Labaih 35 bangsa gam diuk rai yau bangsa: Yuan, Cam, Raglai, Lo, J’rai, K’ho, Tày, Chơro, Nùng... di bhum taneh Đông Nam tinh Lam Ndong (Binh Thuan klak), hu ngak jeng sa bein ilamo rilo janih ndung bak asal kadha. Jeng ye mai meng dom bruk ngak ilamo kaya meda asal kadha ini hu daong ka gah rivang ma-in di tinh cak rok patagok, hu jeng tanut hadah tanjak dalam dom thun tapa.

Dalam nan, hu angan di abih njauk khan tal adat Yon yang Pulao tasik Cầu ngư, hu mboh peih ngak avan jang meng dom bhap bani tapen tasik di tinh Lam Ndong. Yaok thun, tame dalam bilan 7 saka aia bulan, adat ini pachreih hu bruk caik hatai sangka di bhap bani saong tuai damuai meng dom bruk ngak adat cambat tanarakun meng kan jaman dalau mai yau: Adat raok Lệnh Ông Sanh, Adat Parah truai gom di kraong Cà Ty.

Tal kreih bilan 9 saka aia bulan, gilac mai trun tal xa Tan Hai, tuai damuai njauk ba drei tame sa bruk ngak adat cambat tui hatai jia karei, nan lac hu harei raya Dinh Thầy Thím. Ini lac vaktu masa piah taduan mek dom bruk rik daong di urang hu angan iew lac Thầy Thím atau Po Gru Thim, sa thaik binguk dak rai sajarah ngak pamedeih tagok hatai jia dalam bhap bani luac labaih 130 thun tapa.

Ieu lac sa baoh bhum taneh pataom rilo bhap bani bangsa takik saong yaok bangsa gilac hu asal ilamo, adat cambat tanarakun karei, ngak brei ka bein ilamo di puk palei kaya meda jang. Gam tui hu bhap bani urang Cam Ahier, adat mbang Katê hu meng lavik mai, peih ngak di akaok bilan 7 yaok thun tui saka di urang bangsa Cam (njuak tame puac bilan 9, akaok bilan 10 saka aia harei). Adat ini ngak brei pahadhar dom po yang; caong khin pala hagait hu nan, likei kamei ranam gauk, anek manuac saong anek athur, phun kayau caih maboh cak rok.

Daok bhap bani Lo diuk rai rilo abih di phuong Phan Thiet hu adat ngak Yang Tasik Nghinh Ông Quan thánh Đế quân. Adat ini hu peih ngak 2 thun sa mbang (dalam thun chẵn tui saka aia bulan), gam tui makna khik ramik saong cak rok patagok ilamo bhap bani, likau ka anhgin siam hajan laghaih, rai diuk trei sil karo selamat.  

Dalam dom thun tapa, bruk khik ramik, cak rok patagok ilamo dom bangsa tuk halei jeng hu dom pakat, dom gah phun dhan, bhap bani sangka khik ramik, cak rok patagok saong yaih khan yaom kaom lingai di nyu.

So Ilamo, padhih saong rivang ma-in tinh Lam Ndong jeng hu peih ngak bruk pataom iek veik, duah thau dom adat cambat tanarakun bhap bani yau: Katê, Ramưwan, Akaok padai bahrau, Nghinh Ông saong bruk ngak gaok glah lan am meng kan di bangsa Cam, K’ho, Raglai, Chơro, Hoa.

Gam tui di nan, dak padang dom kapul nyaom daoh tamia bhap bani Cam, pataom veik dam dara hu mbaok tame nyaom taong ginang, pah paranưng, yuk saranai, daoh kadha daoh bhap bani, tamia ragam bangsa Cam.

Patagok ilamo adaoh tamia bhap bani saong biak rilo danak dak, bruk ngak roh duah ilamu pambuak pagam tal yaom ilamo oh mboh di meta di dom bangsa takik blaoh saong daok peih ngak mek hu baoh jeng siam mekre.

Inem mek dak rai sajarah – ilamo saong adat cambat tanarakun dalam tinh Lam Ndong biak rilo janih, ndung bak yaom lingai, brei mboh ka dom janih biak karei ka gah ilamo bhap bani di urang Viet, Cam saong dom bangsa adei sa-ai karei. Ini lac kadha siam gheih brei ka gah rivang ma-in di tinh.

Gam labaih 300 inem mek saong 460 adat cambat, tanarakun meng kan pambuak pagam haong bruk ngak ilamo, hatai jia, agama nan lac sa baoh “gilang drap ar” biak prong, gam ngak brei kaya meda ka phun ilamo bangsa Viet Nam, gam ngak jeng rilo janih, rilo sambo mau dalam thaik binguk ilamo dom bangsa adei sa-ai di bhum taneh Đông Nam tinh Lam Ndong.

Tui urang pal akaok So Ilamo, padhih saong Rivang ma-in Lam Ndong, bruk peih ngak dom adat cambat tanarakun nan rik daong khik ramik, cak rok patagok baoh jeng siam mekre dom yaom ilamo meng kan, adat cambat tanarakun siam gheih di bhap bani dom bangsa daok di bhum tasik dalam tinh. Abih di nyu lac, adat Yol yang palao tasik Cầu ngư di Vạn Thủy Tú, phuong Phan Thiet; adat di Dinh Thầy Thím, xa Tan Hai saong adat mbang Katê di urang bangsa Cam ieu lac 3 dalam 4 inem krung hu Mentri Ilamo, padhih saong rivang ma-in ba tame danak dak angan Inem krung ilamo oh mboh di meta pakat negar./.