Daok ngak ka Kongti Chang Shin Viet Nam di tinh Dong Nai gam saong jien mek tame yaok bilan labaih 10 trieu dong/ tal tuk mahit dom urang ngak mbang blei salih di Ninh Thuan daok duah manuac ngak, njuak si gilac nao ban raya ngak bruk, saai Thu Uyên ba hatai buh harak lakau ngak di bhum palei. Sa-ai Hán Thị Thu Uyên daok di ban palei Bal Caong - Chung Mỹ, bansit Phước Dân, huyen Ninh Phước ndom mayai lac:

“Tet ini tuk mai sang, dahlak mboh pak tinh drei urak ini patagok, jien mek tame tani tanat nan dahlak likau ngak bruk pak palei, jaik sang, jaik mikva drei.”

Thun ini umur blaoh labaih 45 thun, muk Dương Thị Thủy jeng hu Kongti TNHH Innoflow NT mek tame dan saong brei sa labik ngak lagaih gam tui jien bilan meng 5 – 6 trieu dong. Muk Thủy brei thau lac, meng di harei po ngak mbang ini tame ngak bruk, yaok rituh urang Cam daok di palei Bal Riya - Bỉnh Nghĩa, xa Bắc Sơn, huyen Thuận Bắc hu mek tame brei ngak bruk hu jien ba tame biak karo. Muk Dương Thị Thủy lac:

“Mikva pak palei Bal Riya – Bỉnh Nghĩa ngak pak ini biak rilo saong hu jien mek tame tani tanat piah pandar ka baoh sang, jeng takik rambah.”

Sang Jammariak Chik Ninh Phuoc urak ini hu labaih 300 urang ngak, ralo abih urang kumei. Dalam nan, oh lac tukik urang dalau ngak bruk chik di dom tỉnh gah Mraong nagar mai ngak bruk. Dalam thun ini, sang mac jammariak peih praong darak pasar tapa nagar Amirika, Japan, Engrik. Piah paganap kayangui ndap nda ka urang dak blei, sang jammariak caong khin duah mek 300 urang ngak bruk. Ralo harak pachreih jeng hu brei tabiak piah chreih hu urang ngak barau yau ye: daong jien bilan dalam tuk masa bac bruk ngak, daong jien manyek xăng nduac radaih, huak kreh harei dan saong jien paralo mbang ngak; jien bilan 13… Ong Huỳnh Văn Quang, Akaok Sang mac Chik Ninh Phước brei thau lac:

‘’Akaok mbram brei ka jien mek tame di công ty dalam thun 2025 kham marat bahu 250 trieu USD. Piah mek hu pablei nan ye công ty njauk khin hu biak ralo urang ngak karo, yau nan ye kongti daok duah dom sarak siam di abih piah duah hu ralo urang ngak piah mek hu njauk yau hatai caong khin di kongti’’.

So Lao dong, Thuong binh dan saong Xa hoi tinh Ninh Thuan brei thau, 3 thun mai, bhian di nyu dalam sa thun di Ninh Thuan hu labaih 1 ribau urang ngak gilac mai palei ngak bruk. Pok ralo urang daok ngak di dom po urang ngak mbang sit saong gap tagok labaih 32 ribau urang, jien bilan yaok akaok urang meng 6 đến 8 trieu dong sa urang sa bilan. Ong Trần Đức Long, Phaok Akaok So Lao dong, Thuong binh và Xa hoi tinh Ninh Thuan khan brei thau lac:

“Tapa bruk pan hu hatai khin urang ngak di tỉnh Ninh Thuan. Dalam nan hu di Labik Ngak kong  Du Long saong di Phước Nam anak mata labaih 3 ribau manuac ngak, khol akau dahalak daok pambuak saong dom công ty daok pilih dak tui hatai caong khin brei ka gah urang ngak bhian biasa, urang ngak hu tangin dan saong ngak bruk hagait hu pakat ilamu bruk nan piah ba ka dom labik brei pato bruk ngak. Daok tui bruk ngak tangin takai biasa bhian khol akau dahlak brei thau grauk cambac piah urang ngak pilih, blaoh tui di nan urang daok ngak langiu tỉnh gilac mai palei ngak di dom khu ngak kong, sang jammariak di dalam tỉnh’’ .

Urak ini, piah “khik kakai” urang ngak di labik, jeng ye pachreih urang ngak hu ilamu tangin langiu tỉnh, UB Bhap bini tinh patacei gah jabat chuc nang saong karaja dom bhum palei jhul khang dalam bruk dak quy hoạch, ramik taneh brei padang sang rahra, sang brei daok saong dom janih ha tang brei daong urang ngak kong, urang ngak bruk, patui di nan pachreih urang hu ilamu tangin ngak bruk, pachreih hu dom urang buh jien tame Ninh Thuan, daong pachreih pakang kinh te - xã hoi tinh Ninh Thuan patagok./.