Can Tho ieu lac sa di dalam dom bhum palei akaok meti peih bruk ngak nong payeng meng pong nerang. Bruk ini daong salih jalan sahaneng di urang ngak nong, meng bruk cuh pong tapa bruk pataom pong piah ngak tabiak dom ndap nda hu yaom kaom tagok glaong.

HTX Ngak nong Tiến Thuận di Can Tho pandar pong nerang ngak bimao pong, khak huu co, daong urang ngak nong parilo jien mek tame saong patrun jien buh tabiak ka khak drak hoa hoc tal 63%. Meng majam hamu danak gauk, jaik taphia sang rahra saong jalan nao tabak takai, jalan angaok kraong lagaih, bruk pataom pong nerang siam lagaih, pandar urang ngak bruk di bhum palei. Ndap nda khak huu co saong janih siam pala bimao pablei abih tapak di labik, siam lagaih kinh te glaong. Ilamo di urang ngak nong jeng salih, meng bruk cuh pong tapa pablei atau pabak ka HTX, maong pong lac bruk duah jien bahrau. Ong Nguyễn Cao Khải, Yam ndok HTX brei thau, HTX daok gaok kan kandah ka phun jien, jamraik saong pataom tame. Brei hu bac pasram ka ilamo ky thuat saong daong brei mesraiy jien di gilang pariak, taneh riya saong peih praong bruk ngak:

"Darak pasar urak ini daok iek tal bruk tui huu co, nan ieu lac sa bruk ngak tabiak khak huu co ye daok gaok biak lagaih di bhum palei, kayua ndap nda drei hu dahlau, lac hu pandap tamo biak rilo. Meng dahlau mai mikva yuak blaoh lac 80% lac cuh klak, min meng tuk hop tac xa hu padang tabiak saong hu bruk pambuak pasram ye mikva thau hu cambaic."

Tui amuk Phạm Thị Minh Hiếu, Dhan jabat Pala drak saong Pacang khik phun kayau ban raya Can Tho, urang ngak nong hu patakik bruk pandar khak hoa hoc, salih tapa khak huu co meng pong, piah pasiam prein yava saong asar siam alam langik. Min, oh lac hop tac xa halei jeng peih hu bruk ini kayua brei ka hu urang ngak saong phun jien, ilamo kong nghe. Dalam tukvak anak tal, gah ngak nong brei palih ruah HTX hu ginup kein lagaih piah daong peih ngak, gam haong nan brei kein lagaih hu mesraiy phun jien saong paglaong ilamo ky thuat. Amuk Phạm Thị Minh Hiếu brei thau:

"Dalam bruk ini jeng hu brei mboh rilo bruk ngak hu. Ka sa lac salih hu jalan sahaneng di urang ngak nong, ye drei mboh lac dahlau diah ye cuh pong ye urak ini lac hu jalan ngak lac pataom pong piah ngak dom bruk karei. Ka dua lac ngak bruk ngak nong payeng kaya ini ye urang ngak nong drei jeng pandar hu urang ngak bruk di bhum palei piah parilo jien mek tame, maong mboh cambaih laih tapa bruk gam ngak bamao gam ngak khak huu co, drei meda hu jien mek tame."

Jalan ngak pandar jamraik pasang iek pong tui jalan patakik tathuak nerak saong ngak nong payeng hu brei angan lac Patagok bahrau di ky thuat Vỉet Nam, gam haong nan hu Mentri Ngak nong saong Alam langik pachreih kakei brei caik dahlau bruk pandar. Tui Mentri Ngak nong saong Alam langik, dom bruk ngak iek dahlau brei mboh siam lagaih naih gheih yau patrun labaih 3 tan CO₂ dut haong bruk lam dar pong dalam hamu dauk dalam ia. Tagok bruk ngak hu meng 10-15% tuk pandar khak huu co ngak meng pong.

Ong Cao Đức Phát, Akaok Mentri meng dahlau diah di Mentri Ngak nong saong Alam langik ndom mayai lac, mek pandar veik pong nerang ieu lac bruk hu makna dalam jalan patagok gah ngap ndap nda padai brah saong ngak nong hacih sa-at. Kayua yau nan brei buh jien tame khang tame ilamo ngak kong paglaong yaom kaom pong nerang, meng bamao ilamo kong nghe tal ndap nda sinh hoc saong daong jamraik. Langiu di nan brei maong iek patakik jien je ka ndap nda, jitvu pambuak tal pong nerang:

"Khol drei njauk brei iek maong bruk taong jien je urak ini ngan haong dom ndap nda saong dom jitvu hu pambuak tal pong nerang lac yau habar, kayua khol drei langyah ka pong nerang ye khol drei brei ngak tabiak sa bruk karei biak siam."

Danak dak 1 trieu ha daok yam tame tukvak brei ngak ka drah samar, salih pong nerang meng bruk cuh klak jeng sa janih drap ar hacih oh lac ngak bruk sanya tui Net Zero di Viet Nam, blaoh daok peih tabiak jalan nao bahrau ka gah padai brah, patakik tathuak nerak, patagok yaom kaom, parilo jien mek tame ka urang ngak nong. Ini lac bruk daong prein piah ka labik padai gah Pei negar pamaong tal gah ngak nong bahrau, karo kajap dalam harei hadei./.