Piah padang angan pablei salih ka medar, Chi cục Pala drak saong Khik caga phun pala tỉnh Ninh Thuận hu ngak salah harak gar brei mã số bhum pala ka medar di HTX Dịch vụ Ngak nong Trường Thọ, xã Phước Hậu, huyện Ninh Phước, daong ka urang pala medar paglaong yaom pandap, patagok jien mek tame. 

HTX Dịch vụ Ngak nong Trường Thọ, xã Phước Hậu lac sa dalam dom HTX camereip abih di huyện Ninh Phước, tỉnh Ninh Thuận tut angan likau pabak brei mã số bhum pala ka medar, ngan haong taneh praong 16 ha. Piah mek hu dom tanut pabak brei mã bhum pala, medar brei hu pala tui jalan hữu cơ, pacang halăm. Dalam tuk pala, dom urang dalam HTX brei vak cambaih laih dom bruk ngak, meng tuk pala tal tuk paik baoh medar. Ong Nguyễn Thành Anh, Yam ndok HTX Dịch vụ Ngak nong Trường Thọ, xã Phước Hậu, huyen Ninh Phước, tỉnh Ninh Thuận lac: "Dom gah, dom pakat brei mã số bhum pala piah mikva saong HTX pala phun medar hu sahnang hatai".

Xã Phước Hậu hu 175ha taneh pala medar. Ini jeng lac palei camereip hu taneh pala medar rilo abih dalam tỉnh. Piah hu pabak brei mã số bhum pala, UB bhap bini xã Phước Hậu hu pambuak bruk haong gah chức năng peih bruk pato pasram bhap bini pala tui jalan pacang halam, salih jru halak hóa học meng jru sinh học nan ye alam langik tasik hu siam mekre, baoh medar khik hu salamat. Ong Nguyễn Như Hùng Triết, Phaok akaok UB bhap bini xã Phước Hậu, huyện Ninh Phước brei thau yau ini: “Bruk brei mã số bhum pala hu makna biak praong. Pandap kol drei duah thau hu asal di nyu, khik kajap salamat. Meng bruk duah thau hu asal di nyu, kol drei meda ba pandap tabiak negar langiu, tabiak dunya. Ba yaom pandap tagok glaong, daong patagok jien mek tame ka urang ngak nong".

Meng thun 2021 tal urak ini, bruk daong padang Mã số bhum pala hu Chi cục Pala drak saong Khik caga phun pala tỉnh sangka peih ngak. Chi cục kham merat pambuak haong urang ngak nong, bhian pasang iek, kakei urang ngak nong vak ginup tame siphau. Gam haong nan, bhian ba dom dữ liệu pala – ngak tagok phần mềm, pasang iek mẫu ia, mẫu taneh tui njauk bruk ba tabiak. Tal tukvak ini, hu 10 mã số bhum pala hu pabak brei di dalam tỉnh, haong taneh praong jaik 81 ha mangaok dom phun pala yau măng tây xanh, nha đam, dưa lưới, paloi, asar ratak…. Ong Phạm Dũng, Akaok Chi cục Pala drak saong Khik caga phun pala tỉnh Ninh Thuận brei thau: “Kol dahlak daok ngak harak gar piah pabak brei mã số bhum pala ka bhum pala medar di HTX Trường Thọ, xã Phước Hậu, haong taneh praong 16ha. Urak ini, kol dahlak hu ngak salah bloh harak gar saong pok tagok ka Cục khik caga phun pala, tuk hu harak mai brei thau ye kol dahlak khan veik ka HTX saong dom sang dalam bhum pala medar ini thau, pabak dom tanut tui tanut 774 di Cục Khik caga phun pala.”

Mboh lac, bruk medar hu pabak brei Mã số bhum pala lac kadha praong dalam bruk padang hatai jia di urang blei mbang ka chất lượng baoh medar mangaok darak pasar, rik daong paglaong yaom saong patagok jien mek tame ka urang ngak nong. Hadei di medar, Ninh Thuận daok ngak harak likau pabak brei mã số bhum pala ka dom janih phun pala di tỉnh yau ye: nho, tỏi, lasun saong kruac bung Phước Bình di huyện Bác Ái./.