Meng jalan mbaiy tong par bak hala dok bhong merah patuk kanjik nduac cagar dalam palei Ndong Yao, xa Ea M’Đroh (Ndak Lak), veih tapa jaik 800 met ye tal mblang apuh di baoh sang sa-ai Lý Thanh Tiền. Sa-ai gam haong hadiuk daok kacaoh hareik, srau haong mahleik brei ka tapul limo jaik 10 drei. Sa-ai Tiền khan brei thau: thun 2021 baoh sang sa-ai jeng daok dalam dom dom baoh sang kan kathaot, min mai meng raong glang mek hu baoh jeng siam mekre, phun mbang baoh hu baoh yau nan ye urak ini hu padang ngak sang danaok prong prang siam gheih. Sa-ai biak jia tame Ndak Lak meda patui veik cak rok patagok khang jang dalam tukvak anak tal: “Dahlau diah baoh sang dahlak biak kathaot, meng hu Karja daong brei phun pajaih saong sa yau limo gam haong sa yau pabe pajaih, langiu di nan daok daong ilamu raong glang, pala drak piah ka baoh sang cak rok patagok bruk ngak mbang kinh te mboh biak siam laghaih. Urak ini baoh sang hu tapa truh kathaot. Khaol dahlak caong khin Ndang mbo tinh Ndak Lak vaktu masa anak tal (2025 – 2030) patui veik peih ngak dom danak dak piah daong ka mikva dalam palei kein lagaih yam tagok ngak mbang kaya meda piah tapa truh kan kathaot.”

Atah di palei Ndong Yao jaik 1,5 km nan lac palei Cuôr, jeng hadah tanjak  hala dok salam uan Nyaom roya Ndang mbo tinh. Ong Y Sắk Kbuôr, Akaok palei Cuôr khan yau brei tahu lac, dalam palei hu 355 baoh sang, mboh rilo di dalam hu lac bhap bani bangsa Ê Đê. Dalam vaktu masa blaoh tapa, meng dom danak dak patrun kathaot, labaih 120 baoh sang hu daong ngak sang danaok, phun pajaih, anek pajaih piah cak rok patagok bruk ngak mbang kinh te grap tanat rai diuk. 80 baoh sang dalam nan hu tapa truh kathaot. Ong Y Sắk caong khin: “Urak ini jeng daok kurang pabah mbang jang palei saong dom pabah mbang jang sang bhap bani, khaol dahlak caong khin Ndang bo sangka buh jien tame padang ngak jang piah ka mikva hu labik ma-in, peih ngak bruk ilamo ka nyu siam jang. Langiu di nan, dahlak jeng caong khin dalam vaktu masa 2025 – 2030, Ndang mbo tinh patui veik sangka buh jien tame ngak daong ka dom baoh sang daok veik phun pajaih, anek pajaih piah ka mikva mbuan laghaih piah tapa truh kan kathaot.”    

Vaktu masa 2020 – 2025, Ndang mbo tinh Ndak Lak hu peih ngak gam gauk dom danak dak, bruk ngak patrun kathaot bhum urang bangsa takik ngan haong taong abih phun jien labaih 4.220 ty ndong. Ong Võ Trần Quang, Phaok akaok Mban Tuyen giao saong Jak ba bhap bani tinh Ndak Lak brei thau, Sarak Nyaom roya vaktu ini ba tabiak rilo jalan ngak samar drah brei ka bruk cak rok patagok kinh te – rah ra, langiu di nan patui dom danak dak patrun kathaot, abih di nyu lac daong ka bhap bani bangsa takik daok di bhum atah bayah.  

“Ndang mbo tinh jeng ba tabiak bruk ngak dahlau di abih nan lac sangka buh jien tame ngak saong peih ngak siam mekre dom sarak bangsa dalam vaktu ini dalam tinh. Dalam nan, kham merat patrun 2% baoh sang kathaot grauk labik dalam tinh saong 3% dalam bhum urang bangsa takik tagok tui tanut siam chuan kathaot rilo gah tukvak 2025 - 2030.”

Vaktu masa tapa, dom sarak daong ba dom puk palei di Ndak Lak hu salih bahrau, rai diuk di mikva hu trei sil jang dahlau. Vaktu masa mai meng anak tal, ngan haong taneh riya langik tasik cak rok patagok bahrau, bhap bani dom bangsa takik tinh Ndak Lak caong khin ini lac tukvak piah yam tagok. Nyaom roya Ndang mbo tinh nan lac mbang akaok meti (mereip) ba Ndak Lak pal kajap kadha siam laghaih yam tapa dom cuang kandah, patagok pren khang di tasik – glai piah yam tagok gam haong Negar./.