Bruk pala 54 ha măng tây xanh hữu cơ tui tanut VietGAP, brei jien mek tame tui kuhria rah tapa hu 700 triệu đồng sa hecta yaok thun. Bruk ngak ini di HTX Dịch vụ Tổng hợp Tuấn Tú xã An Hải, huyện Ninh Phước hu ba bruk ngak brei ka jaik 100 urang ngak dalam palei. Ini lac bruk ngak hu peih tabiak meng bruk pambuak gauk di HTX saong dom urang dalam HTX, lac bruk mai meng salih jalan pala drak dalam rilo thun tapa. Ong Hùng Ky, Yam ndok HTX Dịch vụ Tổng hợp Tuấn Tú, xã An Hải, huyện Ninh Phước, lac: “HTX Tuấn Tú meng harei pala măng tây xanh, dom urang dalam HTX hu jien mek tame tani tanat…”

Xã Phước Vinh hu taneh pala labaih 900 ha, dalam nan ta-eng phun tangei lac 450 ha. Piah peih ngak tiêu chí padang bruk pala drak dalam padang ngak palei pala bahrau, palei hu jhul khang bruk cakrok HTX, kapul pambuak bruk, dui pachreih saong pachreih ba doanh nghiệp buh jien tame ngak mbang gah ngak nong. Gam haong nan, padang dom bruk pambuak gauk pala, ngak, pagam haong bruk pablei kaya nong.  Meng ngak siam tiêu chí padang bruk pala drak bo jien mek tame kuhria rah tapa di rahra xã Phước Vinh meng 26 triệu đồng sa urang sa thun di thun 2016, tal urak ini mek hu jaik 50 triệu đồng sa urang sa thun. Ong Lê Văn Tâm, Phaok akaok UB bhap bini xã Phước Vinh, huyện Ninh Phước lac: “Tiêu chí padang bruk pala drak lac kadha praong dalam padang ngak palei pala bahrau. Dalam dom thun tapa, UB bhap bini xã Phước Vinh tuk halei jeng sangka tacei pato dom HTX pambuak bruk haong dom doanh nghiệp buh jien tame ngak mbang, blei veik kaya nong hu pala rilo di palei yau ye tangei pajaih, baoh kandiuk haong dom janih phun pala karei. Meng nan, mikva urang nong hu cakrok patagok, paglaong radiuk bhap bini”

Ninh Phước lac labik hu taneh ngak padai praong abih dalam tỉnh ngan haong 5.430 ha. Salih ka bruk ngak dom pajaih padai hu pala rilo yau ye ML214, TH41, OM 4900, meng 2 thun mai ini, huyện Ninh Phước hu pambuak bruk haong Sở Ngak nong saong Patagok palei pala, ba dom pajaih padai hu chất lượng glaong tame ngak, saong salih meng ngak 3 vụ tapa daok 2 vụ. Ong Trượng Tin, akaok kapul urang ngak nong xã Phước Hậu, huyện Ninh Phước brei thau yau ini: “tapa padang ngak palei pala bahrau, urang ngak nong khang hatai ngak pajaih padai bahrau..”

Tal urak ini, huyện Ninh Phước hu padang 11 mblang hamu praong dalam ngak padai. Bruk urang nong khang hatai salih tapa ngak dom pajaih padai chất lượng glaong oh lac daong patagok jien mek tame, bo meng prein khang pacang caga ruak kik, dom pajaih padai chất lượng glaong daok hu daong ka urang ngak nong patak pataom hu rilo jien sahui buh tame ngak. Ong Nguyễn Hữu Đức, Phaok akaok UB bhap bini huyện Ninh Phước ndom lac: “Kol dahlak hu padang 2 mblang hamu praong di xã An Hải pala ngak tui Vietgap saong hữu cơ, hu dom gah chứng nhận. Urak ini, hu pambuak bruk haong doanh nghiệp piah pablei. Daok bruk ngak padai, kol dahlak pataom tame ngak mblang hamu praong, hu 11 mblang hamu praong di dom xã. Dom xã jeng daok pambuak bruk haong dom doanh nghiệp. Daok ngan saong tangei jeng hu padang mblang hamu praong di xã Phước Vinh saong Phước Sơn, daok pambuak bruk haong dom doanh nghiệp jaik 350ha.”

Meng bruk kham merat dalam peih ngak tiêu chí padang bruk pala drak dalam padang ngak palei pala bahrau, tal urak ini, jien mek tame kuhria rah tapa tui akaok menuac di huyện Ninh Phước hu labaih 64 triệu đồng sa urang yaok thun. Huyện Ninh Phước daok patui bruk pathau khan, patagok saong pakhang pakajap bruk ngak di dom HTX, kapul pambuak bruk, patagok bruk daong padang ngak dom bruk pala drak, pambuak gauk ngak, pagam haong danak dak “Yaok xã sa janih pandap” saong rami ramik veik gah ngak nong, dak harei dak paglaong jien mek tame ka bhap bini saong padang ngak palei pala bahrau hu siam lagaih./.