Dom harei akaok bilan 8, meng dom canah jalan palei Cawait tal jalan nao tagok  Ceik Ndak, langik tasik jalan mbak mboh chreih chai bui sambai bak uan tabuan brei ka harei ngak Yang Po Dam pambak prong. Sap ghinăng, paranưng gam haong sap saranai, bak jalan dom ban sambo khan ao ngui cuk yau meng kan, mbau pahe barau har bahrau am tasak… yau brei thau ka sa peih raya yol yang Po Dam di mikva urang bangsa Cam daok di xa Lien Huong, tinh Lam Ndong mbiah mai tal.

Bruk ngak Yang Po Dam hu peih mbaok meng adat raok Mbang taduan mek angan Inem mek dak rai sajarah ilamo di Mentri Ilamo, Padhih saong rivang ma-in saong khan ao di Po meng ala takai bimon nao tagok bimon prong.

Adat raok khan ao hu peih ngak biak gheih ghang gam saong bruk hu mbaok di kapul nyaom urang dam dara, dom halau janeng di gah Ahier mai meng di dom puk palei dalam bhum.

Tukvak rah tabiak bruk ngak Yang, yaok ribau bhap bani saong tuai damuai atah jaik meng rilo tinh, ban duah tal bimon Po Dam.

Po gru Bích Văn Nhuận, daok di palei Cawait, xa Lien Huong, tinh Lam Ndong brei thau, ini lac vaktu piah ka bhap bani Cam gah Ahier pahadar tal Po Dam, urang Po hu rilo rikdaong di bhuam taneh Panduranga meng kan, lac 2 tinh Ninh Thuan - Binh Thuan dahlau diah.

Tui dak rai bhap bani Cam, Po Dam angan biak lac Po Kathit, nan lac Bàn La Trà Duyệt, ndih tapui di thun 1387, anek di patao Parachanh saong lac adei di Po Sah Ine, hu danok bimon kakuh di phuong Phu Thuy, tinh Lam Ndong.

Po Dam tagok rai Patao di thun 1446 di Bal Bat Thi Nưng (Khanh Hoa urak ini), trun rai di thun 1472. Tuk daok rai patao, ong rik daong biak rilo dalam bruk daong ba tacei pato ka bhap bani urang bangsa Cam dalam bhum Panduranga peih prong mblang taneh, kuac rok ribaong kraong, pala drak... ba mai rai diuk trei sil ka mikva dalam bhum palei. Tuk lahik mao, ong hu brei pok angan jeng Po Dam. Piah kanar hadhar tal bruk ngak di ong, mikva padang ngak bimon piah kakuh, nan lac dom baoh bimon kalan Po Dam harei ini.

Amuk Qua Đình An Thuận, daok di palei Cawait, xa Lien Huong, tinh Lam Ndong klah rabha kadha brei thau, tui hatai saneng di urang bangsa Cam, ini lac adat kakuh likau, haniem phol, likau ka angin siam hajan laghaih, phun pala cak rok siam mekre, negar palei sron mbuan salamat, langiu di nan brei hadhar tal dom po yang. Gam gam haong binah ngak adat nan lac dak dak daoh tamia bak asal ilamu bhap bani Cam ngan haong sap ghinăng, paranưng ralai gam haong sap kadait saranai, kanhi.

Bruk ngak yang harei raya di bimon Po Dam thun ini nyu hu makna biak karei tuk rah tabiak dalam vaktu karja xa Lien Huong peih ngak tui jalan ngak karja bahrau. Kadha bui sambai khik ramik adat cambat tanarakun, asal ilamo saong hatai gul pataom hu brei mboh dalam yaok cambuai klao, yaok palak tangin jan van.

Ong Trương Công, Akaok Mban Khik iek bimon kalan Po Dam brei thau, thun ini mikva mai rilo bui sambai, adat cambat tabiak dalam mbuan laghaih, dom halau janeng hu ngak siam bruk ngak di drei.

Dom baoh bimon kalan Cam Po Dam ndih di takai ceik Ndak, xa Lien Huong, tinh Lam Ndong hu taong yaom lac sa dalam dom labik bimon kalan Cam hu padang ngak biak karei tui ilamu Hòa Lai, hu thun bilan puac abap VIII – akaok abap IX. Thun 1996, Mentri Ilamo, Padhih saong rivang ma-in hu brei angan lac inem mek kien truc ilamu pakat negar.

Bruk ngak Yang di bimon Po Dam nan ieu lac sa bruk ngak tui adat cambat ilamo biak karei di urang bangsa Cam oh lac caik piah pahadar tal dom rik daong di dom po yang kuac rok ribaong ba aia tame hamu, hu yaom gah hatai jia bo daok brei mboh bruk pambuak gauk, nan lac tukvak piah ka bhap bani pamong tal halau gha.

Bruk patui khik saong patagok bruk ngak Yang ngak raya di bimon Pô Dam daok rik daong pacang khik inem krung ilamo Cam, tapa nan ngak kaya meda jang dom janih pandap panda rivang ma-in di xa Lien Huong jeng yau tinh Lam Ndong./.