Muk H’Rưm H’mok daok di mbon Hra Ea Hning (xa Dray B’hăng, huyen Cư Kuin, Đắk Lắk) khan lac: Thun 2020, tuk umur labaih 60 thun, prein yawa mada trun piah duah jien padai kuria ka raidiuk muk saneng tal pamadeih weik gac bruk manyim papan. Gilac tame bruk ngak, harei bilan ba hatai tame kik manyim. Pabak tame dalam nan, ndap nda khan bai pataih di muk H’Rưm ngak tabiak tuk halei jeng hu urang mek bih. Kayua yua jalan mrai di khan bai muk manyim ieik mboh gheih mata dom bingula hu kaya Kteh ilamu glaong – di urang bangsa Ê Đê, lac oh hu ralo urang ngak hu.

Di mbon Hra Ea Hning hu dom adei saai kumei tangin kakai laman lamuac, oh tui tame bruk ngak trah damak hu yau nan ye rai diuk kinh te di drei daok kan daman. Dom gait khin manyim pataih haong amuk H’Rưm. Mai meng nan thun 2021 kapul pambuak bruk mayim khan bai mbuôn Hra Hning tamuh tabiak, gam haong 6 urang. Muk H’Rưm H’mok dang akaok kapul pambuak bruk ini. Gam haong bruk tacei ba dom adei saai ngak tui Kteh, muk H’Rưm H’mok daok gac wek muk dang ngak tal blaoh salah brei ka abih gauk.

 “Manyim khan bai brei ka drei hu jien buh tame sang. Kayua drei taha paje oh nao ngak apuh hu kayua yau nan ye drei manyim. Hu yau nan adei saai hu bruk ngak, hu jien tame karo tani tanat. Hulin akau biak bui sambai kayua drei taha paje bo daok hu bruk ngak. Sa bilan hulin dahalak duah hu labaih 4 triệu đồng, kayua yau nan hu raidiuk karo jang”.

Saai H’Neo, urang di kapul pataom gauk manyim pataih buôn Hra Ea Hning khan brei thau lac: Sa-ai tame bruk manyim tui kapul ini jaik 3 thun mai. Meng camareip saai oh hu labik padang gai manyim yau nan ye gam pambuak haong tanah mala sang taong dalam mbuôn ngak labik manyim.  

“Meng tuk hu kapul mnyim tal ini raidiuk di rup drei hu lagaih. Sa bilan drei manyim hu 4 blah, pablei hu labaih 4 trieu dong. Dalam kapul nyom thei jeng kan kathaot. Dalam 6 adei sa-ai manyim papan jeng hu ralo kan daman”.

Ndap nda khan bai pataih di mbuôn Hra Ea Hning hu angan haong urang blai atah jaik. Thun 2022 Kapul pambuak bruk hu Pahasa Kapul Từ tâm Đắk Lắk jak ba pataom rik lin padiah brei sa baoh sang tong hu yaom 300 trieu dong. Sang tong padang di pasak palei, jaik sang ilamu di mbuôn palei. Mai meng nan dom urang dalam kapul hu labik dhua lagaih brei ka manyim.

Saai H’Tin H mok sau rang jaka kumei palei mbon Hra Ea Hning bhian roh duah thau brei daong ba piah khan yaih pablei ndap nda khan bai pataih. Sa-ai H’Tin H mok ndom mayai lac:

 “Urang Ê Đê khol hulin tuk halei jeng pok praong ilamu khan ao bangsa di drei. Kumei Ê Đê takre ngui cuk khan ao tui yau ini, yau nan ye ilamu khan ao bangsa tuk halei jeng hu khik ramik. Khan ao jih dalah ilamu bangsa hu meng muk kei yau nan ye anek taco njauk brei pandar, khik ramik”.

Karja xa Dray B’hăng taong yaom glaong bruk adei saai kumei palei mbon pamadeih manyim khan bai pataih ilamu bangsa, daok duah jien hu daong karo sanang dalam rai diuk. Bruk ngak urak ini di dam dara ka oh ba bih hatai ranam bruk ngak ilamu bangsa di mukei ye pak gak, ngak alat gong caing bangsa, manyim kapan pataih khan bai. Yaom lac thau kham marat uak rup tame bruk ngak hu glaih glar hasit, jien mek tame oh hu glaong dut tui bruk ngak karei. Tapi min ong Y Xuyên Buôn Yă, Phaok akaok UB Bhap bini xã Dray B’hăng brei thau lac, mai meng kapul manyim jih dalah ini bo adei saai kamei hu bruk ngak karo. Min tapi lac jien duah hu meng bruk manyim oh ralo, oh sumu haong prein yawa di miwa urang buh tabiak. Mayim thổ cẩm piah hu bruk ngak mbang min yaom kom jien mek tame daok bien yau nan ye oh pachreih hu dam dara uranaih./.