Dom harei jaik Tết, jeng lac tuk dom sruh radaih pajeng pandap Tết di dom doanh nghiệp, dom urang ngak pahla daok nduac nao grauk puk palei piah brei pandap Tết ka bhap bini. Di xã bhum ceik Phước Chiến, huyện Thuận Bắc, jaik 500 baoh sang kathaot taduan hu pandap Tết kayua dom doanh nghiệp dalam tỉnh alin hadiah. Amuk Katơr Thị Thuyền, daok di xã Phước Chiến, huyện Thuận Bắc, tỉnh Ninh Thuận khan lac: “Harei ini mikva hu taduan pandap di dom urang ngak pahla mai brei ka mikva mbang tết thun 2023. Tapa nan, mikva bui sambai lo tuk hu bruk sangka di dom kapul ngak pahla mai brei pandap ka mikva mbang tết.”

Di huyện bhum ceik Bác Ái, labik hu tal 2.794 baoh sang kathaot. Piah kuhria Tết ka bhap bini, langiu dom pok pandap Tết kayua TW,  kayua tỉnh daong brei ka sang kathaot, sang sarak karja, UBND huyện daok hu kaoh tabiak meng kadung jien karja daong ka dom sang jaik si kathaot mbang Tết. Taphia nan, UBND huyện hu alin hadiah 37 pok pandap, yaok pok yaom 500 rabau đồng brei ka 37 urang hu angan je dalam palei. Ong Chamaléa Tiến - Xã Phước Thành, huyện Bác Ái brei thau: “Tết anek sak tapai thun 2023, Đảng, Karja haong Mban Bangsa hu alin hadiah pandap brei ka dahlak, ka sang dahlak, taong abih mikva dalam palei chreih chrai lo, bui sambai lo piah mbang tết thun bahrau 2023.”

Ong Bạch Văn Nguyên, Chủ tịch UBND huyện Ninh Phước brei thau, Tết Nguyên đán thun ini, yaok baoh sang kathaot, jaik si kathaot, sang kan kandah dalam tỉnh daok hu daong brei brah mbang Tết lac yaok urang hu 15 kg brah: “Piah daong ka mikva mbang Tết, abih di nyu lac dom urang dalam sarak karja, sang kan kathaot, jaik si kathaot saong sang kan kandah ye UBND huyện taduan hu tacei pato di tỉnh saong di huyện ủy. Tui nan, huyện hu peih bruk ngak tui dom sarak karja, brei brak ka dom sang kathaot saong jaik si kathaot. Yaok sa urang hu 15kg. Abih di nyu lac dom xã, ban sit, MT, kapul nyaom di huyện hu jak ba dom kapul, nyaom, menuac urang piah daong pandap ka  sang kathaot, jaik kathaot saong sang kan kandah, ba bui sambai, ngak habar dalam huyện thei thei jeng hu Tết".

Langiu bruk daong di Đảng saong Karja, ye Sở LĐTB &XH tỉnh jeng hu jak ba dom doanh nghiệp daong ka urang kan kathaot mbang tết. Ong Nguyễn Văn Bình – Phaok Yam ndok Sở LĐTB&XH tỉnh Ninh Thuận lac: “Sở hu pok panuac tagok UBND tỉnh kaoh tabiak meng kadung jien karja piah nao ravang, alin hadiah pandap brei ka dom urang sarak karja, dom sang kathaot dalam tỉnh. Langiu di bruk daong meng pandap, UBND tỉnh hu tacei pato dom huyện, ban sit saong MT, dom kapul nyaom, patagok bruk jak ba, ieu dom doanh nghiệp piah ngak habar kol drei hu dom pok pandap brei ka dom sang kathaot, dom urang daok mbang tui bruk daong di karja dalam dom puk palei hu bui sambai taduan raok tết”.

Tal jhung thun 2022, Ninh Thuận daok hu jaik 7 rabau sang kan kathaot. Tết Nguyên đán daok mai jaik tal. Tuk yaok menuac, yaok sang daok chreih chrai kuhria caga raok Tết meng kan di bangsa, dom pok pandap anit ranam tuk jaik yam tapa thun bahrau hu ba brei tal tangin dom sang kathaot, dom sang sarak karja, oh lac brei mboh bruk sangka di Đảng, Karja, bruk ba tangin tame daong di bhap bini, bo daok brei mboh bruk jum pataom, bruk daong brei, piah ka urang halei jeng hu mbang Tết./.