Dom harei ini, di dom bhum palei bangsa Cam tinh Khanh Hoa, bruk pamaong tal Nyaom roya Ndang dalam negar mbang ka XIV pambak praong dalam. Meng dom jalan pambuak palei tal labik daok di rahra, hala dok bangu, blah mbang-ron, panuac kadha ndom meyai hu caga biak gheih, ngak jeng sa thaik thaot gheih ghang, brei mboh hatai je saong bruk njauk hatai di Rahra ngan haong Ndang. Dalam thaik thaot nan, xa Ninh Phuoc, sa bhum palei hu rilo urang bangsa Cam diuk rai di tinh Khanh Hoa daok dak harei dak salih meng jalan ngak, sarak njauk haong bruk daok rah tabiak di Ndang saong Karja. Sa-ai Đàng Năng Tự, palei Hamu Craok, xa Ninh Phước, tinh Khanh Hoa brei thau:

“Caong khin di dahlak saong rahra palei Hamu Craok lac Ndang saong Karja tapa Nyaom roya mbang 14 ini hu sangka tal raidiuk di palei lan am Hamu Craok rilo jang, rilo meng lac raidiuk mikva urang Cam.”

Di palei Katuh, sa baoh palei Cam daok di xa Phước Dinh di Khanh Hoa, hatai je saong caong khin pamaong tal Nyaom roya Ndang dalam negar mbang ka XIV jeng daok pambak praong khang. Meng bhum taneh thu lagu dahlau diah, palei Katuh urak ini hu ma-om bak meng dom mblang taneh pala ribung prang rilo, ba mai jien mek tame tani tanat ka rahra. Kadha “phun ribung prang patruh kathaot” lac sa bruk brei mboh siam lagaih dom jalan ngak, sarak di Ndang saong Karja dalam bruk patagok kinh te bhum urang bangsa takik. Amuk Kiều Thị Khuê, Bi thu Chi bo palei Katuh, xa Phước Dinh di Khanh Hoa brei thau:

“Dahlak jeng biak caong khin ngak habar ka bhap bini drei hu bruk ngak mbang karo kajap, patagok…”

Tui pathau khan di bruk ngak bangsa thun 2025, dalam tinh Khanh Hoa urak ini hu 56 xa bhum urang bangsa takik saong bhum ceik, hu 137 palei biak kan kandah. Meng hu bruk ngak samu gauk di sa majam politit, raidiuk di mikva dak harei dak hu salih; ha tang hu buih jien tame ngak, ilamo hu khik ramik, quoc phong – an ninh hu khik kajap. Yaom lac daok rilo kan kandah, min hatai je di mikva saong bruk dui ba di Ndang dak harei dak hu pasiam. Ong Đàng Chí Quyết, Bi thu Chi bo palei Hamu Craok, xa Ninh Phước, tinh Khanh Hoa ndom meyai lac:

“Ndang saong Karja sangka biak rilo tal bruk ngak mbang di urang bangsa takik, dalam nan, hu bangsa Cam.

Ong Phú Anh Lân, Akaok Jabat Ilamo – Rahra xa Phước Hữu, tinh Khanh Hoa brei thau:

“Dahlak jeng yau Rahra xa Phước Hữu caong khin, Nyaom roya Ndang anak tal brei hu rilo sarak ba tabiak rilo jalan ngak”.

Gam haong dalam negar, mikva urang bangsa Cam tinh Khanh Hoa daok pamaong tal Nyaom roya Ndang dalam negar mbang ka XIV meng hatai je, bruk samu gauk saong caong takre uak drei patagok. Nyaom roya oh lac sa danak dak politit praong prang, bo daok lac labik pataom dom akaok hadah krah, hatai kham merat saong hatai je di Rahra, peih tabiak jalan patagok bahrau ka jalan padang sa Viet Nam ginup meda khang kajap, gu;l pataom saong patagok karo kajap./.