Amuk Nguyễn Thái Tường Vân, Yam ndok Kongti Jirah rivang Thái Loan, hu sang jabat di tinh Dong Nai brei thau, gah ngak mbang pablei salih hu So Ilamo, Padhih saong Jirah rivang tinh Lam Dong da-a tame kapul pasang iek dom labik jirah rivang, inem mek sajarah – ilamo, kaya mbang, jitvu me-in…danei angan di 3 labik: Mũi Né, Đà Lạt saong Gia Nghĩa. Ngan haong amuk Vân, dom labik ini ba mai rilo bruk rah rivang taong abih:  “Gah Phan Thiet (klak), dahlak hulin mboh danak dak Fisherman Show biak gheih blaoh rahra Viet Nam rilo meng lac oh ka thau tal. Khol dahlak mai tal Da Lat ye jeng hu dom labik bahrau, bahrau hu padang saong ngak jeng dalam dom bilan meng blaoh. Dahlak hulin biak caong khin lac dom danak dak ini brei ba mai ka tuai damuai dom kadha gheih meta. Rup Dahlak ngak dalam gah jirah rivang hu 29 thun jeng biak gheih meta haong dom danak dak meng blaoh”.

Daok ong Hoàng Công Định, Yam ndok Kongti Dima-tour brei mboh, tinh Lam Dong bahrau ieu lac sa labik yau ye suraga gah jirah rivang, pataom ginup asal kadha yau ceik glaong, danao praong, tasik hijao saong kaoh pulao gheih. Kayua yau nan, angan je jirah rivang brei hu peih praong jang. Anak dom kein lagaih nan, dom gah ngak mbang pablei salih brei padang ndap nda pambuak bhum salih ka pablei tuor jirah klaih klaoh. Yaom lac hu rilo kein lagaih, min tui ong Định, asal kadha jalan mbak lac bruk gar daok tavak tavaiy:  “Meng di tuk brei pagam, khol dahlak hulin padang tour di Mũi Né saong Da Lat bhian, min daok rabha tung tian ka bruk ba tagok Dak Nong (klak) kayua jalan mbak atah saong tuai jirah rivang jeng oh ka randap bruk nao meng Mũi Né tagok Dak Nong 10 tuk. Khol drei meda ngak jeng jalan nao hu katut jang, atau hadei tuk Mui Ne patagok hu mblang kapal ahaok par ye brei ba tuai damuai meng Mũi Né tagok Da Lat, saong meng Da Lat trun Dak Nong hu samar jang”.

Piah langyah asal kadha jalan mbak pambuak dom labik jirah rivang dalam bhum, Lam Dong daok likau Trung uong ba tame quy hoach jalan peih samar Đông – Tây pambuak Phan Thiet – Bảo Lộc – Gia Nghĩa. Ong Phạm Văn Mạnh, Phaok Yam ndok So Padang tinh brei thau:  “Urak ini Mentri Padang biak njauk hatai ka bruk daong ini. Daok brei ka bruk pasiam jalan pambuak meng Gia Nghĩa nao Di Linh saong Jalan raya 28B daok hu buh jien tame pasiam; jalan meng Di Linh mai Gia Nghĩa daok likau Trung uong ba tame phun jien piah paglaong pakat. Anak meta, khol dahlak likau tinh caga jien padai pasiam ka mbuan nao mai, kein lagaih brei ka tuai damuai jirah”. 

Gam haong bruk buh jien tame padang jalan mbak, gah jirah rivang Lam Dong jeng daok padang jalan kuhria ka jirah rivang taong abih, karo kajap saong patagok samar. Ong Nguyễn Văn Lộc, Yam ndok So Ilamo, Padhih tinh Lam Dong brei thau, gah jirah rivang hu jalan pandar kein lagaih saong dom kein lagaih dut hoang gauk di tinh Lam Dong angaok ban do jirah rivang dalam negar.

“Khol dahlak brei peih rilo danak dak ba drei tame, sa labik mai tal di labik dalam Lam Dong. Gam haong di nan padang dom tour, jalan jirah rivang bahrau piah pambuak 3 bhum palei saong gauk; biai ka UB Bhap bini tinh, Mban Thuong vu Tinh uy ba tabiak Sarak ka patagok kinh te jirah rivang tukvak 2025 - 2030 saong kuhria tal thun 2045”.

Dom takai yam nao tani tanat dalam bruk quy hoach ha tang, pambuak bhum saong kuhria patagok ndap nda jirah rivang karei, brei mboh bruk kham merat uak drei patagok di gah jirah rivang tinh Lam Dong. Tapa di nan brei mboh labik dang di sa labik mai tal hu rilo kein lagaih saong biak karei dalam yaok luac jalan mai jirah rivang di tuai damuai jirah./.