Nyaom roya Ndang mbo pakat Ban raya mbang ka I, tukvak thun 2025-2030, hu makna karei, brei mboh sa bruk salih karei di sajarah tuk Ban raya HO Chi Minh hu pagam haong tinh Binh Duong saong Ba Ria – Vung Tau. Meng nan, ngak jeng Bhum ban medin – ngak kong – pabah lamnge tasik praong abih di dalam negar saong hu labik dang njauk lagaih dalam labik. Ini lac bruk mbaoh tangin hu jalan ngak di Ndang saong Karja, brei mboh meta maong atah, gam saong hatai caong padang sa pasak daong prein bahrau di karja, peih tabiak jaman patagok bahrau.

Nyaom roya mbaoh tangin 5 thun anak tal taong abih Ndang mbo brei thau pandar dom kein lagaih, tabiak prein pasiam dom kan kandah, truh tapa kan kandah, kham merat ngak jeng dom jalan ngak. Meng Nyaom roya, kapul urang jakar dang akaok pakat glaong abih di Ban raya jeng hu brei mboh nan lac dom urang jakar hu meda ilamo, hu tapa rilo labik hu makna di Trung uong saong bhum palei.

 Pamaong yam tal harei pahadar 100 thun padang Ndang (laik di thun 2030), Ban raya jeng sa ban medin hadah krah, bahrau ndih dalam kapul 100 ban dalam dunya.

Yam tal 100 thun padang taneh ia (thun 2045) ndih dalam kapul 100 ban medin siam abih dalam dunya, njauk haong ban medin praong pakat dunya di Dong Nam A, lac pasak kinh te, jien padai, jirah rivang, jitvu, bac megru, y te di Chau A, labik mai tal dui pachreih dalam dunya…Njauk ndom tal, Ban raya ba tabiak tukvak cakrok patagok GRDP kuhria rah tapa 10%-11%/thun.

Tui Akaok Jabat Roh duah patagok Ban raya Ho Chi Minh, ong Trương Minh Huy Vũ lac, jalan ngak patagok dua ine lek taka so hu Trung uong jao, caong takre Ban raya jeng ba tabiak kham merat biak praong. Min, Ban raya Ho Chi Minh brei pagam haong bruk tani tanat kinh te vi mo, khik kajap labik daok dang dalam rahra hu tani tanat, dui katut bruk meda saong kathaot… TS Trương Minh Huy Vũ ndom meyai lac:

“Ban raya Ho Chi Minh peih praong hu dom labik piah ngak patagok dalam dom thun anak tal. Khol drei hu dom bruk naih gheih yau 3 bhum palei jeng lac gah patagok di negar. Bruk padang peih ngak lac bruk hu makna dalam tukvak anak tal. Yau Bi thu Ban uy hu ndom meyai “Khin sahaneng min jeng brei thau ngak”. Thau ngak biak hu makna saong brei ba tame jalan ngak cambaih laih di yaok ky thuat”

Akaok UB Bhap bini Ban raya Ho Chi Minh, ong Nguyễn Văn Được brei thau, piah ngak hu dom jalan ngak, Nyaom roya brei salih bahrau bruk cakrok patagok, pasiam veik kinh te tui jalan ilamo khoa hoc ngak kong nghe saong salih bahrau hadah krah brei daong prein rilo abih; jhul khang bruk lek taka so, salih hijao taong abih; patagok kinh te tri thuc, hadah krah, meda hu ba drei tame chuoi yaom kaom dalam dunya.

Langiu di nan, Ban raya Ho Chi Minh daok ba tabiak dom jalan langyah karei, yau ye: Patui veik buh jien tame padang Ban raya jeng pasak praong abih ka pato megru; salih bahrau dom hagait mbuan abih, pasiam taong abih gah pato megru; paglaong asar siam urang ngak bruk; sangka iek praong patagok dalam rahra karo kajap, khik kajap njauk tukvak ngak, samu dalam rahra, bruk daok dang mbang ngui dalam rahra, an ninh salamat ka menuac urang. Akaok UB Bhap bini Ban raya Ho Chi Minh Nguyễn Văn Được brei thau lac:

“Ban raya patui veik taoh talaih, langyah patruh dom danak dak, taneh riya… daok kan kandah, gar tavak daok kandaong rilo thun; Ba tabiak dom panuac ka bruk pasiam, salih dom paka Sarak 98 di Quoc hoi; Ngak iek bruk ban medin dalam Ban raya haong bruk ta-eng ngak po glaong dalam bruk quy hoach, ngak ban medin hadah krah saong bruk neh rabha gilang pariak njauk lagaih, khik kajap ginup urang piah peih ngak dom jalan ngak patagok dalam tukvak jaik mai tal.”

Bi thu Ban uy Ban raya Ho Vhi Minh ong Trần Lưu Quang brei thau lac, meyah oh hu kham merat biak glaong, oh hu bruk salih bahrau khang dalam ilamo dang akaok dui ba saong bruk ngak ye meda kan di salah blaoh dom jalan ngak, bruk ngak praong bo Sarak Nyaom roya hu ba tabiak.

Nyaom roya sajarah hu peih tabiak sa danak dak bahrau ka Ban raya angan Wa Ho. Ban raya Ho Chi Minh kham merat ngak caong takre padang Ban raya patagok samar, karo kajap, anit ranam, bahrau, ba drei tame, njauk haong bruk dang akaok, daong prein patagok di dalam negar./.