Ong Sơn Sang thun ini hu umo 75 thun, sa urang hu rilo mbang tabiak mbaok tame bruk ngak di puk palei, hu ngak bruk di Kapul nyaom Akhar bhong Thap ndo , tuk halei jeng ba akaok nao dahlau dalam bruk ngak njauk tui adat hukum di karja saong abih hatai jai daong ba bhap bani. Akaok thun 2025, tuk hu jalan ba peih ngak prong jalan palei pala jeng 2,5 m nao tapa bein la-u, ong nan lac urang akaok mereip alin brei 500 m² taneh gam phun mbang baoh, yaom lac jien mek tame rilo abih di baoh sang ong nan lac mai meng dom janih phun ini. Oh lac alin hadiah taneh, ong daok nao tal yaok baoh sang jak ba mikva hu taneh pambuak pagam tal gam gauk rik daong piah ka jalan samar hu ngak salah blaoh. Ong Sơn Sang hadar tal:

“Dahlak hu mai daok di ini labaih 40 thun paje. Dahlau diah labik ini lac bak phun la-u aia gam haong phun o ro, phun taloh, phun mban… Bilan thu nao mai takik kan kandah min tapi tame bilan hajan ye rambah rilo, nao tabiak langiu njauk nao kabak, gluh bok. Kayua yau ye, tuk pang ma-hit Karja ngak jalan ye dahlak alin hadiah chip saong jak ba mikva gam alin hadiah taneh piah Karja ngak jalan.”

Oh cang mbiah tal urak ini, dahlau diah ong jeng hu kaoh klak 36 phun la-u daok brei mbang baoh piah ka puk palei katung jalan ndien trung the mai duh ka mikva. Ong khan brei thau, kadha daok ngak pachreih ong nan lac caong khin rai rah anek taco hu rai diuk trei sil jang:

“Dahlak saneng lac rup dahlak hu umo 75 thun paje, daok diuk oh hu hadom tra, min anek taco di drei, mikva di drei hu jalan piah nao mai oh hu yau nan ngak rambah tal rai rah di harei. Dahlak hu ndom haong mikva yau ini hu jalan ye hu taong abih, bruk nao mai, pajeng ba mikva nao tame sang iek ruak atau phun mbang baoh, bingu hala njam patam, radaih limo nao tame tal labik… saong mikva jeng njauk hatai alin hadiah taneh caik ka karja ngak jalan.”

Mai meng bruk ba akaok nao dahlau di ong Sơn Sang, bruk alin hadiah taneh peih prong jalan mbak di Bót Chếch hu pambak prong grauk labik. Baoh sang halei hu canah jalan nao tapa jeng halar hatian kaoh klak phun mbang baoh, peih talaih hala paga piah peih paha mblang taneh, daong ka bruk ngak jalan hu ngak salah blaoh njauk tukvak. Amuk Nguyễn Thị Diễm Thơ – Phaok Akaok Uy ban MTTQ Viet Nam xa Song Loc ndom lac:

"Uy ban MTTQ xa hu iek prong bruk ngak siam gheih di mikva pak ini hu halar hatian alin brei taneh peih prong jalan mbak nao mai di palei pala. Abih di nyu lac bruk ngak di Cei Sơn Sang hu pambak prong, ngan haong hatai gul pataom, klah rabha brei ka kein laba chung. Kareih camin hadah di Cei Sơn Sang hu rilo baoh saong karei ngak mblah tui, abih hatai halar hatian gam haong puk palei padang ngak palei pala bahrau.”

Canah jalan bahrau hu ngak salah blaoh oh lac peih tabiak bruk ngak mbang pablei salih – bol bhap rahra, bo daok daong ka Bót Chếch samar mek hu tanut chuan palei pala bahrau paglaong. Urak ini, yaok van page mesup canah jalan ini bak sap ndom klao, radaih pajeng kaya nong tabiak darak, uranaih nao tame sang bac mbuan laghaih, rai diuk di mikva dak harei dak salih bahrau.

Kareih camin alin hadiah taneh ngak jalan di ong Sơn Sang oh lac sa janih brei ka bruk ngak siam gheih blaoh nyu daok ieu lac pren khang piah ka karja saong bhap bani Song Loc patui ngak bruk njauk hatai, jak gauk ngak siam jalan mbak nao mai dalam palei, dak harei dak padang ngak bhummi kaya meda jang./.