Kaya nong lac pandap pablei tapa negar langiu praong abih di tỉnh Gia Lai, haong yaom jien mek tame hu 500 triệu USD yaok thun saong daok oh padeih tagok rilo jang. Hu yau nan mai meng rilo thun tapa, tỉnh sangka padang ngak, peih praong dom bhum nguyên liệu ngak tabiak kaya nong tui dom tanut hu chứng nhận.

Ong Lưu Trung Nghĩa – Yam ndok Sở Ngak nong saong patagok palei pala Gia Lai brei thau, dom pandap yau cà phê, chanh leo di tỉnh tame hu dom darak pasar kan tame yau ye Nhật Bản, EU. Tui bruk ba tabiak, vaktu 2022 - 2025, tỉnh brei tagok taneh phun pala piah ngak pandap tui tanut hu chứng nhận lac 5 rabau ha sa thun, paglaong chất lượng kaya nong pablei tapa negar langiu piah paglaong jien mek tame ka urang ngak nong:  “Kaya nong di tỉnh dak harei dak brei mboh prein khang gah chất lượng saong pabak hu bruk ba tabiak di darak pasar dom taneh ia. Abih di nyu lac hadei di jit praong, tỉnh pasiam veik hu gah pandap pablei tapa negar langiu. Prein pablei tapa negar langiu di dom doanh nghiệp pabak hu bruk ba tabiak. Dalam tukvak meng bloh, drei oh hu janih kaya nong halei njauk ieu urang daong blei. Abih di nyu lac hu dom doanh nghiệp yau Hoàng Anh Gia Lai, Hương Sơn, Doveco, Quiconac… padang hu dom chuỗi pablei tapa negar langiu biak jak jeng.”.

Meyah Gia Lai daok iek praong bruk peih praong dom bhum nguyên liệu piah ngak kaya nong tui dom tanut hu chứng nhận ye di Tây Bắc, Sơn La daok pataom tame ngak dịch vụ logistics piah langyah bruk pablei kaya nong di puk palei.

Sơn La urak ini hu 55 doanh nghiệp ngak dịch vụ logistics min biak sit, ngak janih bruk mbuan. Sơn La daok hu 2 jalan pajeng ba piah pablei lac jalan radaih haong jalan kraong dalam taneh ia. Min kayua jalan kraong oh ka hu pambuak gauk siam lagaih, nan ye bruk pajeng ba rilo meng lac angaok jalan radaih. Min angaok jalan roya 6 haong dom jalan tỉnh hu rilo mbon ceik kan kandah, jalan sit, dom radaih pajeng pandap praong  kan tame hu jalan palei. Kurang dịch vụ logistics, ba tal bruk pablei njam patam, baoh kraoh that di Sơn La gaok rilo kan kandah. Urang pala glaih glar saong njauk urang blei kateik yaom.

Ong Nguyễn Khắc Hào, akaok jabat ngak nong saong patagok palei pala huyện Mai Sơn, tỉnh Sơn La brei thau: Huyện hu 11.000 ha phun mbang baoh, yaok thun hu 70.000 tấn. Bruk paik mek bhian pataom tame dom tukvak halei nan, katut panak tukvak nan ye bruk khik piah hu makna biak praong. Yau nan min, oh ka hu dom kho la-an praong, rilo meng lac di dom baoh sang, di HTX, pandap khik piah oh hu rilo:  “Huyện hu pok panuac tagok tỉnh, caong khin dalam tukvak anak tal dalam huyện meda brei padang sa pasak logistics, daong palagaih ka sang bhap bini di Mai Sơn haong dom huyện jaik taphia dalam bruk ngak pandap, khik piah saong pablei kaya nong hu mbuan lagaih”.

Dom tavak tavaiy saong kan kandah di logistics dalam bruk ngak nong daok pacang jalan pablei kaya nong. Tui dom chuyên gia, Sơn La njauk peih ngak rilo jalan ngak piah trun meneing jien sahui logistics, ba tabiak ngak dom sarak piah dui pachreih urang buh jien tame ngak hạ tầng logistics. Ong Trần Thanh Hải, Phaok akaok Cục Xuất nhập khẩu, Mintri Công Thương, ndom lac: “Urak ini, jalan mbak nao mai meng palei ini tal bhum daih di tỉnh Sơn La daok kurang, oh ka hu jalan nao tal takai tasik, oh ka hu jalan ia, jalan kapal haoh. Kayua yau nan ye bruk buh jien padang ngak jalan cao tốc Hòa Bình - Mộc Châu saong peih praong jalan đô thị lac njauk ngak piah pambuak bhum palei. Taphia nan, meng pandap kaya nong hu angan je njauk khik piah, nan ye Sơn La brei hu sarak, jalan ngak dui pachreih urang buh jien tame ngak dom kho la-an, kho la-hơi saong pasak sơ chế kaya nong”.

Piah cakrok patagok bruk ngak nong khang kajap, tỉnh Sơn La thau lac logistics lac sa kadha praong oh kurang hu dalam bruk jhul khang pablei kaya nong saong pandap panda. Gam haong bruk peih ngak samu gauk dom jalan ngak di dom pakat, dom gah, yaok doanh nghiệp, HTX, urang ngak nong Sơn La jeng brei salih bahrau jalan sahneng, paglaong chất lượng pandap, salih tapa ngak tui quy chuẩn, paglaong yaom, paglaong prein meriak gauk ka pandap panda, kaya nong Sơn La./.