda thau urang tamia khin ndom “dahlak ini”; atau dom ragam pambuak karei jeng hu makna karei, kayua tamia Robam oh hu panuac ndom bo tapa dom ragam tamia, urang nghe si brei payua tal urang maong makna di kadha.

Meng mblang sang baha tal sang ilamo bhap bini, labik halei lagaih piah pataom urang ye Kalup kapul adaoh tamia sang baha Pak Mbaok brei ruah labik nan piah pasram dom ragam tamia bhap bini di bangsa Khmer. Adei Lâm Thị Ngọc Linh, urang dalam Kalup kapul adaoh tamia sang baha Pak Mbaok, xa Thuận Hòa, Ban Can Tho brei thau:

“Adei ranam seni ragam tamia meng sit. Khol adei hu mbaok tame haong hatai caong khin khik ramik seni tamia Robam saong Romvong piah dak harei dak patagok.”

Ragam tamia kal klak di bangsa Khmer Meraong Negar oh lac sa janih seni tamia blaoh daok lac drap ar ilamo dalam nan hu yaom kaom ilamo di bangsa. Tapa yaok abap, ragam tamia Robam saong dom ragam tamia karei di urang Khmer lac oh padeih patagok bruk hu makna dalam raidiuk ilamo, daong ngak meda ilamo Viet Nam bahrau, ndung bak ilamo bangsa./.