Po Gru Thông Minh Toàn, Phaok Akaok Kapul Halau janeing Ahier tinh Lam Dong brei thau, ong daok caong maong harei peih pakak Nyaom roya lambaok vakil dalam negar mbang ka XIV di Ndang. Ong chreih chrai brei thau lac, dom thun blaoh tapa, hu bruk buh jien tame di Karja, raidiuk di mikva urang Cam di tinh Lam Dong hu biak rilo salih karei.

“Dahlak hulin mboh di tukvak tapa, ndang saong Karja biak sangkja tal mikva bangsa takik, oh luai ka thei gilac gah likuk.”

Daok tui urang Ndang sit thun umo Thông Thị Kim Thành, daok di palei Lâm Giang, xa Hàm Thuận Bắc, tinh Binh Thuan klak), bruk salah blaoh bruk politik di xa oh lac bruk njauk di drei blaoh nyu daok lac ieu bruk bui sambai di urang ndang. Dalam dom thun tapa, sa-ai hu pathau khan piah mikva thau saong ngak siam jalan ngak, sarak di Ndang, Karja. Cambaih laih lac, danak dak padang palei pala bahrau, danak dak dalam rahra gul pataom padang raidiuk bahrau di labik rahra… Sa-ai kamei Thông Thị Kim Thành brei mboh hatai caong di drei tal Nyaom roya Ndang jaik tal.

“Dahlak hulin caik hatai jie tame Ndang saong Karja…”

Dahlau tuk pagam tame tinh Lam Dong, mikva Cam tinh Binh Thuan klak hu labaih 8.300 baoh sang hu labaih 42.000 urang, daok pataom rilo di 9 palei pagam saong 4 xa hu taong abih lac urang Cam.

Kein lagaih ka co so ha tang, raidiuk daok dang di mikva urang Cam dak harei dak hu pasiam saong patagok. Dom xa hu rilo urang Cam dahlau diah rilo meng lac dom xa palei pala bahrau. Ini lac sa dalam dom bruk jak jeng brei mboh bruk sangka biak praong di Ndang saong Karja.

Gam saong hatai je taong abih tame Ndang, ong Lâm Tấn Bình, sa urang Cam hu angan daok di palei Bình Tiến, xa Bắc Bình je tame Nyaom roya lambaok vakil dalam negar mbang ka XIV di Ndang brei ba tabiak dom sarak njauk, hu jalan kuhria tantu, pabak hatai caong patagok di taneh ia dalam jaman bahrau.

Ong Lâm Tấn Bình brei thau, ong biak mboh hadah mbaok saong bui sambai tuk hu tinh Lam Dong ruah ngak lambaok vakil hu mbaok di Nyaom roya Pakacah anit ranam taneh ia dalam negar mbang ka XI meng blaoh, rilo bruk ngak, naih gheih di urang bangsa takik hu pok meyaom, bruk nan brei mboh ka dom salih bahrau di bhum urang bangsa takik dalam negar saong di tinh Lam Dong. Daok di dom palei Cam di Lam Dong, meng mblang hamu tal tal bac, meng bruk ngak ilamo bangsa tal raidiuk yaok harei, bhum taneh ini daok dak harei dak brei mboh bruk uak drei tagok meng prein di drei di bhap bini tuk ngak dom sarak bangsa. Ong Lâm Tấn Bình caong khin tame Nyaom roya lambaok vakil dalam negar XIV di Ndang:

"Mikva bangsa takik saong dalam nan hu bangsa Cam biak caong takre tame dom sarak njauk di Ndang piah daong ka taneh ia nagar Viet Nam patagok jeng yau dom bangsa takik patui veik ngak mbang duah jien padai, khik ramik ilamo bangsa. Caong hu yau nan, taong abih dom bangsa patui veik patagok sarak gul pataom taong abih bangsa adei sa-ai piah daong taneh ia uak drei tagok dalam jaman bahrau."

Ong Bình caong khin, dalam tukvak mai meng anak tal, Ndang saong Karja brei patui peih ngak siam lagaih jalan ngak bangsa, padang saong salah blaoh dom cơ chế, sarak njauk dalam jaman bahrau. Gam haong di nan, ngak siam dom danak dak pakat negar, dalam nan hu danak dak patagok kinh te – xa hoi bhum urang bangsa takik saong bhum ceik tukvak 2026 - 2030.