Kapul ngak bruk UB Bhap bini tinh Gia Lai gam saong urang lambaok ka So Ilamo – Pahat Padhih saong Jirah rivang, rilo labik jirah gam hu mbang nao rivang me-in, roh duah Bein pakat Negar Kon Ka Kinh. Ini lac mbang akaok meti ong Phạm Anh Tuấn, Akaok UB Bhap bini tinh Gia Lai pa-uak takai mai tal di Labik khik Drap ar Kon Hà Nừng.

Hu taneh praong jaik 42.000 ha glai tamo, me-om pacang jaik 94% taneh glai, Kon Ka Kinh ieu lac yau pabung sang di labaih 1.700 janih phun saong jaik 900 janih anek athur glai, dalam nan hu janih athur glai karei oh daok ralo yau kra dhen juk mbaoh kanyik, voọc chà vá takai bau xám, phun ngo 5 hala praong kan lavik atau lan kim tuyến. Ini jeng lac labik halau ia di rilo kraong praong di Tay Nguyen yau kraong Ba, kraong Đăk Pne, kraong Ayun, gam ngak mat la-an langik, gam pacang khik halau ia saong ngak samu he sinh thai ka sa bhum praong.

Ong Trần Việt Anh, Akaok Kapul Jirah rivang tinh Gia Lai ndom lac, taong abih dom yaom kaom nan, brei ngak jeng dom ndap nda jirah rivang gheih karei dalam tukvak anak tal:

“Khol dahlak hulin brei padang dom tour karei pambuak jirah rivang tasik saong jirah rivang glai, pagap yau tour 4 harei 3 malam, hu 2 harei di Quy Nhơn saong 2 harei di Gia Lai, piah tuai damuai gam maong iek thaik gheih di tasik, gam ba drei tame thaik gheih di ceik glai. Bruk pagam ini brei ngak bahrau, brei prein dui pachreih ka tour di Gia Lai, dui pachreih ka tuai damuai dalam saong langiu negar”.

Dang tui  mata maong iek di urang gam bruk khik ramik, ong Ngô Đức Thắng, Yam ndok Bein pakat Negar Kon Ka Kinh, caong khin labik ini brei patagok jeng labik jirah rivang sinh thai hijao, karo kajap. Tui ong Ngô Đức Thắng, bruk ini oh lac daong pacang khik glai saong khik piah gien karei kan si duah mboh di dom janih anek athur, phun kayau glai, blaoh nyu daok pandar hu sa kein lagaih karei, piah ka Kon Ka Kinh oh lac sa janih duh ka bruk roh duah hu rilo phun kayau anek athur glai blaoh daok meda pasamu haong bein pakat negar cát Tiên, Cúc Phương, Ba Bể, Cát Bà… saong tanrak hadah dalam angan jalan ka jirah rivang.

“Tukvak meng anak daok tal, khol dahlak hulin brei jhul khang bruk pasang iek, pacang khik ceik glai, yaom kaom glai ceik duh ka bruk khik ramik; gam haong patagok pambuak haong dom labik jirah rivang padang dom ndap nda, jitvu saong hatang duh ka tuai damuai; ngak iek dom tour – jalan ngak hu pato megru saong roh duah dalam nan; yaih khan thaik thaot bein tal dom jabat, sang bac. Khol dahlak hulin brei padang harak gar, danak dak piah ba tabiak bruk buh jien tame padang hatang, duh siam abih ka tuai damuai jirah”.

ong Phạm Anh Tuấn, Akaok UB Bhap bini tinh Gia Lai brei thau lac, dalam bruk langik salih karei saong kurang phun kayau anek athur dalam dunya yau ye urak ini, dom glai yau Kon Ka Kinh ieu lac yau ye sa baoh gilang oh karei di Gia Lai atau di Viet Nam, blaoh nyu daok yau ye sa baoh drap ar di dunya. Tukvak anak tal, gam haong bruk khik ramik tani tanat, tinh Gia Lai brei caik ngak dahlau bruk dak quy hoach, ngak ha tang, meng jalan tame tal dom labik duh tuai damuai jirah, pagam kajap saong pacang khik alam langik tasik saong ngak tani tanat dom adat khik ramik Bein pakat Negar Kon Ka Kinh:

“Dahlau abih, khol dahlak hulin brei pasang duah taong abih bruk ngak, meng bruk dak quy hoach tal bruk peih ngak. Kuhria pataom tame ngak hatang dahlau – jalan tame, labik duh bruk anak meta ka tuai damuai; hadei di nan dak quy hoach brei ka labik dalam bein, padang labik mai tal siam mekre haong alam langik tasik, oh ngak kan kandah tal thaik thaot ceik glai atau ngak kan kandah tal bruk di khik drap ar sinh quyen dalam langik tasik. Puac luac abih ieu lac peih bruk raok tuai njauk adat, khik kajap tani tanat pandar pacang khik salamat di bein pakat negar ini.”

Kon Ka Kinh ieu lac sa baoh gilang ameh pariak di ceik glai Tay Nguyen. Khik ramik saong patagok yaom kaom labik ini jeng ieu lac sa janih brei khik ka harei hadei sa baoh gilang ameh pariak di dunya langik tasik hu alin brei./.