Hu anek sit umo 4 thun, min 3 thun ini mai, tal page harei Som akaok adit, sa-ai Trượng Thị Hồng Điệp sang daok di palei Cam Phước Hữu, huyện Ninh Phước nao labaih 80 km jalan ceik, pajeng ba anek tui nao tal Sang bac Mẫu giáo Phước Bình, huyện Bác Ái piah pato bac. Yaom lac langik hajan atau pandiak, sa-ai oh klak var pato, oh klak tal bac. Yam tapa rilo kan kandah dalam bruk nao mai, raidiuk bhum glong, sa-ai tuk halei jeng kham merat iek glang uranaih lac anek bangsa Raglai meng hatai anit di urang amaik, meng hatung hatai, jalan diukrai di sa gru pato. Gru Trượng Thị Hồng Điệp – Sang bac Mẫu giáo Phước Bình, huyện Bác Ái, tỉnh Ninh Thuận khan lac:  “Dom kamuan bhum bangsa takik pak ini drei pato ye gaok biak rilo kan kandah. Dom kamuan ndem sap bangsa karei, gaok mai dahlak meyai kamuan oh thau. Harei ndem hasit ndem meyai hong dom kamuan miat miat meng hu thau. Bruk pato di drei meng hu lagiah, kamuan hu thau bruk dahlak pato tacei.”

Daok anai gru Pi năng Thị Bít Trinh sang daok di xã Phước Hòa hu labaih 10 thun kak kajap saong bruk pato bac. Yaok harei, anai Trinh nao tapa jalan atah labaih 23 km piah tal Phước Bình pato bac. Dah page nao aval, biar harei sup mai rami ramik bruk sang caga ka bruk nao sang bac di harei paguh. Gru Trinh tuk halei jeng kham merat ngak siam bruk di drei saong hu jeng gru pato naih joi di sang bac. Nai gru Pi năng Thị Bít Trinh - Sang bac Mẫu giáo Phước Bình, huyện Bác Ái khan lac:

“Meng anit bruk ngak, ranam uranaih nyu pabak prein ka dahlak ngak siam jang bruk di drei. Lagaih lac hu dom amaik ame anek saih sangka, daong nai gru, tuk gru khin ngak pandap pato, amaik ame brei klaok, lon ka gru piah ngak. Kan kandah tuk jak ba uranaih mai bac kayua maik ame sang kan daman.”

 Sang bac mẫu giáo Phước Bình lac sang bac daok atah abih di huyen bhum ceik Bac Ai, hu 06 labik sang bac, dalam nan hu 01 labik sang bac praong, 04 labik sang bac sit saong 01 labik sang bac lac labik ngak bruk, labik daok ka urang jakar, gru pato; dom labik sang bac  daok rah meng akaok xã tal puac xã, pandap panda daok kurang rilo, yau nan ye dom gru pato kham merat biak ralo meng meda khik iek, pato siam ka dom kamuan. Dalam sang bac hu 31 gru pato,  pato 16 tal ngan haong 368 kamuan, dalam nan, meteh lac gru pato meng bhum taneran tagok bhum ceik ngak bruk. Muk Trương Thị Tâm – Akok sang bac Mẫu giáo Phước Bình, huyện Bác Ái, Ninh Thuận brei thau: “ Di labik ini khol dahlak bhian peih dom bruk ma-in sambai piah ngak jeng labik anit ranam gauk yau dalam sang di drei, abih di nyu lac gru pato daok di huyện karei  yau Ninh Hải, Phan Rang, Ninh Phước, Thuận Nam dalam tỉnh mai ini pato saong daok veik sa adit. Pak ini yau sa baoh sang, ngak jeng sa baoh sang ndung bak hatai anit ranam di bhum atah bayah yau ini”.

Bruk mbang huak, ndih daok pak sang bac di gru patolac kan, bruk khik iek, pato dom kamuan daok kan jang. Kayua raidiuk bhap bini Raglai daok rilo kan kandah, nan ye dom anai gru mầm non di bhum ceik ngak bruk abih tukvak, meng tuk kamuan ndih, tuk padeih kreh jala pandiak, pandar taong abih dom pandap klaak piah ngak jeng  pandap pato bac, pandap ma-in  ka dom kamuan. Gaok tuk, dom anai gru daok buh jien kadung tabiak blei ba-ar, màu piah pato bac saong ngak mekre bilik bac. Sa-ai PoPo Huy Nhật daok di xã Phước Bình, huyện Bác Ái, Ninh Thuận khan lac: “ Anai gru sangka tal kamuan biak ralo, bruk mbang huak, ndih daok, blaoh tal pato ka dom adei akhar huroh, kadha ma-in di tal bac,  anai gru abih hatai pato vak, nai gru caik biak rilo tukvak ka dom adei".

 Bruk pato mầm non caik ka dom anai gru brei hu hatai anit dom kamuan meng hatai anit di urang amaik. Pato dom kamuan bac, brei dom kamuan mbang huak, palua domkamuan, ma-in saong nyu, bac tapuk ka nyu pang… Taong abih bruk nan jeng hu dom anai gru mâm non bhum ceik Bac Ai brei ka dom kamuan meng abih hatung hatian di drei.

Hatung hatain di dom anai gru mầm non di huyen bhum ceik Bac Ai biak njauk iek praong. Bruk kham merat dalam pato pakai, diuk rai salut mbut, anit uranaih meng hatai di urang amaik ngak brei amaik ame anek saih, bol bhap bangsa Raglai pak ini jia tame. Ini jeng lac jalan khang kajap abih piah ka yaok gru pato anit takre bruk ngak, anit uranaih yau Wa Ho praong uranam caong khin: “ Yaom lac kan kandah tal halei jeng brei patui bruk pakacah gauk pato siam saong bac joi”./.