Dom harei jaik tal raya Tet, tuk sambao bhong maraih – kanyik di labik ngak mekre bal pataih saong thaik thaot tapei chung, tapei nung rah rah hu parang dalam labik sang iek ruak, arthak labik taong ruak hu ngak takik trak damak jang.

Di Sang iek ruak Chợ Rẫy, dom danak dak sangka raya Tet ka urang ruak hu peih ngak meng aval, peih camreip ka majam danak dak klah rabha brei ka urang ruak baoh sang kan kandah. Bahrau ini, danak dak “Pabam bal Pataih mbang ka 3-Haniem phol tamuh” kayua Kadung jien Pahla pambuak haong Kadung jien Pachreih bac Vừ A Dính hu peih ngak, ba Tet mai aval jang tal sang iek ruak uranaih saong urang ruak baoh sang kan kandah daok taong ruak gam daok di rilo sang iek ruak. Taong abih jien padai majam danak dak thun ini labaih 4 ti dong, brei mboh ka bruk daong tani tanat di dom kapul rahra haong urang ruak dalam dom tukvak kan kandah.

Di Sang iek ruak Uranaih lek ka taka 1 Ban raya Ho Chi Minh, raya Tet thun ini hu 4 danak dak praong brei ka uranaih di dom baoh sang kan kandah, abih di nyu nan lac dom adei daok taong ruak gam daok, oh nao sang. Ong Chu Văn Thành, Phaok jabat Ngak bruk rahra, Sang iek ruak Uranaih 1 brei thau:  “Khol dahlak jeng peih bruk “Var huak pataom mbaok” brei ka dom uranaih ruak oh nao sang hu dalam tukvak taong ruak. Tui adat meyah dom adei hu daok pak sang ye jeng hu mbang huak pataom mbaok di puac thun, ye sang iek ruak jeng padang veik bruk pambuak pagam, daong urang ruak saong urang dalam sang tani tanat hatai sahaneng saong khik tani tanat hatai siam mekre di jalan taong ruak”.

Di Sang iek ruak Rahra Nhandan Gia Định, bruk caga ka dom danak dak sangka Tet jeng daok hu samar chip peih ngak. Tok takik harei anak tal, danak dak “Mbang darak bal Pataih anit ranam” mbang ka 3 hu angan “Bal Pataih anit ranam – Tet klah rabha” brei hu peih ngak, daong ngak jeng hatai anit ranam, daong urang ruak sahnang hatai taong ruak tuk abih thun tet mai.

Tui amuk Hoàng Thị Bích Hạnh, Phaok jabat Ngak bruk Rahra sang iek ruak, labik bahrau di danak dak thun ini lac brei ka hu rilo urang hu taduan kaya alin. Urang ruak gam daok, mbang darak daok brei caik ka rahra baoh sang kan kandah, hu labaih 200 urang hu mbaok tame. Di ini, 20 balai brei pabak dom kaya njauk hu saong dom ndap nda njauk hu ka urang ruak di luac jalan taong ruak. Sang iek ruak jeng khik tani tanat danak dak lì xì akaok thun ka urang ruak gam daok dalam Harei 1 bingun raya Tet yau sa panuac tadhau ayuh akaok thun bahrau saong bruk daong prein ka hatai mboh njuel njac: “Dalam nan hu dom danak dak yau ye adat likau akhar huroh akaok thun, dom kadha me-in bhap bini ka uranaih yau o an quan, jal pabui saong balai ngak gheih oh mek jien brei ka urang kamei baoh sang kan kandah yau ngak kakau, ngak mbuk”.

Gam haong bruk klah rabha nan, di Sang iek ruak Uranaih lek ka 2, arthak harei raya Tet mai tal meng dom danak dak sangka pamaong tal dom uranaih njauk ruak daok gilac taong ruak dalam raya Tet. Salih ka dom harei puac thun gandi gandang, labik mblang di sang iek ruak hu chreih sambai jang ngan haong dom balai zero jien dong, mblang adaoh tamia saong dom danak dak bui me-in brei ka uranaih, kuhria peih ngak di harei 6/2. Dom adei sit hu mboh ginup bak jang arthak harei raya Tet dalam sang iek ruak.

Sang iek ruak jeng hu dom “Mbang peih radaih zero ndong” pajeng ba dom uranaih njauk ruak hu ginup kein lagaih gam haong baoh sang nao sang raok Tet. Amuk Nguyễn Thị Thuý, Phaok Jabat Ngak bruk rahra, Sang iek ruak Uranaih lek taka 2 brei thau: “Kuhria, taong abih dom kaya alin dalam bingun Tet ini lac hu labaih 3.000 paok pandap, jeng yau dom paok jien lì xì, dom jien taong ruak daong dom uranaih njauk ruak baoh sang kan kandah. Taong abih dom jien taong ruak hu Sang iek ruak Uranaih 2 pambuak haong dom gah ngak pahla dalam bingun Tet ini kuhria lac labaih 1 ty dong”.

Tuk raya Tet mai jaik tal, bruk klah rabha hu payua meng bruk ngak mbuan mbiah min lagaih, piah dalam tukvak kan kandah di abih, urang ruak jeng meda mboh hu hatai anit ranam di menuac urang saong hatai caong takre piah patui veik bruk sahnang hatai taong padam ruak./.